ପୁରୀ,୨୨ା୭(ଅଜିତ୍ ମହାନ୍ତି): ଚଳିତ ବର୍ଷ ମହାପ୍ରଭୁଙ୍କ ଘୋଷଯାତ୍ରା ପରେ ଶ୍ରୀମନ୍ଦିର ସମ୍ପର୍କିତ ବିଭିନ୍ନ ପ୍ରସଙ୍ଗକୁ ନେଇ ଶୁକ୍ରବାର ଛତିଶା ନିଯୋଗର ଏକ ଗୁରୁତ୍ୱପୂର୍ଣ୍ଣ ବୈଠକ ବଡ଼ଦାଣ୍ଡସ୍ଥିତ ନୀଳାଦ୍ରି ଭକ୍ତନିବାସ ପରିସରରେ ଅନୁଷ୍ଠିତ ହୋଇଯାଇଛି। ଏଥିରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ କୁମାର ଦାସ ଅଧ୍ୟକ୍ଷତା କରିଥିଲେ। ତେବେ ଭକ୍ତଙ୍କ ପାଇଁ ଚାରିଦ୍ୱାର ଖୋଲାଯିବା ନେଇ କାୈଣସି ନିଷ୍ପତ୍ତି ହୋଇପାରିନାହିଁ। ସିଂହଦ୍ୱାର ବ୍ୟତୀତ ଅନ୍ୟ କେଉଁ ଦ୍ୱାର ଖୋଲାଯିବ ସେ ନେଇ ବୈଠକରେ କୌଣସି ନିଷ୍କର୍ଷ ବାହାରିପାରିନାହିଁ। ଭକ୍ତଙ୍କ ଶୃଙ୍ଖଳିତ ଦର୍ଶନ ନେଇ ବିସ୍ତୃତ ଭାବେ ଆଲୋଚନା କରାଯିବା ସହ ଅନେକ ମତାମତ ଦିଆଯାଇଥିଲା। ସମସ୍ତଙ୍କ ମତକୁ ନେଇ ଏକ ସବ୍କମିଟି ଗଠନ କରାଯାଇଛି। ତେବେ ଖୁବ୍ଶୀଘ୍ର ପୁରୀବାସୀଙ୍କ ପାଇଁ ପଶ୍ଚିମ କିମ୍ବା ଦକ୍ଷିଣ ଦ୍ୱାର ଖୋଲିବାର ସମ୍ଭାବନା ରହିଥିବା ସୂଚନା ମିଳିଛି। ସେହିପରି ଓବିସିସି ପକ୍ଷରୁ ହେଉଥିବା ପରିକ୍ରମା ପ୍ରକଳ୍ପ କାର୍ଯ୍ୟ ଶୀଘ୍ର ସାରିବାକୁ ପରାମର୍ଶ ଦିଆଯାଇଛି। ଶ୍ରୀମନ୍ଦିର ଚାରିଦ୍ୱାର ଖୋଲାଯିବା ନେଇ ସେବାୟତମାନଙ୍କ ପକ୍ଷରୁ ଭିନ୍ନ ଭିନ୍ନ ପ୍ରସ୍ତାବ ଆସିଥିବାରୁ ସବ୍କମିଟି ବୈଠକରେ ସମସ୍ତ ଦିଗକୁ ନେଇ ତର୍ଜମା କରାଯିବା ପରେ ଯାହା କିଛି ସ୍ପଷ୍ଟ ହେବ। ଶ୍ରୀମନ୍ଦିରରେ ଆସନ୍ତା ବୁଧବାର ବନକଲାଗି କରାଯିବ।
ସମ୍ପର୍କରେ ସୂଚନା ଦେଇ ବରିଷ୍ଠ ସେବକ ହଜୁରୀ କୃଷ୍ଣଚନ୍ଦ୍ର ଖୁଣ୍ଟିଆ କହିଛନ୍ତି, ଭକ୍ତଙ୍କ ପାଇଁ ଶ୍ରୀମନ୍ଦିର ଚାରିଦ୍ୱାର ଖୋଲିବା ନେଇ ଆଲୋଚନା ହୋଇଥିଲା। ସମସ୍ତ ନିଯୋଗ ପକ୍ଷରୁ ଚାରିଦ୍ୱାର ଖୋଲାଯିବା ପାଇଁ ଦାବି କରାଯାଇଥିଲା। ଫଳରେ ସନ୍ଧ୍ୟା ପରେ ଉତ୍ତରଦ୍ୱାର ବନ୍ଦ ହେବା ପରେ ଅନ୍ୟ ତିନିଦ୍ୱାର ଦେଇ ଭକ୍ତମାନେ ଯାଇ ମହାପ୍ରଭୁଙ୍କୁ ପହୁଡ଼ ପର୍ଯ୍ୟନ୍ତ ଦର୍ଶନ କରିପାରିବେ ବୋଲି ମତ ଦିଆଯାଇଥିଲା। ଏହାପରେ ଉପଜିଲାପାଳଙ୍କୁ ନେଇ ୫ଜଣିଆ କମିଟି ଗଠନ କରାଯାଇଛି। ଉକ୍ତ କମିଟି ଚାରି ଦ୍ୱାର ଖୋଲିବା ନେଇ ନିଷ୍ପତ୍ତି ନେବ। ଖୁବ୍ଶୀଘ୍ର ଭକ୍ତମାନେ ଖୁସି ଖବର ପାଇବେ। ପରିକ୍ରମା ମାର୍ଗ କାର୍ଯ୍ୟ ଜାରି ରହିଥିବାରୁ ବର୍ତ୍ତମାନ ଚାରି ଦ୍ୱାର ଖୋଲିଲେ ସମସ୍ୟା ଦେଖାଦେବ। ତେଣୁ ପରିକ୍ରମା ମାର୍ଗ କାର୍ଯ୍ୟ ଶୀଘ୍ର ସାରି ଅଗଷ୍ଟ ଶେଷ ସୁଦ୍ଧା ଚାରି ଦ୍ୱାର ଖୋଲିବା ପାଇଁ ପ୍ରସ୍ତାବ ଦିଆଯାଇଛି। ସେହିପରି ଉପଜିଲାପାଳ ଭବତାରଣ ସାହୁ କହିଛନ୍ତି, ପରିକ୍ରମା ମାର୍ଗ କାର୍ଯ୍ୟ ଚାଲିଥିବାରୁ କେଉଁପଟେ ଭକ୍ତ ଯାଇପାରିବେ ସେ ନେଇ ଗଠିତ ସବ୍କମିଟି ଅନୁଧ୍ୟାନ ତଥା ତର୍ଜମା କରି ରିପୋର୍ଟ ଦେବ। ପରେ ତା’ ଉପରେ ଆଲୋଚନା କରାଯାଇ ନିଷ୍ପତ୍ତି ନିଆଯିବ ବୋଲି ସାହୁ କହିଛନ୍ତି। ଶ୍ରୀମନ୍ଦିର ମୁଖ୍ୟ ପ୍ରଶାସନ ରଞ୍ଜନ କୁମାର ଦାସ କହିଛନ୍ତି, ଭକ୍ତଙ୍କ ସୁନିଶ୍ଚିତ ତଥା ଶୃଙ୍ଖଳିତ ଦର୍ଶନ ଉପରେ ବୈଠକ ଅନୁଷ୍ଠିତ ହୋଇଥିଲା। ଏଥିରେ ବିଭିନ୍ନ ନିଯୋଗର ସଦସ୍ୟମାନେ ଉପସ୍ଥିତ ରହି ସେମାନଙ୍କ ମତାମତ ଦେଇଥିଲେ। ସମସ୍ତଙ୍କ ମତକୁ ନେଇ ଏକ ସବ୍କମିଟି ଗଠନ କରାଯାଇଛି। ଏଥିରେ ଶ୍ରୀମନ୍ଦିର ପରିଚାଳନା କମିଟି ସଦସ୍ୟ, ବରିଷ୍ଠ ସେବାୟତ, ପ୍ରଶାସନିକ ଅଧିକାରୀ ଏବଂ ପୋଲିସ ଅଧିକାରୀ ସଦସ୍ୟ ରହିଛନ୍ତି। ଉକ୍ତ ସବ୍କମିଟି ସ୍ଥିତି ଅନୁଧ୍ୟାନ କରି ରିପୋର୍ଟ ଦେବ। ତେବେ ବର୍ତ୍ତମାନ ସୁଦ୍ଧା କୌଣସି ନିଷ୍ପତ୍ତି ହୋଇନାହିଁ। କମିଟି ସମସ୍ତ ମତାମତକୁ ବିଚାର କରି ଅନୁଧ୍ୟାନ କରିବା ପରେ ରିପୋର୍ଟ ଭିତ୍ତିରେ ପରବର୍ତ୍ତୀ ନିଷ୍ପତ୍ତି ନେବ। ସେହିପରି ମହାପ୍ରଭୁଙ୍କ ବନକଲାଗି ଠିକ୍ ସମୟରେ ଆସନ୍ତା ବୁଧବାର ସମ୍ପନ୍ନ ହେବ ବୋଲି ଦାସ କହିଛନ୍ତି। ବୈଠକରେ ଜିଲାପାଳ ତଥା ଶ୍ରୀମନ୍ଦିର ଉପମୁଖ୍ୟ ପ୍ରଶାସକ ସମର୍ଥ ବର୍ମା, ଏସ୍ପି କନଓ୍ବର ବିଶାଲ ସିଂ, ସମସ୍ତ ନିଯୋଗର ସେବାୟତ ପ୍ରତିନିଧି, ପରିଚାଳନା କମିଟି ସଦସ୍ୟ ଏବଂ ଶ୍ରୀମନ୍ଦିର ପ୍ରଶାସନିକ ଅଧିକାରୀ ଉପସ୍ଥିତ ଥିଲେ।
