ପରଜଙ୍ଗ,୧୫ା୨(ଡି.ଏନ୍.ଏ.): ଢେଙ୍କାନାଳ ଜିଲା ପରଜଙ୍ଗ ବ୍ଲକ ପଥରଖମ୍ବ ଗ୍ରାମରେ ଭୟାବହ ଅଗ୍ନିକାଣ୍ଡ ଘଟିଛି। ଏଥିରେ ୨୩ ପରିବାରର ୪୭ ବଖରା ଘର ସମ୍ପୂର୍ଣ୍ଣ ପୋଡ଼ିଯାଇଛି। ନିଆଁ ଲାଗିବା ପରେ ଏକ ଗ୍ୟାସ୍ ସିଲିଣ୍ଡର ଫାଟିଯିବାରୁ ନିଆଁ ତୀବ୍ରବେଗରେ ଚାରିଆଡ଼କୁ ବ୍ୟାପିଯାଇଥିଲା। ଫଳରେ କୌଣସି ସାମଗ୍ରୀ ଉଦ୍ଧାର କରିବାକୁ ସାହିବାସୀ ସୁଯୋଗ ପାଇ ନ ଥିଲେ। କିଛି ସମୟ ମଧ୍ୟରେ ସବୁ ଜଳିପୋଡ଼ି ପାଉଁଶ ହୋଇଯାଇଥିଲା।
ପ୍ରତ୍ୟକ୍ଷଦର୍ଶୀଙ୍କ କହିବାନୁଯାୟୀ, ଦଳିତ ସାହିର ଶରତ ନାଏକଙ୍କ ଘରେ କୌଣସି କାରଣରୁ ନିଆଁ ଲାଗିଯାଇଥିଲା। ଏହାପରେ ହଠାତ୍ ଏକ ଗ୍ୟାସ୍ ସିଲିଣ୍ଡର ବିସ୍ଫୋରଣ ହେବାରୁ ଲାଗି କି ଥିବା ଅନ୍ୟ ଘରକୁ ନିଆଁ ମାଡ଼ିଯାଇଥିଲା। ତେବେ ଅଗ୍ନିକାଣ୍ଡ ବିଷୟରେ ଜାଣି ସାହିବାସୀ ଜୀବନ ବିକଳରେ ବାହାରି ଆସିଥିଲେ। ହେଲେ ନିଆଁ ଆଁରେ ମୂଲ୍ୟବାନ ଆସବାବପତ୍ର, ଧାନ, ଚାଉଳ, କାଗଜପତ୍ର, ବାଇକ୍, ସୁନା ଅଳଙ୍କାର ସବୁକିଛି ନଷ୍ଟ ହୋଇଯାଇଛି। ଏଥିରେ ମକୁନ୍ଦ ନାଏକ, ହରି ନାଏକ, ଅଲେଖ ପଧାନ, ଦିଲେଶ୍ୱର ନାଏକ, କବି ନାଏକ, ମୁରାରୀ ନାଏକ, ଚିନ୍ତାମଣି ନାଏକ, ଛବି ନାଏକ, ସୁଶାନ୍ତ ନାଏକ, ଚତୁର୍ଭୁଜ ନାଏକ, ଖୁଲଣା ଦାସ, ପ୍ରାଣବନ୍ଧୁ ନାଏକ, ପବିତ୍ର ବେହେରା, ଗୋବିନ୍ଦ ନାଏକ, ପ୍ରବୀଣ ନାଏକ, ଜଗନ ନାଏକ, ତରୁଣୀ ନାଏକ, ବିନୋଦ ସାହୁ, ଟିପୁନ ସାହୁ, ନରେଶ ସାହୁ, ଲିଲି ସାହୁ, ଦମୟନ୍ତୀ ସାହୁ, କ୍ଷୀରୋଦ ସାହୁଙ୍କ ପରିବାର ପ୍ରଭାବିତ ହୋଇଛନ୍ତି।
