ମୋହନା,୮।୯( ମନ୍ମଥ ମିଶ୍ର ): ଅଡବା ପୋଲିସକୁ ପୁଣି ସଫଳତା ମିଳିଛି । ଜଙ୍ଗଲରୁ ବିପୁଳ ପରିମାଣର ଗଞ୍ଜେଇ ଜବତ ହୋଇଛି । ଅଡବା ପୋଲିସର ପାଟ୍ରୋଲିଂ ସମୟରେ ପୋଲିସକୁ ଗଞ୍ଜେଇ ନେଇ ବିଶ୍ବସ୍ତ ସୁତ୍ରରୁ ସୂଚନା ମିଳିଥିଲା । ଗଜପତି ଜିଲା ଅଡବା ଥାନା ଅଧୀନ ଶିଆଳି ଲଟି ଗ୍ରାମ ନିକଟସ୍ଥ ଜଙ୍ଗଲ ଅଞ୍ଚଳରେ ଅଡବା ପୋଲିସ ଏକ ସର୍ଚ୍ଚ ଓ ଚଢ଼ାଉ ଅଭିଯାନ ଚଳାଇଥିଲା।
ଚଢ଼ାଉ ସମୟରେ ପୋଲିସ ଜଙ୍ଗଲର ଏକ ପରିତ୍ୟକ୍ତ ସ୍ଥାନରେ ଲୁଚାଇ ରଖାଯାଇଥିବା ୧୫ଟି ପ୍ଲାଷ୍ଟିକ ଜରି ବ୍ୟାଗ ଜବତ କରିଥିଲା। ଉକ୍ତ ବ୍ୟାଗଗୁଡ଼ିକରେ ବହୁ ପରିମାଣର ସନ୍ଦିଗ୍ଧ ଗଞ୍ଜେଇ ରହିଥିଲା, ଯାହାକୁ ଅଜଣା ବ୍ୟକ୍ତିମାନେ ପରିବହନ ପାଇଁ ପ୍ରସ୍ତୁତ କରି ଲୁଚାଇ ରଖିଥିବା ପୋଲିସ ଅନୁମାନ କରୁଛି ।
ଏହି ଚଢ଼ାଉ ଉପ-ନିରୀକ୍ଷକ ( ଏସ ଆଇ ) ସୌମ୍ୟରଞ୍ଜନ ବରାଳଙ୍କ ନେତୃତ୍ୱରେ ପୋଲିସ ଟିମ୍ ଦ୍ୱାରା ପରିଚାଳିତ ହୋଇଥିଲା। ତହସିଲଦାର-କମ୍-କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ ଚକ୍ରଧର ପାଢ଼ୀ ଓଜନ ଓ ଜବତ ପ୍ରକ୍ରିୟା ସମୟରେ ଉପସ୍ଥିତ ରହିଥିଲେ। ଘଟଣାସ୍ଥଳଟି ନିଛାଟିଆ ଅଞ୍ଚଳ ହୋଇଥିବାରୁ କୌଣସି ସ୍ୱାଧୀନ ସାଧାରଣ ସାକ୍ଷୀ ଉପଲବ୍ଧ ନଥିଲେ। ତେଣୁ ଆଇନଗତ ପ୍ରକ୍ରିୟାରେ ପୋଲିସ କର୍ମଚାରୀମାନଙ୍କୁ ସାକ୍ଷୀ ଭାବେ ସାମିଲ କରାଯାଇଥିଲା।
ଜବତ ହୋଇଥିବା ସମସ୍ତ ୧୫ଟି ବ୍ୟାଗର ଯାଞ୍ଚ ଓ ଓଜନ ପରେ ଗଞ୍ଜେଇର ମୋଟ ଓଜନ ୩୭୫ କିଲୋଗ୍ରାମ ବୋଲି ଜଣାପଡ଼ିଥିଲା । ଯାହାକି ୩୮ ଲକ୍ଷ ଟଙ୍କା ହେବ ବୋଲି ଥାନା ପକ୍ଷରୁ ସୂଚନା ମିଳିଛି ।
ଏହି ଘଟଣାରେ ଅଡବା ଥାନା ମାମଲା ନଂ. ୧୯୦/୨୬ ଅନୁଯାୟୀ ଅଜଣା ଅଭିଯୁକ୍ତମାନଙ୍କ ବିରୋଧରେ ମାମଲା ରୁଜୁ କରାଯାଇଛି ଏବଂ ତଦନ୍ତ ଚାଲୁ ରହିଥିବା ଥାନା ଅଧିକାରୀ ସନ୍ତୋଷ କୁମାର ବିଶୋୟୀ କହିଛନ୍ତି ।
