ଦାରିଙ୍ଗବାଡି,୨୮ା୧୦(ଡି.ଏନ.ଏ.): ଦାରିଙ୍ଗବାଡି ବ୍ଲକ ବାଡାବାଙ୍ଗା ପଞ୍ଚାୟତରେ ଥିବା ଏକମାତ୍ର ସେବାଶ୍ରମ ନାହିଁ ନାହିଁରେ ଚାଲିଛି। ଉକ୍ତ ସେବାଶ୍ରମରେ ୧୩୦ ଛାତ୍ରୀ ଏବଂ ୪୦ ଛାତ୍ର ଛାତ୍ରାବାସରେ ରହି ଶିକ୍ଷା ପ୍ରାପ୍ତ କରୁଥିବା ବେଳେ ପ୍ରାୟ ଶହେ ପାଖାପାଖି ଦିବାଧ୍ୟାୟୀ ଛାତ୍ରୀଛାତ୍ର ପଞ୍ଚାୟତର ବିଭିନ୍ନ ଗାଁରୁ ଆସି ସେଠାରେ ଶିକ୍ଷା ପ୍ରାପ୍ତ କରୁଛନ୍ତି। ହେଲେ ପ୍ରଥମରୁ ଅଷ୍ଟମ ପର୍ଯ୍ୟନ୍ତ ମାତ୍ର ୩ ଶ୍ରେଣୀ ଗୃହ ରହିଥିବା ବେଳେ ୪ ଶିକ୍ଷୟିତ୍ରୀ ଶିକ୍ଷକ ରହିଛନ୍ତି। ସେମାନଙ୍କ ମଧ୍ୟରେ ଜିଲା ମଙ୍ଗଳ ବିଭାଗ ଦ୍ୱାରା ଦୁଇଜଣ ଶିକ୍ଷୟିତ୍ରୀ ଓ ଶିକ୍ଷକ ରହିଛନ୍ତି। ଅନ୍ୟ ଦୁଇ ଶିକ୍ଷକ ଶିକ୍ଷା ବିଭାଗରେ ରହିଥିବା ବେଳେ ସେହି ମଧ୍ୟରେ ଜଣେ ବହୁଭାଷୀ ଶିକ୍ଷକ ରହିଛନ୍ତି। ଶେବାଶ୍ରମରେ ଅଧିକା ଛାତ୍ରୀ ପାଠପଢିବା ସହ ଛାତ୍ରାବାସରେ ରହୁଥିଲେ ସୁଦ୍ଧା ତାଙ୍କୁ ଶିକ୍ଷାଦାନ ପାଇଁ ମାତ୍ର ଜଣେ ଶିକ୍ଷୟିତ୍ରୀ ରହିଛନ୍ତି। ଅଧିକା ଶିକ୍ଷୟିତ୍ରୀଙ୍କ ସହ ବିଜ୍ଞାନ ଶିକ୍ଷକ, ଖେଳ ପଡିଆ, ଅତିରିକ୍ତ ଶ୍ରେଣୀକୋଠା, ଆବଶ୍ୟକ ବ୍ୟବସ୍ଥା କରାଗଲେ ସେବାଶ୍ରମରେ ପାଠପଢା ସ୍ବାଭାବିକ ହୋଇପାରିବ ବୋଲି ଛାତ୍ରୀଛାତ୍ର ଏବଂ ଗ୍ରାମବାସୀ କହିଛନ୍ତି। ଏ ନେଇ ଗ୍ରାମବାସୀ ସ୍ଥାନୀୟ ପ୍ରଶାସନଠାରୁ ଜିଲା ପ୍ରଶାସନ ପର୍ଯ୍ୟନ୍ତ ଜଣାଇଛନ୍ତି। ପ୍ରଧାନ ଶିକ୍ଷକ ପ୍ରାଣବନ୍ଧୁ ମହାନାୟକ କହିଛନ୍ତି ଯେ ୪ ଶିକ୍ଷୟିତ୍ରୀ ଶିକ୍ଷକଙ୍କ ମଧ୍ୟରୁ ଜଣେ ବହୁଭାଷୀ ଶିକ୍ଷକ ରହିଛନ୍ତି ବିଜ୍ଞାନ ଶିକ୍ଷକ ଜରୁରୀ ଥିବା ବେଳେ ଅଧିକା ଛାତ୍ରୀ ଅଧ୍ୟୟନ କରୁଥିବାରୁ ଆହୁରି ଶିକ୍ଷୟିତ୍ରୀ ନିଯୁକ୍ତି କଲେ ପିଲାଙ୍କ ପାଠପଢାରେ ଉନ୍ନତି ହୋଇପାରିବ ବୋଲି କହିଛନ୍ତି। ଏ ନେଇ ଦାରିଙ୍ଗବାଡି ବିଡିଓ ଗଦାଧର ପାତ୍ର କହିଛନ୍ତି ଯେ ସେ ଉକ୍ତ ସେବାଶ୍ରମରେ ରହିଥିବା ସମସ୍ୟା ସମ୍ପର୍କରେ ଅବଗତ ରହିଛନ୍ତି। ଏହାର ସମାଧାନ ପାଇଁ ସେ ଜିଲା ପ୍ରଶାସନଙ୍କୁ ଜଣାଇଥିବା କହିଛନ୍ତି।
