ବ୍ରହ୍ମପୁର ଅଫିସ,୨୬ା୬: କରୋନା ସଂକ୍ରମଣ ରୋକିବା ଦୃଷ୍ଟିରୁ ଜିଲା ପ୍ରଶାସନ ପକ୍ଷରୁ ଶନିବାରଠାରୁ ୪ ଦିନ ପର୍ଯ୍ୟନ୍ତ ବ୍ରହ୍ମପୁର ସମ୍ପୂର୍ଣ୍ଣ ଶଟ୍ଡାଉନ୍ ଘୋଷଣା କରାଯାଇଛି। ଶୁକ୍ରବାର ସକାଳୁ ସହରର ପରିବା ମାର୍କେଟ,ଭେଣ୍ଡିଂ ଜୋନ୍ଗୁଡ଼ିକରେ ଲୋକମାନଙ୍କ ପ୍ରବଳ ଭିଡ଼ ଜମିଥିବାର ଦେଖିବାକୁ ମିଳିଛି । ଶନିବାରଠାରୁ ଆସନ୍ତା ମଙ୍ଗଳବାର ପର୍ଯ୍ୟନ୍ତ ଅତ୍ୟାବଶ୍ୟକ ସାମଗ୍ରୀ ଯଥା ପନିପରିବା, ତେଜରାତି ସମେତ ସମସ୍ତ ପ୍ରକାର ଦୋକାନ ବଜାର ବନ୍ଦ ରହିବ ବୋଲି ଜିଲାପାଳ ସ୍ପଷ୍ଟ କରିଥିଲେ। କେବଳ ଔଷଧ ଦୋକାନ, ସ୍ବାସ୍ଥ୍ୟସେବା ଓ କ୍ଷୀର ଯୋଗାଣ ସହରରେ ଜାରି ରହିବ। ବଜାରରେ ପନିପରିବା ଭଳି ସାମଗ୍ରୀ ମିଳିବ ନାହିଁ ବୋଲି ଲୋକେ ଜାଣିବାକୁ ପାଇଥିଲେ । ଏଣୁ ଶୁକ୍ରବାର ବଡି ଭୋର୍ରୁ ଲୋକମାନେ ବଜାର ସମେତ ରାସ୍ତା ପାର୍ଶ୍ୱରେ ବିକ୍ରି ହେଉଥିବା ପନି ପରିବା ଓ ଭେଣ୍ଡିଂ ଜୋନ୍ରେ ବିଭିନ୍ନ ସାମଗ୍ରୀ କିଣିବାକୁ ଭିଡ଼ ଜମାଇଥିବାର ଦେଖିବାକୁ ମିଳିଛି ।
ସୂଚନାଯୋଗ୍ୟ, ଏପ୍ରିଲ ଶେଷସୁଦ୍ଧା ଗଞ୍ଜାମରେ କେହି ଜଣେ ହେଲେ କରୋନା ପଜିଟିଭ୍ ବାହାରି ନ ଥିଲେ। ପ୍ରବାସୀ ଓଡ଼ିଆଙ୍କ ଆଗମନ ଯୋଗ ପ୍ରଥମେ ମେ’ ୨ରେ ଜିଲାରେ କରୋନା ପଜିଟିଭ୍ ଚିହ୍ନଟ ହୋଇଥିଲା। ବେଶ୍ କିଛିଦିନ ପର୍ଯ୍ୟନ୍ତ କରୋନା ଭୂତାଣୁ ସଙ୍ଗରୋଧ କେନ୍ଦ୍ରରେ ସୀମିତ ଥିଲା। ବ୍ରହ୍ମପୁର ସହର ଭିତରେ କୌଣସି ସ୍ଥାନରେ ସଙ୍ଗରୋଧ କେନ୍ଦ୍ର କରାଯାଇ ନ ଥିବାରୁ ଏହି ସହର କରୋନାଠାରୁ ବହୁ ଦୂରରେ ରହିଥିଲା। ଏବେ ଆଉ ସ୍ଥିତି ନାହିଁ। ବର୍ତ୍ତମାନ କରୋନା ସଙ୍ଗରୋଧ କେନ୍ଦ୍ରରୁ ବାହାରି ଗଳିକନ୍ଦିରେ ସଂକ୍ରମିତ କରିଛି । ସଂକ୍ରମଣ ରୋକିବାକୁ ବ୍ୟାପକ ପଦକ୍ଷେପ ସତ୍ତ୍ୱେ ବ୍ରହ୍ମପୁରରେ କରୋନା କାୟା ବିସ୍ତାର କରି ଚାଲିଛି। ଗୋଟିଏ ଦିନରେ ୫୦ କରୋନା ପଜିଟିଭ୍ ବାହାରିଛନ୍ତି। ଏହାକୁ ଦୃଷ୍ଟିରେ ଜିଲା ପ୍ରଶାସନ ପକ୍ଷରୁ ଏଭଳି କଡ଼ା ପଦକ୍ଷେପ ନିଆଯାଇଛି ।
