ଚମ୍ପୁଆ,୧୮।୧୦ (ଡି.ଏନ.ଏ.)-ଭତ୍ତା ଟଙ୍କା ପାଇଁ ଗୁଲ ପ୍ରଧାନ ନାମ୍ନୀ ଜଣେ ବୃଦ୍ଧାଙ୍କୁ ୩ କି.ମି. ଚାଲିବାକୁ ପଡ଼ିଛି। ବାଡ଼ି ଖଣ୍ଡକୁ ସାହାରା କରି ଚାଲି ଚାଲି ଯାଇ ସେ ପଞ୍ଚାୟତ କାର୍ଯ୍ୟାଳୟରେ ପହଞ୍ଚିଥିଲେ। କେନ୍ଦୁଝର ଜିଲା ଚମ୍ପୁଆ ବ୍ଲକ ବଡନଈ ପଞ୍ଚାୟତରେ ଏଭଳି ଘଟଣା ଦେଖିବାକୁ ମିଳିଛି। ପ୍ରକାଶ ଯେ, ବୃଦ୍ଧା ଗୁଲଙ୍କ ଘର ବଡ଼ନଈ ପଞ୍ଚାୟତଠାରୁ ୩ କି.ମି. ଦୂର ସାନନଈ ଗଉଡ଼ସାହିରେ। ବୟସ ତାଙ୍କୁ ଅଧାବଙ୍କା କରିଦେଇଥିବା ବେଳେ ୩ ଫୁଟିଆ ବାଡି ପାଲଟିଛି ସାହାରା। ସରକାରଙ୍କ ପକ୍ଷରୁ ମିଳୁଥିବା ୫୦୦ ଟଙ୍କା ଭତ୍ତା ପାଇବା ପାଇଁ ସେ ନଇଁ ନଇଁ ପଞ୍ଚାୟତ କାର୍ଯ୍ୟାଳୟକୁ ଯାଇଥିଲେ। ପଞ୍ଚାୟତ ପକ୍ଷରୁ ଦୁସ୍ଥ, ରୋଗାଗ୍ରସ୍ତ ଓ ବୟସାଧିକଙ୍କ ପାଇଁ ଘରେ ଭତ୍ତା ଅର୍ଥ ପହଞ୍ଚାଇବା ବ୍ୟବସ୍ଥା ଥିଲେ ମଧ୍ୟ ଗୁଲ କିପରି କଷ୍ଟ ସହି ସେଠାରେ ପହଞ୍ଚିଲେ ତାହାକୁ ନେଇ ପ୍ରଶ୍ନ ଉଠିଛି। ଏ ସମ୍ପର୍କରେ ସରପଞ୍ଚ ହିମାଂଶୁ ଶେଖର ସଏଙ୍କୁ ପଚାରିବାରୁ କହିଛନ୍ତି, ଉକ୍ତ ବୃଦ୍ଧାଙ୍କ ନାମରେ ଭତ୍ତା ହେବା ଦିନରୁ କେତେବେଳେ ପିଅନ, ପିଇଓ ଦ୍ୱାରା ତାଙ୍କୁ ଭତ୍ତା ଦିଆଯାଇଥିବା ବେଳେ କେତେବେଳେ ତାଙ୍କ ପୁଅ ମାଧ୍ୟମରେ ପ୍ରଦାନ କରାଯାଇଛି। ମାତ୍ର ସେ କେଉଁ କାରଣ ପାଇଁ ଭତ୍ତା କେନ୍ଦ୍ରକୁ ଆସିଲେ ତାହା ପଚାରିଲେ ମଧ୍ୟ ସେ କିଛି କହି ନ ଥିଲେ। ତେବେ ତାଙ୍କୁ ତୁରନ୍ତ ଭତ୍ତା ଦେଇ ଘରକୁ ଫେରିବାର ବ୍ୟବସ୍ଥା କରାଯାଇଥିଲା।
