ବେଜିଂ,୨୧।୧୨ : ଚାଇନାରେ କରୋନା ସଂକ୍ରମଣ କାୟା ବିସ୍ତାର କରୁଛି। ହଂକଂ ପୋଷ୍ଟର ଖବର ଅନୁଯାୟୀ ଚାଇନା ସରକାର କରୋନା ମୁକାବିଲା ପାଇଁ ସମ୍ପୂର୍ଣ୍ଣ ଭାବେ ପ୍ରସ୍ତୁତ ନାହାନ୍ତି। କାରଣ ସାରା ଦେଶରେ ଜନ ବିରୋଧ ପରେ ସରକାର ଶୂନ-କୋଭିଡ ନୀତି ହଠାତ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି।
କରୋନା କାରଣରୁ ମୃତ୍ୟୁ ସଂଖ୍ୟା ଉପରେ ମଧ୍ୟ ଚାଇନା ସରକାର ତଥ୍ୟ ପ୍ରକାଶ ନେଇ ଚୁପ ଅଛନ୍ତି। ଏହା ସତ୍ତ୍ୱେ ଚାଇନାର ପ୍ରଶାସନିକ ଅଧିକାରୀମାନେ ଆସନ୍ତା ମାସରେ କରେନା ସଂକ୍ରମଣର ଲହର ବିଷୟରେ ଚେତାବନୀ ଦେଇଛନ୍ତି। ଆସନ୍ତା ୩ ମାସ ମଧ୍ୟରେ ଦେଶରେ ୩ଟି ଲହର ଆସିବାର ଆଶଙ୍କା ନେଇ ସେମାନେ ସତର୍କ ସୂଚନା ଜାରି କରିଛନ୍ତି।
ଚାଇନାର ରୋଗ ନିୟନ୍ତ୍ରଣ ଏବଂ ନିରାକରଣ କେନ୍ଦ୍ରର ମୁଖ୍ୟ ମହାମାରୀ ବିଶେଷଜ୍ଞ ୱୁ ଜୁନିୟୁ ବେଜିଂରେ ଏକ ଗଣମାଧ୍ୟମ ସମ୍ମିଳନୀରେ କହିଛନ୍ତି ଯେ ବର୍ତ୍ତମାନର ସଂକ୍ରମଣ ଚଳିତ ଶୀତରେ ଏହାର ଶିଖରରେ ପହଞ୍ଚିବ ଏବଂ ତିନି ଲହର ଆସନ୍ତା ତିନିମାସ ପର୍ଯ୍ୟନ୍ତ ଦେଶରେ ଜାରି ରହିବ। ସରକାରୀ ଗଣମାଧ୍ୟମରେ ପ୍ରକାଶିତ ରିପୋର୍ଟକୁ ଉଦ୍ଧୃତ କରି ହଂକଂ ପୋଷ୍ଟ ଏହି ଖବର ପ୍ରକାଶ କରିଛି।
ୱୁ ଜୁନିୟୁଙ୍କ ଅନୁଯାୟୀ, ପ୍ରଥମ ଲହର ବର୍ତ୍ତମାନ ଠାରୁ ଜାନୁୟାରୀ ମଧ୍ୟଭାଗ ପର୍ଯ୍ୟନ୍ତ ଚାଲିବ । ଦ୍ୱିତୀୟ ଲହର ଖୁବ ଶୀଘ୍ର ଅଜାନୁଆରୀ ୨୧ ବେଳକୁ. ଆରମ୍ଭ ହୋଇପାରେ।
ରିପୋର୍ଟ ଅନୁଯାୟୀ, ୱୁ ଜୁନିୟୁ ପୂର୍ବାନୁମାନ କରିଛନ୍ତି ଯେ ଲୋକମାନେ ଛୁଟିରୁ କାମକୁ ଫେରିବା ପରେ ଫେବୃଆରୀ ଶେଷରୁ ମାର୍ଚ୍ଚ ମଧ୍ୟଭାଗରେ ଚାଇନା ଏକ ତୃତୀୟ ଲହରର ସମ୍ମୁଖୀନ ହେବ। ଜାନୁଆରୀ ୨୧ରେ ପଡୁଥିବା ଚନ୍ଦ୍ର ନବ ବର୍ଷ ଛୁଟି ପୂର୍ବରୁ ଲହର ଆରମ୍ଭ ହେବ ବୋଲି ଆଶା କରାଯାଉଛି, କାରଣ ଏହି ସମୟରେ ଅନେକ ଲୋକ ନିଜ ଛୁଟି ବିତାଇବାକୁ ଘରକୁ ଆସିଥାନ୍ତି।
