ଭୁବନେଶ୍ୱର,୭।୧୦(ବ୍ୟୁରୋ): ଇଣ୍ଟନେଟ୍ରେ ବିଜ୍ଞାପନ ଦେଇ ଭିନ୍ନ ଭିନ୍ନ ଏସ୍କର୍ଟ ସର୍ଭିସ ସେବା ଆଳରେ ଠକେଇ କରୁଥିବା ଏକ ଗ୍ୟାଙ୍ଗ କମିଶନରେଟ ପୋଲିସ ହାତରେ ଧରାପଡ଼ିଛି। ଗ୍ୟାଙ୍ଗ ମୁଖ୍ୟଙ୍କ ସମେତ ୫ ଅଭିଯୁକ୍ତଙ୍କୁ ଭୁବନେଶ୍ୱର ସାଇବର କ୍ରାଇମ ଓ ଅର୍ଥନୈତିକ ଅପରାଧ ଥାନା ପୋଲିସ ଗିରଫ କରିଛି। ସେମାନେ ହେଲେ ଏୟାରଫିଲ୍ଡ ଥାନା ଅନ୍ତର୍ଗତ ସୁନ୍ଦରପଦାରେ ରହୁଥିବା ପୁରୀ ଜିଲା ଡେଲାଙ୍ଗ ଥାନା ଅଞ୍ଚଳର ଗ୍ୟାଙ୍ଗ ମୁଖ୍ୟ ତଥା ମାଷ୍ଟରମାଇଣ୍ଡ୍ ସୁଶାନ୍ତ କୁମାର ପାତ୍ର ଓରଫ ବାବୁ (୨୮), ବଳଙ୍ଗା ଥାନା ଅଞ୍ଚଳର ଉପମନ୍ୟୁ ବରାଳ(୩୪), ଭୁବନେଶ୍ୱର ବାଲିପାଟଣା ଥାନା ଅଞ୍ଚଳର ଜଗନ୍ନାଥ ପ୍ରଧାନ(୩୮), ଖୋର୍ଦ୍ଧା ସଦର ଥାନା ଅଞ୍ଚଳର ସଦାଶିବ ସେଠୀ(୨୪) ଓ ବାଣପୁର ଥାନା ଅଞ୍ଚଳର ସସ୍ମିତା ଜେନା (୨୪)। ଏମାନଙ୍କଠାରୁ ୧୧ଟି ମୋବାଇଲ, ୨୩ଟି ଏଟିଏମ୍ କାର୍ଡ, ୭୦ଟି ପ୍ରି-ଆକ୍ଟିଭେଟ୍ ସିମ୍ କାର୍ଡ ଓ ନଗଦ ୮୬ ହଜାର ୫୦୦ ଟଙ୍କା ଜବତ କରାଯାଇଛି। ଅଭିଯୁକ୍ତମାନଙ୍କୁ ମଙ୍ଗଳବାର କୋର୍ଟଚାଲାଣ କରାଯିବା ପରେ ଜେଲ ହାଜତକୁ ପଠାଇ ଦିଆଯାଇଛି। ଏନେଇ ଜୋନ-୫ ଏସିପି ସଞ୍ଜୀବ ଶତପଥୀ କହିଛନ୍ତି, ମୁଖ୍ୟ ଅଭିଯୁକ୍ତ ସୁଶାନ୍ତ ତାଙ୍କ ସ୍ତ୍ରୀ ଓ ୨ ଜଣ ଝିଅଙ୍କୁ ଏହି ଗ୍ୟାଙ୍ଗରେ ନିୟୋଜିତ କରିଥିଲେ। ଏଯାବତ ଏଭଳି ଠକେଇ ସଂକ୍ରାନ୍ତରେ ୯ଜଣ ଅଭିଯୋଗ କରିଛନ୍ତି। ଫେରାର ଥିବା ଅନ୍ୟ ଅଭିଯୁକ୍ତଙ୍କୁ ଧରିବାକୁ ଉଦ୍ୟମ ଚାଲିଥିବା ସେ କହିଛନ୍ତି।
ଅନୁଯାୟୀ, ବିଜ୍ଞାପନରେ ଦିଆଯାଇଥିବା ନମ୍ବରରେ ଗ୍ରାହକମାନେ ଫୋନ କଲେ ଯୁବତୀମାନେ ଉଠାଇ କଥା ହେବା ପରେ ଠକୁଥିଲେ। ଗତ ସେପ୍ଟେମ୍ବର ୧୮ରେ ଭୁବନେଶ୍ୱରରେ ରହୁଥିବା ବିବେକାନନ୍ଦ ନାମକ ଜଣେ ଯୁବକ ଇଣ୍ଟରନେଟ୍ରେ ବିଜ୍ଞାପନ ଦେଖିବା ପରେ କଲ୍ଗାର୍ଲ ପାଇଁ ଫୋନ୍ କରିଥିଲେ। ଜଣେ ଯୁବତୀ ତାଙ୍କ ସହ କଥା ହୋଇ ମାଷ୍ଟରକ୍ୟାଣ୍ଟିନସ୍ଥିତ ଏକ ହୋଟେଲ ନିକଟକୁ ଡକାଇଥିଲେ। ଏଥିପାଇଁ ବିବେକାନନ୍ଦ ପ୍ରଥମେ ୧୫୦୦ ପରେ ୨୨ ହଜାର ୫୦୦ ଟଙ୍କା ଅନ୍ଲାଇନ ଜରିଆରେ ଦେଇଥିଲେ। ଉକ୍ତ ହୋଟେଲରେ ଖାଦ୍ୟ ଓ ପାନୀୟ ମାଗଣା ସହ କଲଗାର୍ଲ ସୁବିଧା ଦିଆଯିବ ବୋଲି ଯୁବତୀ କହିଥିଲେ। ହେଲେ ଉକ୍ତ ହୋଟେଲକୁ ଯିବା ପରେ ସେପରି କିଛି ବ୍ୟବସ୍ଥା କରାଯାଇ ନ ଥିବା ବିବେକାନନ୍ଦ ଜାଣିବାକୁ ପାଇଥିଲେ। ଠକେଇର ଶିକାର ହୋଇଥିବା ଜାଣିବା ପରେ ସେ ଏନେଇ ଥାନାରେ ଅଭିଯୋଗ କରିଥିଲେ। ପୋଲିସ ସେପ୍ଟେମ୍ବର ୨୦ରେ ଏକ ମାମଲା (ନଂ.୩୯/୨୦୨୨) ରୁଜୁ କରି ତଦନ୍ତ ଆରମ୍ଭ କରିଥିଲା। ଏହି ଗ୍ୟାଙ୍ଗର ଆଉ ୩ ଫେରାର ଥିବା ଜଣାପଡ଼ିଛି।
