କେନ୍ଦ୍ରାପଡା ଅଫିସ, ୮।୯: ଲଘୁଚାପଜନିତ ବର୍ଷା ପରେ ହୋଇଥିବା ବନ୍ୟା କେନ୍ଦ୍ରାପଡା ଜିଲା ଚାଷୀଙ୍କ ଆର୍ଥିକ ମେରୁଦଣ୍ଡକୁ ଭାଙ୍ଗି ଦେଇଛି। ଜିଲାର ୫୪,୦୫୦ ହେକ୍ଟର ଜମିରେ ହୋଇଥିବା ଧାନ ଓ ଅନ୍ୟାନ୍ୟ ଫସଲକୁ ନଷ୍ଟ କରିଦେଇଛି। ରାଜକନିକା, ଆଳି, ପଟ୍ଟାମୁଣ୍ଡାଇ ଓ ରାଜନଗର ବ୍ଲକ ଅଞ୍ଚଳରେ ଏବେ ବି ବିଲରେ ବନ୍ୟାପାଣି ଜମି ରହିଥିବାରୁ ଚାଷୀମାନେ ଜୀବନଜୀବିକା ଚିନ୍ତାରେ ଦିନରାତି ଘାରି ହେଉଛନ୍ତି। କରୋନା ମହାମାରୀ ପରଠୁ ହଜାର ହଜାର ପ୍ରବାସୀ ନିଜ ଜିଲାକୁ ଫେରିଆସି ଚାଷରେ ମନ ଦେଇଥିଲେ। ଏବେ ଫସଲ ନଷ୍ଟ ହୋଇଯାଇଥିବାରୁ ପୁଣି ପ୍ରବାସକୁ ଫେରିବାକୁ ମନ ବଳାଇଛନ୍ତି।
ଜିଲା ଜରୁରିକାଳୀନ ବିଭାଗ ତଥ୍ୟ ଅନୁଯାୟୀ, ଉପରୋକ୍ତ ୫ ବ୍ଲକ ଅଞ୍ଚଳରେ ଖରିଫ ଚାଷ ଅଧିକ କ୍ଷତି ହୋଇଛି। ଏ ସମ୍ପର୍କରେ ଆଳି ଗୋବିନ୍ଦପୁର ଗ୍ରାମର ସର୍ବେଶ୍ୱର ଭୂୟାଁ କହିଛନ୍ତି, ୨୦୧୧ ପରେ ଚଳିତ ବର୍ଷର ବନ୍ୟା ମାତ୍ରାଧିକ ଭାବେ ଚାଷକୁ ନଷ୍ଟ କରିଛି। ପ୍ରାୟ ୨୦ ଏକର ଜମିରେ ଖରିଫ ଧାନ ଚାଷ ଓ ଖରସ୍ରୋତା ନଦୀ ପଠାରେ ପ୍ରାୟ ୪ ଏକର ଜମିରେ ପନିପରିବା ଚାଷ କରିଥିଲି। ଗତ ଲଗାଣ ବର୍ଷା କିଛି ପରିମାଣରେ ଫସଲ ନଷ୍ଟ କରିଥିବାବେଳେ ବନ୍ୟା ପାଣି ୧୫ରୁ ଅଧିକ ଦିନ ଧରି ବିଲରେ ଜମି ରହିଥିବାରୁ ଧାନଗଛ ପଚି ନଷ୍ଟ ହୋଇଛି। ପଟ୍ଟାମୁଣ୍ଡାଇ ବ୍ଲକ ରାଉଳିଆଢ଼ିଆ ଗ୍ରାମର ସୁଶାନ୍ତ ଜେନା କୁହନ୍ତି, ଜିଲାରେ କୌଣସି କର୍ମ ନିଯୁକ୍ତି ସୁଯୋଗ ନ ଥିବାରୁ ସୁରଟ ଯାଇ ସୂତା କଳରେ ଚାକିରି କରୁଥିଲି। କରୋନା ପାଇଁ ତାଲାବନ୍ଦ ହେବାରୁ ଏପ୍ରିଲ୍ରେ ଘରକୁ ଫେରି ପାଖରେ ଥିବା କିଛି ଟଙ୍କା ଓ ଆଉ କିଛି ହାତଉଦ୍ଧାରି ଆଣି ଖରିଫ ଚାଷ ଆରମ୍ଭ କରିଥିଲି। ହେଲେ ବନ୍ୟା ସବୁ ଧୋଇନେଲା। ଋଣ ଶୁଝିବା ପାଇଁ ପୁଣିଥରେ ସୁରଟ ଯିବାକୁ ହେବ ବୋଲି ସେ କ୍ଷୋଭର ସହ କହିଛନ୍ତି। ରାଜନଗର ବ୍ଲକ ହାତିଆ ଗ୍ରାମର ସୁଦର୍ଶନ ସାମଲ କୁହନ୍ତି, ଧାନ ସହିତ ଝୋଟ ଚାଷରେ ଟଙ୍କା ଖର୍ଚ୍ଚ କରିଥିଲି। ବନ୍ୟାରେ ସବୁ ଫସଲ ନଷ୍ଟ ହୋଇଥିବାରୁ ବର୍ଷକ ଚଳିବା ପାଇଁ ସମସ୍ୟା ହେବ।
କୃଷକ ନେତା ଗୟାଧର ଧଳ କେନ୍ଦ୍ରାପଡ଼ା ଜିଲାରେ ଏ ପରିସ୍ଥିତି ପାଇଁ ସରକାରୀ ଅବ୍ୟବସ୍ଥା ଓ ଦୁର୍ନୀତିକୁ ଦାୟୀ କରିଛନ୍ତି। ବନ୍ୟା ଓ ମରୁଡିରୁ ବଞ୍ଚତ୍ବା ପାଇଁ କେନ୍ଦ୍ରାପଡା ଜିଲାରେ କୌଣସି ସ୍ବତନ୍ତ୍ର ଯୋଜନା ନାହିଁ। ଜଳ ନିଷ୍କାସନ ବ୍ୟବସ୍ଥା ପାଇଁ ବାରମ୍ବାର ଆନ୍ଦୋଳନ ସତ୍ତ୍ୱେ ଜିଲାର ୫ ଲକ୍ଷରୁ ଊର୍ଦ୍ଧ୍ୱ ଲୋକ ଚଳିତ ବନ୍ୟାରେ ପ୍ରଭାବିତ ହୋଇଛନ୍ତି। ତୁରନ୍ତ ତଦନ୍ତ କରି ଚାଷୀଙ୍କୁ କ୍ଷତିପୂରଣ ଦିଆ ନ ଗଲେ ଆନ୍ଦୋଳନ ହେବ ବୋଲି ଧଳ କହିଛନ୍ତି। ଜିଲା କୃଷି ଉପନିର୍ଦ୍ଦେଶକ ଅଶୋକ ମହାସୁଆର କହିଛନ୍ତି ଯେ, ବନ୍ୟାରେ କ୍ଷତି ହୋଇଥିବା ଚାଷର ଆକଳନ କରାଯାଉଛି। ସମସ୍ତ ବ୍ଲକରୁ ସବିଶେଷ ତଥ୍ୟ ମିଳିବା ପରେ ରାଜ୍ୟ ସରକାରଙ୍କୁ ଏନେଇ ଜଣାଇ ଦିଆଯିବ। ଏହା ପରେ ଚାଷୀଙ୍କୁ କ୍ଷତିପୂରଣ ମିଳିବ ବୋଲି ମହାସୁଆର କହିଛନ୍ତି।
