ଢେଙ୍କାନାଳ,୧୮ା୭(ରତନ ନାୟାର): ଢେଙ୍କାନାଳ ଜିଲା ହିନ୍ଦୋଳ ରେଞ୍ଜ୍ ପାଇକ ପୁରୁଣାକୋଟ ଗ୍ରାମ ରାସ୍ତାରେ ୨ଦିନ ହେବ ୩୮ ହାତୀ ଚଳପ୍ରଚଳ କରୁଥିବାରୁ ଅଞ୍ଚଳବାସୀ ଓ ଯାତ୍ରୀମାନେ ଆତଙ୍କିତ ଅବସ୍ଥାରେ ଅଛନ୍ତି। ଏହି ହାତୀପଲ ଅନୁଗୋଳ ଜିଲା ବନ୍ତଳା ଅଞ୍ଚଳରୁ ହିନ୍ଦୋଳ ରେଞ୍ଜ ଆଡକୁ ଆସି ପୁଣି ଏଠାରୁ ବନ୍ତଳା ଆଡକୁ ଫେରି ଯାଉଛନ୍ତି। ହାତୀ ପଲଙ୍କୁ ରାସ୍ତାରେ ଦେଖି ଉକ୍ତ ଅଞ୍ଚଳର କେତେଜଣ ନାବାଳକ ପଥର ଧରି ଘଉଡାଇବାରୁ ହାତୀପଲ ଉତ୍ତ୍ୟକ୍ତ ହୋଇ ସେମାନଙ୍କୁ ପାଲଟା ଆକ୍ରମଣ କରିଥିଲେ। ଖବରପାଇ ବନ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ହାତୀମାନଙ୍କୁ ଚିଡ଼ାଉଥିବା ୨ ନାବାଳକଙ୍କୁ ଅଟକ ରଖିଥିଲେ। ପରେ ଅଣ୍ଡରଟେକିଂ ରଖାଯାଇ ସେମାନଙ୍କୁ ଛାଡ଼ିଦିଆଯାଇଥିଲା। ରାସ୍ତାରେ ଚଳପ୍ରଚଳ କରୁଥିବା ଉକ୍ତ ହାତୀ ପଲ ଉପରେ ବନ କର୍ମଚାରୀମାନେ ଦୃଷ୍ଟି ରଖିଛନ୍ତି। ବନ୍ତଳା ରେଞ୍ଜରୁ ଏହି ହାତୀ ଆସିଥିବା ହିନ୍ଦୋଳ ରେଞ୍ଜର ଲୋହିତ ରଥ ସୂଚନା ଦେଇଛନ୍ତି।
