ଓ୍ବାଶିଂଟନ୍, ୬।୪: ପାଞ୍ଚଜଣ ଭାରତୀୟ ବଂଶୋଦ୍ଭବ ମହିଳା ଏକ୍ଜିକ୍ୟୁଟିଭ୍ଙ୍କ ନାମ ‘୧୦୦ ମୋଷ୍ଟ ଇନ୍ଫ୍ଲୁଏନ୍ସିଆଲ୍ ଓମେନ ଇନ୍ ୟୁଏସ୍ ଫାଇନାନ୍ସ’ ସୂଚୀରେ ସ୍ଥାନ ପାଇଛି। ଓ୍ବାଲ୍ ଷ୍ଟ୍ରିଟ୍ ଜର୍ନାଲ୍ର ସିଷ୍ଟର ମାଗାଜିନ୍ ବାରୋନ୍ସ ଦ୍ୱାରା ଡନ୍ ଜନ୍ସ ଆଣ୍ଡ କମ୍ପାନୀ ପକ୍ଷରୁ ପ୍ରକାଶ ପାଇଛି। ବିଶେଷ କରି ଫାଇନ୍ସ ସର୍ଭିସ୍, ଦି କର୍ପୋରେଟ୍ ଓ୍ବାଲର୍ଡ, ସରକାର ଏବଂ ଅଣଲାଭକାରୀ ସଂସ୍ଥାରେ କାର୍ଯ୍ୟ କରୁଥିବା ଲିଡର୍ମାନଙ୍କୁ ତାଲିକାଭୁକ୍ତ କରାଯାଇଥିବା ମାଗାଜିନ୍ ପକ୍ଷରୁ କୁହାଯାଇଛି। ‘୧୦୦ ମୋଷ୍ଟ ଇନ୍ଫ୍ଲୁଏନ୍ସିଆଲ୍ ଓମେନ ଇନ୍ ୟୁଏସ୍ ଫାଇନାନ୍ସ’ରେ ସ୍ଥାନ ପାଇଥିବା ୫ ଭାରତୀୟ ବଂଶୋଦ୍ଭବ ମହିଳାମାନେ ହେଲେ, ଜେ.ପି. ମୋର୍ଗାନ କମ୍ପାନୀର ଅନୁ ଅୟେଙ୍ଗର, ଏରିଅଲ୍ ଇନ୍ଭେଷ୍ଟମେଣ୍ଟର ରୂପଲ ଜେ. ବଂଶାଲୀ, ଫ୍ରାଙ୍କଲିନ୍ ଟେମ୍ପଲେଟୋନ୍ର ସୋନଲ ଦେଶାଇ, ଗୋଲ୍ଡମ୍ୟାନ୍ ସାଚ୍ସର ମୀନା ଫ୍ଲିନ୍ ଏବଂ ବ୍ୟାଙ୍କ ଅଫ୍ ଆମେରିକାର ସବିତା ଶୁଭ୍ରମଣ୍ୟମ। ଆମେରିକୀୟ ଅର୍ଥନୀତିକୁ ସୁଦୃଢ଼ କରିବାରେ ଏହି ମହିଳାଙ୍କ ଗୁରୁତ୍ୱପୂର୍ଣ୍ଣ ଭୂମିକା ରହିଛି।
ଅୟେଙ୍ଗର(୫୦) ୨୦୨୦ରେ ଜେ.ପି. ମୋର୍ଗାନ୍ର କୋହେଡ୍ ଭାବେ ଦାୟିତ୍ୱ ଗ୍ରହଣ କରିଥିଲେ। ନିଜ କାର୍ଯ୍ୟଦକ୍ଷତା ମାଧ୍ୟମରେ ସେ କ୍ଲାଏଣ୍ଟମାନଙ୍କ ସହ ସୁସମ୍ପର୍କ ସ୍ଥାପନ କରିବାରେ ସେ ଆଜି ଜଣେ ସଫଳ ବ୍ୟକ୍ତିତ୍ୱ। ଏରିଅଲ ଇନ୍ଭେଷ୍ଟମେଣ୍ଟର ଚିଫ୍ ଇନ୍ଭେଷ୍ଟମେଣ୍ଟ ଅଫିସର ଏବଂ ପୋର୍ଟଫୋଲିଓ ମ୍ୟାନେଜର ୫୫ ବର୍ଷୀୟା ରୁପଲ ଜେ. ବଂଶାଲି ମହିଳାମାନଙ୍କୁ ଫାଇନାନ୍ସ ସେକ୍ଟରରେ କାମ କରିବା ପାଇଁ ପ୍ରୋତ୍ସାହିତ କରନ୍ତି। ଏଥିସହ ଅର୍ଥ କାରବାର କ୍ଷେତ୍ରରେ ତାଙ୍କର ବିଶେଷ ଆଗ୍ରହ ଥିବା କହିଛନ୍ତି।
୨୦୧୮ରେ ଫ୍ରାଙ୍କଲିନ୍ ଟେମ୍ପଲେଟୋନ୍ ଗ୍ଲାବାଲ ଇନ୍ଭେଷ୍ଟମେଣ୍ଟ ଫଣ୍ଡର ପ୍ରଥମ ମହିଳା ଚିଫ୍ ଇନ୍ଭେଷ୍ଟମେଣ୍ଟ ଅଫିସର ଭାବେ ସୋନଲ ଦେଶାଇ(୫୮) ଦାୟିତ୍ୱ ଗ୍ରହଣ କରି ଚର୍ଚ୍ଚାକୁ ଆସିଥିଲେ। ଗୋଲ୍ଡମ୍ୟାନ୍ ସାଚ୍ସ ଗ୍ରୁପ୍ର ଗ୍ଲୋବାଲ୍ ପ୍ରାଇଭେଟ୍ ଓ୍ବେଲ୍ଥ ମ୍ୟାନେଜମେଣ୍ଟର କୋହେଡ୍ ଭାବେ କାର୍ଯ୍ୟ କରୁଛନ୍ତି ୪୫ ବର୍ଷୀୟା ମୀନା ଫ୍ଲିନ୍। ୧୯୯୯ରେ ସେ ଜେ.ପି. ମୋର୍ଗାନ୍ ଜଏନ୍ କରିଥିଲେ। ପରେ ଗୋଲ୍ଡମ୍ୟାନ୍ ସାଚ୍ସରେ କିଛିବର୍ଷ କାମ କରିବା ପରେ ୨୦୧୪ରେ ସେ ଏହାର ପାର୍ଟନର୍ ହୋଇଥିଲେ। ସେହିପରି ଆମେରିକାର ଆର୍ଥିକସ୍ଥିତିକୁ ମଜଭୁତ କରିବାରେ ବ୍ୟାଙ୍କ ଅଫ୍ ଆମେରିକାର ୟୁଏସ୍ ଇକ୍ୟୁଟି ଆଣ୍ଡ୍ କ୍ୱାଣ୍ଟିଟେଟିଭ୍ ଷ୍ଟ୍ରାଟେଜି ମୁଖ୍ୟ ସବିତା ଶୁଭ୍ରମଣ୍ୟମଙ୍କ ଭୂମିକା ମଧ୍ୟ କିଛି କମ୍ ନୁହେଁ।
