ଛତ୍ରପୁର,୨।୧୨(ଡି.ଏନ୍.ଏ.): ଆଗକୁ ଆସୁଛି ପୌରପାଳିକା ନିର୍ବାଚନ। ଏ ନେଇ ଛତ୍ରପୁର ସହରବାସୀଙ୍କୁ ଭେଟି ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପୂର୍ବରୁ ଏନଏସି ପକ୍ଷରୁ ୨୦୨୧/୨୨ ବର୍ଷ ପାଇଁ ୫୧ ଟି ପ୍ରସ୍ତାବିତ ପ୍ରକଳ୍ପ ପାଇଁ ରାଜ୍ୟ ସରକାରଙ୍କ ନିକଟକୁ ଅନୁମୋଦନ ପାଇଁ ପଠାଯାଇଥିବା ବେଳେ ଏହାର ମଞ୍ଜୁରୀ ହୋଇଥିବା ଛତ୍ରପୁର ଏନଏସି ନିର୍ବାହୀ ଅଧିକାରୀ ଏନ୍.ଗଣେଶ ବାବୁ ସୂଚନା ଦେଇଛନ୍ତି। ରାଜ୍ୟ ସରକାରଙ୍କ ପକ୍ଷରୁ ଏନ୍ଏସିକୁ ଏହାର ମଞ୍ଜୁରୀ ମିଳିଥିବା ନେଇ ଚିଠି ଆସିଛି । ଏହି ୫୧ଟି ପ୍ରକଳ୍ପ ପାଇଁ ୩ କୋଟି ୩୬ ଲକ୍ଷ ଖର୍ଚ୍ଚ ହେବ । ଛତ୍ରପୁର ୧୪ ଟି ଓ୍ବାର୍ଡର ରୂପାନ୍ତରୀକରଣ ପାଇଁ ୫୧ ଟି ପ୍ରକଳ୍ପ ହେବ । କ୍ଷୁଦ୍ର ଉଦ୍ୟାନ ୪ ଟି ପ୍ରକଳ୍ପ ପାଇଁ ୧୬ ଲକ୍ଷ, ପବ୍ଲିକ ଜିମ ୯ ଟି ପାଇଁ ୬୧ ଲକ୍ଷ, ଶିଶୁ କ୍ରୀଡା ଉଦ୍ୟାନ ୫ ଟି ପାଇଁ ୧୧ ଲକ୍ଷ, ରାସ୍ତା ୧୮ ଟି ପାଇଁ ୬୬ ଲକ୍ଷ, ରାସ୍ତା ଓ ଡ୍ରେନ ୧୩ ଟି ପ୍ରକଳ୍ପ ପାଇଁ ୧୬୪ ଲକ୍ଷ, ୨ ଟି ରାସ୍ତା ପାଇଁ ୧୮ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି ଜଣାପଡିଛି । ସହରରେ ୧୪ ଟି ଓ୍ବାର୍ଡ ରହିଥିବା ବେଳେ ପ୍ରତ୍ୟେକ ଓ୍ବାର୍ଡରେ କିଛି ନା କିଛି ପ୍ରକଳ୍ପ ରହିବ । ଏଥିସହ ମୁକ୍ତା ଯୋଜନାରେ ମହିଳା ସ୍ବୟଂ ସଂଘର ସଦସ୍ୟମାନେ ଏବେ ସହରରେ ବିଭିନ୍ନ ପ୍ରକଳ୍ପ କରି ସଶକ୍ତିକରଣ ହେଉଥିବା ବେଳେ ଆଗକୁ ମଧ୍ୟ ମହିଳା ସ୍ବୟଂ ସଂଘକୁ ମଧ୍ୟ ମୁକ୍ତା ଯୋଜନାରେ କାମ ଯୋଗାଇ ଦିଆଯିବ ବୋଲି ଏନଏସି ନିର୍ବାହି ଅଧିକାରୀ କହିଛନ୍ତି । ସୂଚନା ଥାଉକି ଚଳିତ ମାସ ୧୬ ତାରିଖରେ ଏନଏସି କର୍ତ୍ତୃପକ୍ଷ ଏବଂ ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା ଏହି ୫୧ ଟି ପ୍ରକଳ୍ପର ଅନୁମୋଦନ ପାଇଁ ୫ଟି ସଚ୍ଚିବ ଭି.କେ.ପାଣ୍ଡିଆନଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ନିବେଦନ କରିଥିଲେ ।
