ନୂଆଦିଲ୍ଲୀ,୩।୧ : ଭାରତୀୟ ସାର୍ସ-କୋଭ୍-୨ ଜେନୋମିକ୍ସ କନ୍ସୋର୍ଟିୟମ (ଇନସାକୋଗ) ମଙ୍ଗଳବାର କରୋନା ଭାଇରସ ମହାମାରୀର ଭୟାବହତା ମଧ୍ୟରେ ଏକ ବୁଲେଟିନ ଜାରି କରି କହିଛି ଯେ ଭାରତରେ କୋଭିଡ-୧୯ ର ଓମିକ୍ରନ ଭାରିଆଣ୍ଟର ଏବଂ ଏହାର ସବ-ଭାରିଆଣ୍ଟର ପ୍ରଭାବ ଦୃଷ୍ଟି ଗୋଚର ହେବାରେ ଲାଗିଛି। ଏହା ଏକ୍ସବିବିର ଏକ ସବ-ଭାରିଆଣ୍ଟ। ବୁଲେଟିନ ଅନୁଯାୟୀ, କରୋନାର ବିଏ.୨.୭୫ ଏବଂ ବିଏ.୨.୧୦ ଭାରିଆଣ୍ଟ ମଧ୍ୟ ଭାରତରେ ଚିହ୍ନଟ ହୋଇଛି। କିନ୍ତୁ ଏହାର ପ୍ରଭାବ ବହୁତ କମ। ଇନସାକୋଗ ଏହା ମଧ୍ୟ କହିଛି ଯେ ଆମେରିକାରେ କରୋନା ମାମଲା ବୃଦ୍ଧି ପାଇଁ ଦାୟୀ କୋଭିଡ-୧୯ ର ଏକ୍ସବିବି.୧.୫ ଭାରିଆଣ୍ଟର ୫ ଆକ୍ରାନ୍ତ ଚିହ୍ନଟ ହୋଇଛନ୍ତି।
ସେଥିମଧ୍ୟରୁ ତିନୋଟି ଗୁଜରାଟରେ ଏବଂ ଗୋଟିଏ ଲେଖାଏଁ କର୍ନାଟକ ଓ ରାଜସ୍ଥାନରେ ମିଳିଛି। ଏକ୍ସବିବି.୧.୫ ଭାରିଆଣ୍ଟ ହେଉଛି ଓମିକ୍ରନ ଏକ୍ସବିବି ଭାରିଆଣ୍ଟରର ଏକ ସବ୍-ଭାରିଆଣ୍ଟ। ଯାହା ଓମିକ୍ରନ ବିଏ.୨.୧୦.୧ ଏବଂ ବିଏ.୨.୭୫ ସବ-ଭାରିଆଣ୍ଟର ଏକ ପୁନର୍ବିନ୍ୟାସ।
ଇନସାକୋଗ ଅନୁଯାୟୀ, ବିଏ.୨.୭୫ର ଏକ ସବ୍-ଭାରିଆଣ୍ଟ ବିଶେଷ କରି ଉତ୍ତର-ପୂର୍ବ ଭାରତରେ ସକ୍ରିୟ ରହିଛି। ତଥାପି, ଏହାର ଗମ୍ଭୀରତା ବୃଦ୍ଧି ପାଇନାହିିଁ କିମ୍ବା ଏନେଇ କେହି ହସ୍ପିଟାଲରେ ଭର୍ତି ହୋଇନାହାନ୍ତି। ବୁଲେଟିନରେ ଦର୍ଶାଯାଇଛି ଯେ ଓମିକ୍ରନ ଏବଂ ଏହାର ସବ-ଭାରିଆଣ୍ଟଗୁଡ଼ିକ ଭାରତରେ ପ୍ରଭାବଶାଳୀ ଭାବରେ ସକ୍ରିୟ ଅଛନ୍ତି। ଏକ୍ସବିବି ହେଉଛି ଭାରତରେ ବ୍ୟାପିଥିବା ସବୁଠାରୁ ସକ୍ରିୟ ସବ-ଭାରିଆଣ୍ଟ।
