ଭୁବନେଶ୍ୱର, ୨୭ା୧୧ (ବନ୍ଦନା ସେଠୀ):ରାଜ୍ୟରେ ହାତୀ-ମଣିଷ ଲଢେଇ ବଢିବାରେ ଲାଗିଛି। ଗତ ୩ବର୍ଷରେ ହାତୀ ଆକ୍ରମଣରେ ୬୬୮ଜଣ ଲୋକଙ୍କ ମୃତ୍ୟୁ ହୋଇଛି। ୫୦୯ଜଣ ଲୋକ ହାତୀ ଆକ୍ରମଣରେ ଆହତ ହୋଇଥିବାବେଳେ ୧୩୯ଟି ଗୃହପାଳିତ ପଶୁଙ୍କ ମୃତ୍ୟୁ ହୋଇଛି। ଏନେଇ ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ ମଙ୍ଗଳବାର ବିଧାନସଭାରେ ତଥ୍ୟ ରଖିଛନ୍ତି। ବିଜେଡି ବିଧାୟକ ସନାତନ ମହାକୁଡ଼ଙ୍କ ପ୍ରଶ୍ନର ଉତ୍ତର ରଖି ମନ୍ତ୍ରୀ କହିଛନ୍ତି, ଏହି ସମୟରେ ହାତୀପଲ ୭୩ହଜାର ୬୨୦ ଏକର ଫସଲ ନଷ୍ଟ କରିବା ସହିତ ୧୦ ହଜାର ୨୫୯ଟି ଘର ଭାଙ୍ଗିଛନ୍ତି। ସେହିପରି ଚଳିତବର୍ଷ ଏପ୍ରିଲ ୧ରୁ ନଭେମ୍ବର ୧୬ ପର୍ଯ୍ୟନ୍ତ ୭ମାସରେ ରାଜ୍ୟରେ ମୋଟ୍ ୪୦ ହାତୀଙ୍କ ମୃତ୍ୟୁ ଘଟିଛି। ଏଥିରୁ ଆଠଗଡ଼ ବନଖଣ୍ଡର ସର୍ବାଧିକ ୫ଟି ହାତୀ ମରିଛନ୍ତି। ଏହା ପଛକୁ ରେଢାଖୋଲ ଓ ଅନୁଗୋଳ ବନଖଣ୍ଡରୁ ୪ଟି ଲେଖାଏ ହାତୀଙ୍କର ମୃତ୍ୟୁ ହୋଇଛି। ସେହିପରି ଏହି ୭ମାସରେ ୫ଟି କଲରାପତରିଆ ବାଘଙ୍କ ସହ ମୋଟ ୪୧୧ଟି ବନ୍ୟପ୍ରାଣୀଙ୍କ ମୃତ୍ୟୁ ହୋଇଛି। ଶିକାର ପାଇଁ ୧୧୧ଜଣ ବନ୍ୟପ୍ରାଣୀଙ୍କ ମୃତ୍ୟୁ ହୋଇଥିବାବେଳେ ବିଷ ପ୍ରୟୋଗରେ ୪, ବିଦ୍ୟୁତ୍ ଆଘାତରେ ୩୯, ରେଳ ଦୁର୍ଘଟଣାରେ ୫, ସଡକ ଦୁର୍ଘଟଣାରେ ୨୧, ରୋଗାକ୍ରାନ୍ତ ହୋଇ ୬୨, ପ୍ରାକୃତିକ ଭାବେ ୧୦୬ଙ୍କ ମୃତ୍ୟୁ ଘଟିଥିବାବେଳେ ପ୍ରତିଶୋଧ ପରାୟଣ ଭାବେ ୫ ପ୍ରାଣୀଙ୍କୁ ହତ୍ୟା କରାଯାଇଛି। ଏଥିସହ ୫୮ ବନ୍ୟପ୍ରାଣୀଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଥିବା ମନ୍ତ୍ରୀ ସୂଚନା ଦେଇଛନ୍ତି। ହାତୀମାନେ ସାଧାରଣତଃ ଖାଦ୍ୟ ଅନୁସନ୍ଧାନରେ ଜଙ୍ଗଲରୁ ଜଙ୍ଗଲ ଘୁରିବୁଲୁଥାନ୍ତି। ଝାଡଖଣ୍ଡ, ଛତିଗଡ଼, ଆନ୍ଧ୍ରପ୍ରଦେଶ ଓ ପଶ୍ଚିମବଙ୍ଗରୁ ହାତୀମାନେ ଓଡ଼ିଶାକୁ ଆସିବା ସହିତ ଓଡ଼ିଶାରୁ ହାତୀମାନେ ସମ୍ପୃକ୍ତ ରାଜ୍ୟଗୁଡିକୁ ଯାଇଥାନ୍ତି। ତେବେ ଝାଡ଼ଖଣ୍ଡ, ଛତିଶଗଡ଼, ଆନ୍ଧ୍ରପ୍ରଦେଶ ଓ ପଶ୍ଚିମବଙ୍ଗ ହାତୀଙ୍କ ଦ୍ୱାରା ଓଡ଼ିଶାରେ ହୋଇଥିବା କ୍ଷୟକ୍ଷତିର ସ୍ବତନ୍ତ୍ର ଆକଳନ ହୋଇପାରି ନାହିଁ। ଅପରପକ୍ଷେ କେବଳ କେନ୍ଦ୍ରାପଡ଼ାରେ ଗତ ୫ ବର୍ଷରେ କୁମ୍ଭୀର ଆକ୍ରମଣରେ ୨୨ଜଣଙ୍କ ମୃତ୍ୟୁ ହୋଇଛି। ବିଶେଷକରି ବ୍ରାହ୍ମଣୀ, ବୈତରଣୀ ଓ ଖରସ୍ରୋତା ନଦୀରେ କୁମ୍ଭୀର ଆକ୍ରମଣର ସଂଖ୍ୟା ଅଧିକ ରହିଛି ବୋଲି ମନ୍ତ୍ରୀ ତଥ୍ୟ ରଖିଛନ୍ତି।
