ନୂଆଦିଲ୍ଲୀ,୨୧।୧ : ବିବିସିର ଇଣ୍ଡିଆ: ଦ ମୋଦି କୋଶ୍ଚିନ ଡକ୍ୟୁମେଣ୍ଟାରୀ ସିରିଜକୁ ନେଇ ବିବାଦ ବଢ଼ିବାରେ ଲାଗିଛି। ବର୍ତ୍ତମାନ ଅବସରପ୍ରାପ୍ତ ବିଚାରପତି, ଅବସରପ୍ରାପ୍ତ ଅମଲାତନ୍ତ୍ର ଏବଂ ଅବସରପ୍ରାପ୍ତ ସଶସ୍ତ୍ର ବାହିନୀର ଭେଟେରାନଙ୍କ ସମେତ ୩୦୦ ରୁ ଅଧିକ ପ୍ରତିଷ୍ଠିତ ଭାରତୀୟ ଏକ ବିବୃତ୍ତିରେ ଦସ୍ତଖତ କରି ଭାରତ ତଥା ଏହାର ନେତାଙ୍କ ପ୍ରତି ପକ୍ଷପାତ ପ୍ରଦର୍ଶନ କରାଯାଇଥିବା କହି ଡକ୍ୟୁମେଣ୍ଟାରୀର ତଥ୍ୟକୁ ଖଣ୍ଡନ କରିଛନ୍ତି।
ସେମାନଙ୍କ ମଧ୍ୟରେ ୧୩ ଜଣ ଅବସରପ୍ରାପ୍ତ ବିଚାରପତି, ୧୩୩ ପୂର୍ବତନ ସରକାରୀ ଅଧିକାରୀ ଏବଂ ୧୫୬ ପୂର୍ବତନ ସୈନିକ ଅଛନ୍ତି।
ବିବୃତ୍ତିରେ କୁହାଯାଇଛି ଯେ ଆମେ ଏପର୍ଯ୍ୟନ୍ତ ଯାହା ଦେଖିଛୁ ତାହା ଉପରେ ଆଧାର କରି ବିବିସିର ସିରିଜ କେବଳ ବିଭ୍ରାନ୍ତିକର ରିପୋର୍ଟ ଉପରେ ଆଧାରିତ ନୁହେଁ ବରଂ ଏକ ସ୍ବାଧୀନ, ଗଣତାନ୍ତ୍ରିକ ରାଷ୍ଟ୍ର ଭାବରେ ଭାରତର ୭୫ ବର୍ଷ ପୁରୁଣା ଇତିହାସକୁ ମଧ୍ୟ ପ୍ରଶ୍ନ କରିଛି। ପୁଣି ଥରେ ବିବିସି ଭାରତ ପ୍ରତି ନକାରାତ୍ମକତା ଏବଂ ପକ୍ଷପାତିତା ଏକ ଡକ୍ୟୁମେଣ୍ଟାରୀ ଆକାରରେ ସାମ୍ନାକୁ ଆସିଛି।
ଜଣେ ଦେଶପ୍ରେମୀଙ୍କ ବିରୋଧରେ ଏହା ଏକ ଉଦ୍ଦେଶ୍ୟମୂଳ ଚାର୍ଜଶିଟ ବୋଲି ସେମାନେ କହିଛନ୍ତି।
ବିଶିଷ୍ଟ ଭାରତୀୟ କହିଛନ୍ତି ଯେ ଏହି ଡକ୍ୟୁମେଣ୍ଟାରୀ ହେଉଛି ଆମର ନେତା, ସାଥୀ ଭାରତୀୟ ତଥା ଦେଶପ୍ରେମୀ ବିରୁଦ୍ଧରେ ଏକ ଷଡ଼ଯନ୍ତ୍ର।ଆପଣ ଜଣେ ଭାରତୀୟ ଭାବରେ କାହାକୁ ଭୋଟ ଦେଇଥାନ୍ତୁ ନା କାହିଁକି, ଭାରତର ପ୍ରଧାନମନ୍ତ୍ରୀ ହେଉଛନ୍ତି ଆମ ଦେଶ, ଆମ ଦେଶର ପ୍ରଧାନମନ୍ତ୍ରୀ। ଆମେ କାହାକୁ ଜାଣିଶୁଣି ପକ୍ଷପାତିତା ଏବଂ ସେମାନଙ୍କ ବିରୁଦ୍ଧରେ ଖାଲି ଯୁକ୍ତି ଦେଖାଇବାକୁ ଅନୁମତି ଦେଇ ପାରିବୁ ନାହିଁ। ଦସ୍ତଖତକାରୀମାନେ ବିବିସି ଡକ୍ୟୁମେଣ୍ଟାରୀର ମୂଳ ଉତ୍ସ ଉପରେ ମଧ୍ୟ ପ୍ରଶ୍ନ କରିଛନ୍ତି। ଏହାସହ କହିଛନ୍ତି ଯେ ଏହି ସବୁ ଅଭିଯୋଗକୁ ଭାରତର ସର୍ବୋଚ୍ଚ ନ୍ୟାୟାଳୟ ପ୍ରତ୍ୟାଖ୍ୟାନ କରିଛନ୍ତି। ଏହା ସୁପ୍ରିମକୋର୍ଟଙ୍କ ନିଷ୍ପତ୍ତିର ବିରୁଦ୍ଧାଚରଣ। କେବଳ ବ୍ରିଟିଶ ଗଣମାଧ୍ୟମ ଏହା କରିଥିବାରୁ ଏହାକୁ ବିଶ୍ୱାସ କରାଯିବା ଉଚିତ କି?
