କଟକ ଅଫିସ,୨୬ା୯: ରାଜ୍ୟର ୧୬ଟି ଜିଲାରେ ୩୪ ନୂତନ ସିଭିଲ ଜଜ୍ କୋର୍ଟ (ଜୁନିୟର ଡିଭିଜନ) ତଥା ଜେଏମ୍ଏଫ୍ସି ପ୍ରତିଷ୍ଠା ହେବ। ଏଥିପାଇଁ ଉକ୍ତ ଜିଲାଗୁଡ଼ିକର ଜିଲା ଓ ସେସନ୍ସ ଜଜ୍ମାନଙ୍କୁ ଅକ୍ଟୋବର ୧୦ ତାରିଖ ସୁଦ୍ଧା ରିପୋର୍ଟ ଦାଖଲ କରିବାକୁ ହାଇକୋର୍ଟ ପକ୍ଷରୁ ନିର୍ଦ୍ଦେଶ ଦିଆଯାଇଛି। ନୂତନ କୋର୍ଟ କାର୍ଯ୍ୟ କରିବା ପାଇଁ ଆବଶ୍ୟକ ଭିତ୍ତିଭୂମି ସ୍ବରୂପ ଡାଏସ୍ ସହିତ କୋର୍ଟ ହଲ୍, ସାକ୍ଷ୍ୟ କୋଠରି, ମହିଳା ଓ ପୁରୁଷଙ୍କ ପାଇଁ ପୃଥକ୍ ହାଜତ, ଟଏଲେଟ୍, ଅଫିସ, ପ୍ରିଜାଇଡିଂ ଅଧିକାରୀଙ୍କ ଚ୍ୟାମ୍ବର ସହିତ ବାସଗୃହ (ସରକାରୀ କିମ୍ବା ବେସରକାରୀ) ବ୍ୟବସ୍ଥା ସମ୍ପର୍କରେ ରିପୋର୍ଟ ଉଲ୍ଲେଖ କରିବାକୁ ନିର୍ଦ୍ଦେଶ ରହିଛି। ରିପୋର୍ଟ ହସ୍ତଗତ ହେବା ପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ନିର୍ଦ୍ଦେଶନାମାରେ ସ୍ପଷ୍ଟ କରାଯାଇଛି।
ବାଲେଶ୍ୱର ଜିଲାର ଔପଦା, ଖଇରା, ବରଗଡ଼ ଜିଲାର ଗାଇସିଲଟ, ପାଇକମାଳ, ବିଜେପୁର, ଭଦ୍ରକ ଜିଲାର ବନ୍ତ, କଟକ ଜିଲାର ନିଶ୍ଚିନ୍ତକୋଇଲି, ଡମପଡ଼ା, ମାହାଙ୍ଗା, ଗଞ୍ଜାମ ଜିଲାର ବେଲଗୁଣ୍ଠା, ଯାଜପୁର ଜିଲାର ବରିପାଲ, ସୁକିନ୍ଦା, ବିଞ୍ଝାରପୁର, ଝାରସୁଗୁଡ଼ା ଜିଲାର ଲାଇକେରା, କିରିମିରା, କଳାହାଣ୍ଡି ଜିଲାର ଗୋଲମୁଣ୍ଡା, ଲାଞ୍ଜିଗଡ଼, କନ୍ଧମାଳ ଜିଲାର ରାଇକିଆ, ଚକାପାଦ, କେଉଁଝର ଜିଲାର ଘଟଗଁା, ଖୋର୍ଦ୍ଧା ଜିଲାର ବୋଲଗଡ଼, ବେଗୁନିଆ, ବାଲିଅନ୍ତା, ବାଲିପାଟଣା, କୋରାପୁଟ ଜିଲାର ନନ୍ଦପୁର, ନାରାୟଣପାଟଣା, ବୈପାରୀଗୁଡ଼ା, ନୟାଗଡ଼ ଜିଲାର ଗଣିଆ, ପୁରୀ ଜିଲାର କୃଷ୍ଣପ୍ରସାଦ, କାକଟପୁର, ରାୟଗଡ଼ା ଜିଲାର ଚନ୍ଦ୍ରପୁର, ମୁନିଗୁଡ଼ା ଓ ସୁନ୍ଦରଗଡ଼ ଜିଲାର କୋଇଡା(ବଣାଇ), ଲହୁଣିପଡ଼ାରେ ନୂତନ ସିଭିଲ ଜଜ୍ କୋର୍ଟ ପ୍ରତିଷ୍ଠା ନିମନ୍ତେ ପ୍ରକ୍ରିୟା ଆରମ୍ଭ ହୋଇଥିବା ଜଣାପଡିଛି।
