ଚେଙ୍ଗ୍ଡ଼ୁ, ୨।୮: ଓ୍ବାଲର୍ଡ ୟୁନିଭର୍ସିଟି ଗେମ୍ସର ଶୁଟିଂ ଇଭେଣ୍ଟରେ ଭାରତୀୟ ଶୁଟରଙ୍କ ପ୍ରଭାବୀ ପ୍ରଦର୍ଶନ ଜାରି ରହିଛି। ମଙ୍ଗଳବାର ଏହି ଇଭେଣ୍ଟରୁ ଭାରତ ଆଉ ୪ ପଦକ ହାସଲ କରିଛି। ଫଳରେ ମୋଟ ୨୧ (୧୧ ସ୍ବର୍ଣ୍ଣ, ୪ ରୌପ୍ୟ, ୬ ବ୍ରୋଞ୍ଜ୍) ପଦକ ସହ ଭାରତ ତାଲିକାର ୪ର୍ଥ ସ୍ଥାନ ଅଧିକାର କରିଛି। ପ୍ରତିଯୋଗିତାର ୪ର୍ଥ ଦିବସରେ ଭାରତ ୧୦ ମିଟର ଏୟାର ପିସ୍ତଲ ପୁରୁଷ ଟିମ୍ ଇଭେଣ୍ଟରୁ ପ୍ରଥମ ପଦକ ହାସଲ କରିଥିଲା। ବରୁଣ ତୋମାର, ଅର୍ଜୁନ ସିଂ ଚିମା ଓ ଅନମୋଲ ଜୈନଙ୍କୁ ନେଇ ଗଠିତ ଭାରତୀୟ ଦଳ ବ୍ରୋଞ୍ଜ ପଦକ ହାସଲ କରିଥିଲେ। ଏଥିରୁ କୋରିଆ ସ୍ବର୍ଣ୍ଣ ଓ ଚାଇନା ରୌପ୍ୟ ପଦକ ପାଇଥିଲା। ୫୦ ମିଟର ରାଇଫଲ ଥ୍ରୀ ପୋଜିଶନ୍ସ ମହିଳା ଇଭେଣ୍ଟରେ ଭାରତୀୟ ବିଶ୍ୱବିଦ୍ୟାଳୟ ଶୁଟରମାନେ ସ୍ବର୍ଣ୍ଣ ଓ ରୌପ୍ୟ ପଦକ ହାସଲ କରିଥିଲେ। ଏଥିରେ ଭାରତର ସିଫ୍ଟ କୌର ଶର୍ମା ସ୍ବର୍ଣ୍ଣ, ଆଶି ଚୌକସେ ରୌପ୍ୟ ଓ ଚାଇନାର ଜେରୁ ଓ୍ବାଙ୍ଗ୍ ବ୍ରୋଞ୍ଜ ପଦକ ପାଇଥିଲେ। ଭାରତୀୟ ମହିଳାମାନେ ଆଧିପତ୍ୟ ବିସ୍ତାର କରି ୫୦ ମିଟର ରାଇଫଲ ଥ୍ରୀ ପୋଜିଶନ ଟିମ୍ ଇଭେଣ୍ଟରେ ସ୍ବର୍ଣ୍ଣ ପଦକ ହାସଲ କରିଥିଲେ। ଭାରତ ପକ୍ଷରୁ ମନିଶ କୌଶିକ, ଆଶି ଚୌକସେ ଓ ସିଫ୍ଟ କୌର ପ୍ରତିନିଧିତ୍ୱ କରିଥିଲେ। ଭାରତୀୟ ଦଳ ଫାଇନାଲରେ ଚାଇନାକୁ ପରାସ୍ତ କରିଥିଲା। ଚେକ୍ ରିପବ୍ଲିକ୍ ବ୍ରୋଞ୍ଜ ପଦକ ପାଇଥିଲା।
ଓ୍ବାଲର୍ଡ ୟୁନିଭର୍ସିଟି ଗେମ୍ସର ଆଥ୍ଲେଟିକ୍ସ ଇଭେଣ୍ଟରେ ଭାରତୀୟ ପ୍ରତିଯୋଗୀମାନେ ଅଭିଯାନ ଆରମ୍ଭ କରିଛନ୍ତି। ମହିଳା ଶଟ୍ପୁଟ୍ରେ ଶିକ୍ଷା ୧୪.୪ ମିଟର ଥ୍ରୋ କରି ଫାଇନାଲ ପାଇଁ ଯୋଗ୍ୟତା ଅର୍ଜନ କରିଛନ୍ତି। ମାତ୍ର ଫେଭରାଇଟ ନିଧି ପାଓ୍ବାୟା ବିଫଳ ହୋଇଛନ୍ତି। ମହିଳା ଲଙ୍ଗ୍ଜମ୍ପରେ ଭାରତର ଭବାନୀ ଯାଦବ ଭଗବତୀ ଫାଇନାଲ୍ସରେ ପ୍ରବେଶ କରିଛନ୍ତି। ୪୦୦ ମିଟର ହର୍ଡଲ୍ସରେ ଦିବ୍ୟା ଜୟରାମ ସେମିଫାଇନାଲରେ ଏବଂ ମହିଳା ୧୦୦ ମିଟର ହିଟ୍ସରେ ଅବନ୍ତିକା ସନ୍ତୋଷ ନରାଲେ ସେମିଫାଇନାଲ ପାଇଁ ଯୋଗ୍ୟତା ଅର୍ଜନ କରିଛନ୍ତି। ବ୍ୟାଡ୍ମିଣ୍ଟନ ମିକ୍ସଡ ଟିମ୍ ଗ୍ରୁପ୍ ‘ସି’ରେ ଭାରତ ୫-୦ରେ ସୁଇଜରଲାଣ୍ଡକୁ ପରାସ୍ତ କରିଛି। ମିକ୍ସଡ ଟିମ୍ କ୍ୱାର୍ଟର ଫାଇନାଲ ମ୍ୟାଚ-୨ରେ ଭାରତ ୩-୦ରେ ବ୍ରାଜିଲକୁ ହରାଇଛି। ଦୀପ୍ ରୋହିତ ରାମ୍ଭିୟାଙ୍କୁ ସାଥିକରି ଓଡ଼ିଶାର ଋତପର୍ଣ୍ଣା ପଣ୍ଡା ଉଭୟ ସୁଇଜରଲାଣ୍ଡ ଓ ବ୍ରାଜିଲ ବିପକ୍ଷରେ ବିଜୟୀ ହୋଇଥିଲେ। ସୁଇଜରଲାଣ୍ଡ ବିପକ୍ଷ ମହିଳା ଡବଲ୍ସରେ ତାଙ୍କର ପାର୍ଟନର ଥିଲେ ଭଉଣୀ ଶ୍ୱେତପର୍ଣ୍ଣା ପଣ୍ଡା। ପଦକ ବିଜୟୀ ଶୁଟରଙ୍କୁ କିଟ୍ ଓ କିସ୍ର ପ୍ରତିଷ୍ଠାତା ତଥା ଏମ୍ପି ଅଚ୍ୟୁତ ସାମନ୍ତ ଅଭିନନ୍ଦନ ଜଣାଇଛନ୍ତି।
