ଖାର୍ତୁମ/ନୂଆଦିଲ୍ଲୀ,୨୨।୪: ଉତ୍ତର-ପୂର୍ବ ଆଫ୍ରିକୀୟ ରାଷ୍ଟ୍ର ସୁଦାନରେ ସେନା ଜେନେରାଲ ଓ ବିଦ୍ରୋହୀ ଅର୍ଦ୍ଧସାମରିକ ବଳ ମଧ୍ୟରେ ଶନିବାରଠାରୁ ଚାଲିଥିବା ସଂଘର୍ଷ ଗମ୍ଭୀର ସ୍ଥିତି ଉପୁଜାଇଛି। ବିଶ୍ୱ ସ୍ବାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ) ଅନୁସାରେ ସୁଦାନର ସାମରିକ ସଂଘର୍ଷରେ ୪୧୩ ଜଣଙ୍କ ମୃତ୍ୟୁ ଘଟିଥିବାବେଳେ ୩,୫୦୦ ଆହତ ହୋଇଛନ୍ତି। ଦେଶରେ ସାମରିକ ଶାସନ ପାଇଁ ସୁରକ୍ଷା ବଳ ପ୍ରତିଶ୍ରୁତିବଦ୍ଧ ଥିବା ସେନା କମାଣ୍ଡର ଅବ୍ଦେଲ ଫତ୍ତାହ ଅଲ୍-ବୁର୍ହାନ୍ କହିଛନ୍ତି। ରାପିଡ୍ ସପୋର୍ଟ ଫୋର୍ସ (ଆର୍ଏସ୍ଏଫ୍) ସହିତ କୌଣସି ପ୍ରକାର ଆଲୋଚନା କରିବା ଆମତ୍ସମର୍ପଣ ସହ ସମାନ ବୋଲି କହିବା ସହ ଏପରି ସମ୍ଭାବନାକୁ ସେ ଏଡ଼ାଇଦେଇଛନ୍ତି। ଅନ୍ୟପକ୍ଷେ ଶୁକ୍ରବାର ସକାଳ ୬ଟାରୁ ୭୨ ଘଣ୍ଟିଆ ଅସ୍ତ୍ରବିରତି ପାଇଁ ପ୍ରସ୍ତୁତ ଥିବା ଅର୍ଦ୍ଧସାମରିକ ଆର୍ଏସ୍ଏଫ୍ କହିଛି। କିନ୍ତୁ ରାଜଧାନୀ ଖାର୍ତୁମ ଓ ଆଖପାଖ ଅଞ୍ଚଳରେ ଏବେ ବି ଗୁଳିଗୋଳାର ଶବ୍ଦ ଶୁଣିବାକୁ ମିଳୁଛି।
୨୦୧୯ରେ ସୁଦାନର ପୂର୍ବତନ ରାଷ୍ଟ୍ରପତି ଓମାର ଅଲ୍-ବଶିରଙ୍କ ଅମଳରେ ସରକାର ବିରୋଧୀ ଆନ୍ଦୋଳନ ମୁଣ୍ଡ ଟେକିଥିଲା। ବିଦ୍ରୋହ ଯୋଗୁ ସାମରିକ ଅଧିକାରୀରୁ ରାଜନେତା ସାଜିଥିବା ଅଲ୍-ବଶିର ସରକାରଙ୍କ ପତନ ପରେ ଦୁର୍ନୀତି ମାମଲାରେ ତାଙ୍କୁ ଜେଲ ପଠାଇ ଦିଆଯାଇଥିଲା। ପରବର୍ତ୍ତୀ ସମୟରେ ନାଗରିକ ଗଣତନ୍ତ୍ର ପ୍ରତିଷ୍ଠା ଉଦ୍ୟମ ହୋଇଥିଲା। ଏନେଇ ଚାଲିଥିବା ଅନ୍ତର୍ଜାତୀୟ ଉଦ୍ୟମ ବିଫଳ ହେବା ପରେ ଶନିବାରଠାରୁ ଆର୍ଏସ୍ଏଫ୍ ଏବଂ ସୁଦାନ ସେନା ମୁହଁାମୁହଁି ଅବସ୍ଥାରେ ରହିଛନ୍ତି। ସାମରିକ ସଂଘର୍ଷରେ ୪୦୦ରୁ ଊର୍ଦ୍ଧ୍ୱ ଜଣଙ୍କ ଜୀବନ ଗଲାଣି। ଅନୂ୍ୟନ ୩,୫୦୦ ଜଣ ଆହତ ହୋଇଥିବା ଡବ୍ଲ୍ୟୁଏଚ୍ଓ ମୁଖପାତ୍ର ମାର୍ଗାରେଟ୍ ହାରିସ୍ ସୂଚନା ଦେଇଛନ୍ତି। ଜେନେଭାରେ ଏକ ଖବରଦାତା ସମ୍ମିଳନୀକୁ ସମ୍ବୋଧିତ କରି ମାର୍ଗାରେଟ୍ କହିଛନ୍ତି, ମୃତକଙ୍କ ମଧ୍ୟରୁ ୯ ଓ ଆହତଙ୍କ ଭିତରୁ ୫୦ ଜଣ ହେଉଛନ୍ତି ଶିଶୁ। ଇତିମଧ୍ୟରେ ବିଶ୍ୱ ଖାଦ୍ୟ କାର୍ଯ୍ୟକ୍ରମର ସୁଦାନ ନିର୍ଦ୍ଦେଶକ ପିଏରେ ହୋନ୍ନୋରାଟ୍ ଚାଦ୍ରେ କହିଛନ୍ତି, ପଡ଼ୋଶୀ ଦେଶଗୁଡ଼ିକରୁ ଶରଣାର୍ଥୀମାନଙ୍କ ଆଗମନ ବଢ଼ୁଥିବାରୁ ସେମାନଙ୍କ ସଂଖ୍ୟା ୬ ଲକ୍ଷ ଟିପିଛି। ଏଥିଲାଗି ଅଧିକ ଅନ୍ତର୍ଜାତୀୟ ସହାୟତାର ଆବଶ୍ୟକତା ବଢ଼ିବାରେ ଲାଗିଛି। ବାସ୍ତବରେ ଏହା ଏକ ବଡ଼ ଚ୍ୟାଲେଞ୍ଜ। ସ୍ଥିତି ସଙ୍କଟପୂର୍ଣ୍ଣ ଥିବାରୁ ଅନେକ ଦେଶ ନିଜ ନାଗରିକଙ୍କୁ ସୁରକ୍ଷିତ ଭାବେ ଫେରାଇ ନେବା ପାଇଁ ଉଦ୍ୟମ ଚଳାଇଛନ୍ତି। ସୁଦାନ ପ୍ରତିରକ୍ଷା ମନ୍ତ୍ରଣାଳୟ ମଧ୍ୟ ପ୍ରତ୍ୟର୍ପଣ ପାଇଁ ତାଲିକା ପ୍ରସ୍ତୁତ କରୁଛି। ଚାଦ୍କୁ ପ୍ରାୟ ୨୦ ହଜାର ଲୋକ ପଳାୟନ କଲେଣି। ହିଂସା ପ୍ରଭାବିତ ସୁଦାନରେ ଫସିରହିଥିବା ୩,୦୦୦ରୁ ଊର୍ଦ୍ଧ୍ୱ ଭାରତୀୟଙ୍କୁ ସ୍ବଦେଶକୁ ଫେରାଇ ଆଣିବା ପାଇଁ ବିଭିନ୍ନ ରାଷ୍ଟ୍ର ସହ ଯୋଗାଯୋଗ କରାଯାଉଛି। ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ଜାତିସଂଘ ମହାସଚିବ ଆଣ୍ଟୋନିଓ ଗୁଟେରସ୍ଙ୍କ ସହ ବିଗୁଡ଼ୁଥିବା ସ୍ଥିତି ଉପରେ ଆଲୋଚନା କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ଭିଡିଓ କନ୍ଫରେନ୍ସ ଜରିଆରେ ଏକ ଉଚ୍ଚସ୍ତରୀୟ ବୈଠକରେ ସ୍ଥିତି ସମ୍ପର୍କରେ ସମୀକ୍ଷା କରିଛନ୍ତି। ସେଠାରେ ଫସିଥିବା ଭାରତୀୟମାନଙ୍କୁ ସୁରକ୍ଷିତ ଭାବେ ଆଣିବା ପାଇଁ ଏକ ଜରୁରୀ ଯୋଜନା ପ୍ରସ୍ତୁତ କରିବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଉକ୍ତ ବୈଠକରେ ଜୟଶଙ୍କର, ଜାତୀୟ ସୁରକ୍ଷା ପରାମର୍ଶଦାତା (ଏନ୍ଏସ୍ଏ) ଅଜିତ୍ ଡୋଭାଲ, ସୁଦାନରେ ଭାରତୀୟ ରାଷ୍ଟ୍ରଦୂତ ରବୀନ୍ଦ୍ର ପ୍ରସାସ ଜୟସ୍ବାଲ ଓ ଅନ୍ୟ ଅଧିକାରୀମାନେ ସାମିଲ ହୋଇଥିଲେ।
