ବିଧବା ମା’ଙ୍କୁ ଘରୁ ତଡ଼ିଦେଲେ ୩ ପୁଅ
8:04 amApril 3, 2023April 3, 2023

ବରୀ,୩ା୪(ଡି.ଏନ.ଏ.): ଯାଜପୁର ଜିଲା ବରୀ ରାମଚନ୍ଦ୍ରପୁର ଥାନା ଅଧୀନ ଭଅଁରା ପଞ୍ଚାୟତର ଜଣେ ବିଧବା ସଜନୀ କରଙ୍କୁ ତାଙ୍କ ୩ ପୁଅ ଘରୁ ତଡ଼ି ଦେଇଥିବା ଅଭିଯୋଗ ହୋଇଛି। ଏବେ ସଜନୀଙ୍କୁ ଯାଜପୁର ଜିଲା ମହିଳା ସହାୟତା କେନ୍ଦ୍ରରେ ରଖାଯାଇଛି। ପୁଅମାନେ ଅଣଦେଖା କରିବାରୁ ସଜନୀ ପୁତୁରାଙ୍କ ଘରେ ଆଶ୍ରୟ ନେଇଥିଲେ। ମାତ୍ର ପୁତୁରାଙ୍କ ପରିବାର ତାଙ୍କୁ ଦୀର୍ଘଦିନ ଧରି ରଖିବାକୁ ଅକ୍ଷମତା ପ୍ରକାଶ କରିବାରୁ ସେ ଅସହାୟ ହୋଇପଡ଼ିଥିବା ରବିବାର ପୋଲିସ ଆଗରେ ପ୍ରକାଶ କରିଛନ୍ତି।
ସଜନୀଙ୍କ ଚାରି ପୁଅ ମଧ୍ୟରୁ ଜଣକର ମୃତ୍ୟୁ ହୋଇଛି। ୩ ପୁଅ ବିଗତ ଦିନରେ ମା’ଙ୍କୁ ପାଖରେ ନ ରଖିବାରୁ ସେ ଥାନାର ଦ୍ୱାରସ୍ଥ ହୋଇଥିଲେ। ଥାନା ଅଧିକାରୀଙ୍କ ଉପସ୍ଥିତିରେ ୩ ପୁଅ ତାଙ୍କୁ ପାଳିକରି ୪ ମାସ ଲେଖା ରଖିବା ପାଇଁ ପ୍ରତିଶ୍ରୁତି ଦେବା ପରେ ଘଟଣାର ଆପୋଷ ସମାଧାନ ହୋଇଥିଲା। ମାତ୍ର ୩ ପୁଅଙ୍କ ମଧ୍ୟରେ ତିକ୍ତତା ଯୋଗୁ ସଜନୀ ଅସହାୟ ହୋଇ ପଡ଼ିଥିଲେ। ଏକଥା ଜାଣିବା ପରେ ତାଙ୍କ ଝିଅ ଜିଲା ମହିଳା ସହାୟତା କେନ୍ଦ୍ରକୁ ଫୋନ୍‌ କରିଥିଲେ। ଖବର ପାଇ ଏହି କେନ୍ଦ୍ରର ନିବେଦିତା ଶରଣ, ରଞ୍ଜିତା ବାରିକ ପହଞ୍ଚତ୍ ସଜନୀଙ୍କୁ ଉଦ୍ଧାର କରିବା ପରେ ଥାନାକୁ ଆଣି ଥାନା ଅଧିକାରୀଙ୍କ ସହ ଘଟଣା ସମ୍ପର୍କରେ ଆଲୋଚନା କରିଥିଲେ। ନିରାଶ୍ରୟ ସଜନୀ ଶନିବାର ରାତିରୁ ଖାଇ ନ ଥିବା ଥାନା ଅଧିକାରୀଙ୍କ ନିକଟରେ ପ୍ରକାଶ କରିଥିଲେ। ପରେ ଥାନା ଅଧିକାରୀ ମନୋଜ କୁମାର ସ୍ବାଇଁ ତାଙ୍କୁ ବିସ୍କୁଟ ଖାଇବାକୁ ଦେବା ସହ ତାଙ୍କ ଦୁଃଖ କଥା ଶୁଣି ଭାବବିହ୍ବଳ ହୋଇ ପଡ଼ିଥିଲେ। ଏ ସମ୍ପର୍କରେ ଥାନା ଅଧିକାରୀ ସ୍ବାଇଁଙ୍କୁ ପଚାରିବାରେ ସେ କହିଛନ୍ତି, ମହିଳା ସହାୟତା କେନ୍ଦ୍ର ତରଫରୁ ସଜନୀଙ୍କୁ ଥାନାକୁ ଅଣାଯାଇଥିଲା। ତାଙ୍କର ରହିବା ଖାଇବାର ଦାୟିତ୍ୱ ଉକ୍ତ କେନ୍ଦ୍ର ପକ୍ଷରୁ ନିଆଯିବାକୁ କୁହାଯିବାରୁ ସଜନୀଙ୍କୁ ତାଙ୍କ ଦାୟିତ୍ୱରେ ଛଡ଼ାଯାଇଛି। ମହିଳା ସହାୟତା କେନ୍ଦ୍ରର ମୁଖ୍ୟ ପରିଚାଳକ ନିବେଦିତା ଶରଣଙ୍କୁ ଫୋନଯୋଗେ ପଚାରିବାରେ ସେ କହିଛନ୍ତି, ଥାନା ମାଧ୍ୟମରେ ସଜନୀଙ୍କୁ ଆମେ ଦାୟିତ୍ୱରେ ଆଣିଛୁ। ତାଙ୍କର ସ୍ବାସ୍ଥ୍ୟ ବ୍ୟବସ୍ଥାଠାରୁ ଆରମ୍ଭ କରି ଖାଇବା ପିଇବା ଏବଂ ସମସ୍ତ ଦାୟିତ୍ୱ ବହନ କରାଯିବ।