ମୁମ୍ବାଇ,୩୦ା୧୨:ଉଇକେଟ କିପର ବ୍ୟାଟର ରିଚା ଘୋଷଙ୍କ ଅର୍ଦ୍ଧଶତକ ସତ୍ତ୍ୱେ ଦ୍ୱିତୀୟ ଦିନିକିଆ ମ୍ୟାଚରେ ଅଷ୍ଟ୍ରେଲିଆ ଠାରୁ ୩ ରନରେ ହାରିଛି ଭାରତ। ଏହା ସହ ୩ ମ୍ୟାଚ ବିଶିଷ୍ଟ ସିରିଜକୁ ଆଗୁଆ ଜିତି ନେଇଛି ଅଷ୍ଟ୍ରେଲିଆ। ପ୍ରଥମେ ବ୍ୟାଟିଂ କରିଥିବା ଅଷ୍ଟ୍ରେଲିଆ ୫୦ ଓଭରରେ ୮ ଉଇକେଟ ହରାଇ ୨୫୮ ରନ୍ କରିଥିଲା। ଜବାବରେ ଭାରତ ୫୦ ଓଭରରେ ୮ ଉଇକେଟ ହରାଇ ୨୫୫ ରନ୍ ସ୍କୋର କରିଥିଲା।
ଅଷ୍ଟ୍ରେଲିଆ ଟସ୍ ଜିତି ପ୍ରଥମେ ବ୍ୟାଟିଂ କରିଥିଲା। ତେବେ ଦୀପ୍ତି ଶର୍ମାଙ୍କ ୫ ଉଇକେଟ ସଫଳତା ବଳରେ ଅଷ୍ଟ୍ରେଲିଆ ୫ ଉଇକେଟ ହରାଇ ୨୫୮ ରନ୍ ସ୍କୋର କରିଥିଲା। ଫିବ୍ ଲିଚ୍ଫିଲ୍ଡ(୬୩) ଓ ଆଲିସା ହିଲୀ(୧୩) ପ୍ରଥମ ଉଇକେଟରେ ୪୦ ରନ୍ ଯୋଡିଥିଲେ। ଏଲିସ୍ ପେରୀ(୫୦)ଙ୍କ ସହିତ ଲିଚଫିଲ୍ଡ ୭୭ ରନ୍ ଯୋଡିଥିଲେ । ତେବେ ମିଡିଲ ଓଭରରେ ଦୀପ୍ତିଙ୍କ ଘାତକ ବୋଲିଂ ବଳରେ ଅଷ୍ଟ୍ରେଲିଆ ବଡ ସ୍କୋର କରିବାରେ ବିଫଳ ହୋଇଥିଲା।ଶେଷ ଆଡକୁ ଆଲାନା କିଙ୍ଗ ଦ୍ରୁତ ୨୮ ରନ୍ ସ୍କୋର କରିଥିଲେ। ଦୀପ୍ତି ୩୮ ରନ୍ ଦେଇ ୫ ଉଇକେଟ ଅକ୍ତିଆର କରିଥିଲେ ଦୀପ୍ତି ଶର୍ମା। ଏହା ତାଙ୍କ କ୍ୟାରିୟରର ଦ୍ୱିତୀୟ ୫ ଉଇକେଟ ସଫଳତା।
୨୫୯ ରନ୍ ଲକ୍ଷ୍ୟରେ ୟସ୍ତିକା ଭାଟିଆ(୧୪) ଓ ସ୍ମୃତି ମନ୍ଧାନା(୩୪) ପ୍ରଥମ ଉଇକେଟରେ ୩୭ ରନ୍ ଯୋଡିଥିଲେ। ୩ ନମ୍ବରରେ ବ୍ୟାଟିଂ କରିଥିବା ରିଚା ଘୋଷ କ୍ୟାରିୟର ଶ୍ରେଷ୍ଠ ୯୬ ରନ ସ୍କୋର କରିଥିଲେ। ୧୧୭ ବଲ୍ ଖେଳି ସେ ୯୬ ରନ୍ କରିଥିଲେ। ତୃତୀୟ ଉଇକେଟରେ ଜେମିମା ରୋଡ୍ରିଗୁଏଜ(୪୪)ଙ୍କ ସହ ମିଶି ୮୮ ରନ୍ ଯୋଡିଥିଲେ। ଉଭୟ ବ୍ୟାଟିଂ କରୁଥିବା ସମୟରେ ଭାରତର ବିଜୟ ହାତ ପାହାନ୍ତରେ ରହିଥିଲା।
ତେବେ ମଧ୍ୟକ୍ରମରେ ହରମନ୍ପ୍ରୀତ କୌର(୫), ଅମନଜୋତ୍ କୌର(୪), ପୂଜା ବସ୍ତ୍ରକାର(୮) ଓ ହରଲିନ୍ ଦେଓଲ(୧) ବିଫଳ ହେବାରୁ ଭାରତ ବିଜୟ ଲକ୍ଷ୍ୟରୁ ୩ ରନ୍ ଦୂରରେ ରହ ଯାଇଥିଲା। ଶେଷ ଓଭରରେ ୧୬ ରନ୍ ଆବଶ୍ୟକ ଥିବା ବେଳେ ଦୀପ୍ତି ଶର୍ମା(୨୪*) ଓ ଡେବ୍ୟୁଟାଣ୍ଟ ଶ୍ରେୟଙ୍କା ପାଟିଲ(୫*) ୧୨ ରନ୍ ସଂଗ୍ରହ କରି ପାରିଥିଲେ। ଶେଷ ଭାଗରେ ୩ ଉଇକେଟ ନେଇ ଆନାବେଲ ସଦରଲାଣ୍ଡ ଭାରତର ବ୍ୟାଟିଂ ବିପର୍ଯ୍ୟୟ ଘଟାଇଥିଲେ। ଜର୍ଜିଆ ଓ୍ବେୟାରହାମ୍ ୨ ଉଇକେଟ ନେଇଥିବା ବେଳେ ଆସ୍ଲେ ଗାର୍ଡନର, କିମ୍ ଗାର୍ଥ ଓ ଆଲାନା କିଙ୍ଗ ଗୋଟିଏ ଲେଖାଏ ଉଇକେଟ ନେଇଥିଲେ।
