ନୂଆଦିଲ୍ଲୀ,୩୦।୧: ଭିଟାମିନ୍-ଡି’ର ଅଭାବ ନେଇ ଭାରତରେ ଏକ ରୋଚକ ତଥ୍ୟ ସାମ୍ନାକୁ ଆସିଛି। ଭାରତର ୭୬ପ୍ରତିଶତ ଲୋକଙ୍କଠାରେ ଭିଟାମିନ-ଡି’ର ଅଭାବ ରହିଥିବା ଏକ ବିସ୍ତୁତ ଗବେଷଣାରୁ ଜଣାପଡ଼ିଛି। ସୂଚନାଯୋଗ୍ୟ, ଭାରତର ପ୍ରାୟ ୨୭ଟି ସହରରେ ବାସ କରୁଥିବା ୨.୨ ଲକ୍ଷରୁ ଊର୍ଦ୍ଧ୍ୱ ଲୋକଙ୍କୁ ନେଇ ଏହି ଗବେଷଣା କରାଯାଇଥିଲା। ଟାଟା ଗ୍ରୁପ ଦ୍ୱାରା ଏହି ସର୍ଭେ କରାଯାଇଥିଲା। ଅନୁସନ୍ଧାନରୁ ମିଳିଥିବା ତଥ୍ୟ ଅନୁସାରେ, ଭିଟାମିନ-ଡି’ ଅଭାବରୁ ପ୍ରଭାବିତ ଲୋକଙ୍କ ବୟସ ୨୫ ବର୍ଷ କିମ୍ବା ତା’ଠାରୁ କମ୍ ରହିଛି। ଏହି ସର୍ଭେରେ ୭୯ପ୍ରତିଶତ ପୁରୁଷ ଏବଂ ପ୍ରାୟ ୭୫ ପ୍ରତିଶତ ମହିଳା ସାମିଲ ହୋଇଥିଲେ। ସୂଚନା ମୁତାବକ, ସୁରଟ ଏବଂ ବଡୋଦରାରେ ଭିଟାମିନ-ଡି’ର ଅଭାବ ଥିବା ଲୋକଙ୍କ ସଂଖ୍ୟା ଅଧିକ ବୋଲି ଗବେଷଣାରୁ ଜଣାପଡ଼ିଛି। ସୁରଟରେ ୮୮ପ୍ରତିଶତ ଏବଂ ବଡୋଦରାରେ ୮୯ପ୍ରତିଶତ ଲୋକ ଏହ ଭିଟାମିନ୍ ଅଭାବରେ ପୀଡ଼ିତ। ଏତଦ୍ ବ୍ୟତୀତ ଦିଲ୍ଲୀ-ଏନ୍ସିଆରର ୭୨ପ୍ରତିଶତ ଲୋକ ଏହି ଭିଟାମିନ୍ରେ ଅଭାବ ଦେଇ ଗତିକରୁଛନ୍ତି। ଏହି ଭିଟାମିନର ଅଭାବ ସବୁଠାରୁ ଅଧିକ ଯୁବପିଢ଼ିଙ୍କଠାରେ ଅଧିକ ଦେଖାଦେଇଛି। ୨୫ବର୍ଷ ପର୍ଯ୍ୟନ୍ତ ୮୪ପ୍ରତିଶତ ଯୁବକମାନଙ୍କଠାରେ ଭିଟାମିନ-ଡି’ ଅଭାବ ଦେଖିବାକୁ ମିଳିଛି। ଗବେଷଣାରେ ୨୫-୪୦ ବୟସ ବର୍ଗର ୮୧ ପ୍ରତିଶତ ଲୋକଙ୍କ ମଧ୍ୟରେ ଏଭଳି ପରିସ୍ଥିତି ଦେଖାଯାଇଥିଲା। ସର୍ଭେ ଅନୁଯାୟୀ ଏହା ସାମ୍ନାକୁ ଆସିଛି ଯେ, କୋଭିଡ ସଂକ୍ରମଣ ଯୋଗୁ ହୋଇଥିବା ଲକ୍ଡାଉନରେ ଭିଟାମିନ-ଡି’ର ଅଭାବ ଆହୁରି ବୃଦ୍ଧି ପାଇଛି। ଏଥିସହିତ ବିଶେଷଜ୍ଞମାନେ କହିଛନ୍ତି, ଲୋକଙ୍କ ଶରୀରରେ ଭିଟାମିନ-ଡି’ ଅଭାବର କାରଣ ହେଉଛି ଲକ୍ଡାଉନ ସହିତ ପ୍ରଦୂଷଣ ଏବଂ ଖାଦ୍ୟରେ ଜଙ୍କ ଫୁଡ ଅନ୍ତର୍ଭୂକ୍ତ ରହିବା। କାରଣ ଅଧିକାଂଶ ଯୁବକ ପୁଷ୍ଟିକର ଖାଦ୍ୟ ଖାଉ ନାହାନ୍ତି ବୋଲି ବିଶେଷଜ୍ଞ କହିଛନ୍ତି।
