୬ ବର୍ଷ ପରେ ବି ମିଳୁନି ଜମି ଅଧିଗ୍ରହଣ କ୍ଷତିପୂରଣ: ରାସ୍ତା ଅବରୋଧ କଲେ ଜମିହରା
8:32 pmJanuary 21, 2023January 21, 2023 / 05

କୋକସରା,୨୧ା୧(ଡି.ଏନ୍‌.ଏ.): କଳାହାଣ୍ଡି ଜିଲା ଆମପାଣିଠାରୁ ଧର୍ମଗଡ଼ ଦେଇ ନିର୍ମାଣାଧୀନ ବିଜୁ ଏକ୍ସପ୍ରେସ ଓ୍ବେ ପାଇଁ ଭୁର୍ଷାଗୁଡ଼ା ଗ୍ରାମର ବନମାଳୀ ମାଝି, ପରୀକ୍ଷିତ ମାଝି, ରିକ ମାଝି, ଔରତ ମାଝି, ସୋମନାଥ ମାଝି, ପୁରୁଷୋତ୍ତମ ମାଝି, ନୀଳକଣ୍ଠ ମାଝି ପରିବାର ପ୍ରାୟ ୧୧ ଏକର ଜମି ହରାଇଥିବା ବେଳେ ଆଜିକୁ ୬ ବର୍ଷ ପରେ ମଧ୍ୟ ଜମି ଅଧିଗ୍ରହଣ ପରେ କ୍ଷତିପୂରଣ ମିଳି ନ ଥବାରୁ ଶନିବାର ରାସ୍ତା ଅବରୋଧ କରିଛନ୍ତି। ଭୁର୍ଷାଗୁଡ଼ା ନିକଟରେ ଅପରାହ୍ନରେ ୩ ଘଣ୍ଟାରୁ ଅଧିକ ସମୟ ଧରି ଜମିହରାମାନେ ରାସ୍ତାରେ କଣ୍ଟା ଓ ଗଛ ପକାଇ ରାସ୍ତା ଅବରୋଧ କରିଥିଲେ। ଫଳରେ ଏହି ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଥିଲା। ଖବର ପାଇ ଘଟଣାସ୍ଥଳରେ ଆମପାଣି ଓ କୋକସରା ପୋଲିସ ପହଞ୍ଚି ଆନ୍ଦୋଳନରେ ବସିଥିବା ପରିବାର ସହ ଆଲୋଚନା ଜାରି ରଖିଥିଲେ। ତେବେ ସେମାନେ କୌଣସି ପ୍ରତିଶ୍ରୁତି ନ ମିଳିବା ପର୍ଯ୍ୟନ୍ତ ରାସ୍ତାରୁ ହଟିବୁ ନାହିଁ ବୋଲି ଜିଦ୍‌ କରିଥିଲେ।  ପୋଲିସ ବୁଝଶୁଝା କଲା ପରେ ରାସ୍ତା ଅବରୋଧରୁ ଉଠିଥିବା ନେଇ କୋକସରା ଥାନା ଅଧିକାରୀ ପ୍ରସନ୍ନ କୁମାର ବେହେରା ସୂଚନା ଦେଇଛନ୍ତି। ଅନ୍ୟପଟେ ପୂର୍ତ୍ତ ବିଭାଗର କନିଷ୍ଠ ଯନ୍ତ୍ରୀ ନବକିଶୋର ବେହେରାଙ୍କୁ ପଚାରିବାରୁ ଅଧିଗ୍ରହଣ ହୋଇଥିବା ଜମି ଦଖଲ ଉପରେ ତହସିଲରୁ କୌଣସି ରିପୋର୍ଟ ଆସିନାହିଁ। ଏଣୁ କ୍ଷତିପୂରଣ ମିଳିନାହିଁ ବୋଲି କହିଛନ୍ତି।