ବାରିପଦା ଅଫିସ,୨୦।୭ – ମୟୂରଭଞ୍ଜ ଜିଲା ବେତନଟୀ ଥାନା ଅଞ୍ଚଳରେ ବିଭିନ୍ନ ସାଇବର ଠକେଇରେ ଜଡ଼ିତ ୩ ଅଭିଯୁକ୍ତଙ୍କୁ ପୋଲିସ ଗିରଫ ପରେ କୋର୍ଟ ଚାଲାଣ କରିଛି। ସେମାନଙ୍କଠାରୁ ୧ଲକ୍ଷ ୩୫ହଜାର ଟଙ୍କା, ୭ଟି ମୋବାଇଲ, ୧୧ଟି ସିମ କାର୍ଡ, ଗୋଟିଏ ମେମୋରି ଚିପ୍, ୮ଟି ଏଟିଏମ୍ କାର୍ଡ ଜବତ ହୋଇଥିବା ନେଇ ବେତନଟୀ ଏସ୍ଡିପିଓ ସୁଦର୍ଶନ ଦାଶ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଅଭିଯୁକ୍ତମାନେ ହେଲେ ବୈଶିଙ୍ଗା ଥାନା ଜଡିଦା ଅଞ୍ଚଳର ରାଜେଶ କୁମାର ଲେଙ୍କା ଓ କାହ୍ନୁଚରଣ ବେହେରା ଏବଂ ବିଜିପୁର ଅଞ୍ଚଳର ରଶ୍ମିରଞ୍ଜନ ଭୋଳ।
ସୂଚନା ଅନୁଯାୟୀ, ସୋମବାର ବିଳମ୍ବିତ ରାତିରେ ପୋଲିସ ପାଟ୍ରୋଲିଂ କରୁଥିବା ସମୟରେ ଏକ କାରରେ ଆସି ଅଭିଯୁକ୍ତମାନେ ବେତନଟୀ କୋର୍ଟ ଛକରେ ଥିବା ଏକ ବ୍ୟାଙ୍କ ଏଟିଏମ୍ ସମ୍ମୁଖରେ ଛିଡ଼ା ହୋଇଥିଲେ। ଏହାକୁ ଦେଖି ସବ୍ ଇନ୍ସପେକ୍ଟର ବି.ମହାରଣା ସେମାନଙ୍କୁ ଅଟକାଇ ପଚରାଉଚରା କରିଥିଲେ। ତେବେ କଥାବାର୍ତ୍ତାରେ ସନ୍ଦେହ ହେବାରୁ ସେମାନଙ୍କୁ ଥାନାକୁ ଆଣିଥିଲେ। ତଦନ୍ତ ପରେ ସେମାନେ ବିଭିନ୍ନ ସାଇବର ଅପରାଧରେ ଜଡିତ ଥିବା ଜଣାପଡ଼ିଥିଲା। ରାଜେଶଙ୍କ ମୋବାଇଲ ହ୍ବାଟ୍ସଆପ୍ରେ ଅନେକଗୁଡ଼ିଏ ଟ୍ରାଞ୍ଜାକ୍ସନ ହୋଇଥିବା ବେଳେ ଲୋକଙ୍କ ନାମରେ ଆକାଉଣ୍ଟ ଖୋଲି ସେମାନେ ଠକେଇ କରୁଥିବା ଏସ୍୍ଡିପିଓ ପ୍ରକାଶ କରିଛନ୍ତି। ସେହିପରି ଏକ କମ୍ପାନୀ ନାମରେ ରାଜେଶ ଲୋକଙ୍କ ଆକାଉଣ୍ଟକୁ ପ୍ରଥମେ ଟଙ୍କା ପଠାଇ ଲୋଭ ଦେଖାଇବା ପରେ ସେହି ବ୍ୟକ୍ତି ଅଧିକ ଟଙ୍କା ପାଇବା ଆଶାରେ ବ୍ୟାଙ୍କରେ ଜମା କରୁଥିବା ଟଙ୍କାକୁ ଉଠାଣ କରୁଥିଲେ। ପୁଣି ସେହି ଟଙ୍କାକୁ ଅନ୍ୟ ଲୋକଙ୍କ ବ୍ୟାଙ୍କ ଆକାଉଣ୍ଟରେ ଜମା କରି ସେମାନଙ୍କ ବ୍ୟାଙ୍କ ଖାତାରୁ ଅଧିକ ପରିମାଣର ଟଙ୍କା ଉଠାଣ କରିଚାଲିଥିଲେ ା ଏସ୍ପି ଦ୍ୟାନଦେଓ ଋଷିକେଶ ଖିଲାରୀଙ୍କ ନିର୍ଦ୍ଦେଶକ୍ରମେ ଥାନାଧିକାରିଣୀ ରେଣୁବାଳା ସାହୁ ଏକ ମାମଲା(ନଂ.୨୧୭/୨୨)ରୁଜୁ କରି ତଦନ୍ତ ଜାରି ରଖିଛନ୍ତି।
