ଭଞ୍ଜନଗର/ବେଗୁନିଆପଡ଼ା, ୧୨।୩(ଡି.ଏନ୍.ଏ)ଭଞ୍ଜନଗର ଓ ବେଗୁନିଆପଡ଼ା ଅଞ୍ଚଳରେ ପୃଥକ ଭାବେ ନିଆଁ ଲାଗି ୨୬ ବଖରା ପୋଡ଼ି ପାଉଁଶ ହୋଇଯାଇଛି। ଭଞ୍ଜନଗର ତହସିଲ ଅନ୍ତର୍ଗତ ଚାକୁଣ୍ଡାପଲ୍ଲୀରେ ଶନିବାର ମଧ୍ୟାହ୍ନରେ ଅଗ୍ନିକାଣ୍ଡ ଘଟି ୮ ପରିବାରର ୧୧ ବଖରା ଜଳିଯାଇଛି। ଏଥିସହ ଲକ୍ଷାଧିକ ଟଙ୍କାର ସମ୍ପତ୍ତି ମଧ୍ୟ ପୋଡି ପାଉଁଶ ହୋଇଯାଇଛି। ଭଞ୍ଜନଗର ଅଗ୍ନିଶମ ବାହିନୀ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିଥିଲେ। କ୍ଷତିଗ୍ରସ୍ତ ପରିବାରଗୁଡିକ ହେଲେ ବୁଦ୍ଧିଆ ପ୍ରଧାନ, କୃଷ୍ଣ ପ୍ରଧାନ, କୁନି ନାୟକ, ହରି ନାୟକ, ଶିବ ନାୟକ, ଦାମ ନାୟକ, ସୁବାସ ନାୟକ, ଆନନ୍ଦ ପ୍ରଧାନ। ସେମାନଙ୍କୁ ତୁରନ୍ତ ସରକାରୀ ସହାୟତା ଯୋଗାଇ ଦେବା ପାଇଁ ଦାବି ହୋଇଛି। ‘ବିପଦର ବନ୍ଧୁ’ କର୍ମକର୍ତ୍ତାମାନେ ଘଟଣାସ୍ଥଳରେ ପହଞ୍ଚି ସେମାନଙ୍କୁ ରନ୍ଧା ଖାଦ୍ୟ ସମେତ ଅନ୍ୟାନ୍ୟ ସହାୟତା ପ୍ରଦାନ କରିଥିଲେ।
ସେହିପରି ଗଞ୍ଜାମ ଜିଲା ବେଗୁନିଆପଡ଼ା ବ୍ଳକ ଅନ୍ତର୍ଗତ ମର୍ଦ୍ଦମେଖ ପଞ୍ଚାୟତର ଗୁଡିଆଳିରେ ଶନିବାର ଅପରାହ୍ନରେ ଭୟାବହ ଅଗ୍ନିକାଣ୍ଡ ଘଟ ୧୫ ବଖରା ଘର ଜଳିପୋଡ଼ି ନଷ୍ଟ ହୋଇଯାଇଛି। ସର୍ଟ ସର୍କିଟ୍ ଯୋଗୁଁ ହଠାତ୍ ନିଆଁ ଲାଗି ଯାଇଥିଲା। କୋଦଳା ଦମକଳ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ। ବଂଶୀଧର ସ୍ବାଇଁ, ମୁରଲୀ ସ୍ବାଇଁ, କୁମର ସ୍ବାଇଁ, ଜୁମର ସ୍ବାଇଁ, ହରପ୍ରସାଦ ପ୍ରଧାନ, ଜିତେନ୍ଦ୍ର ଜେନା, ଭଗବାନ ସ୍ବାଇଁ, ଅନ୍ତର ସ୍ବାଇଁ, ସୁବାସ ସ୍ବାଇଁଙ୍କ ଚାଳ ଓ ଆଜବେଷ୍ଟସ୍ ଘର ଅଗ୍ନିକାଣ୍ଡରେ
କ୍ଷତିଗ୍ରସ୍ତ ହୋଇଥିବା ଜଣାପଡିଛି।
