ବ୍ରହ୍ମପୁର ଅଫିସ,୧୪।୪: ବ୍ରହ୍ମପୁର ସମବାୟ କେନ୍ଦ୍ର (ବିସିସି) ବ୍ୟାଙ୍କ ୨୦୨୨-୨୩ ବର୍ଷରେ ରବି ଫସଲ ପାଇଁ ଗଞ୍ଜାମ-ଗଜପତି ଜିଲାର ୬୦,୬୬୨ ପଞ୍ଜୀକୃତ ଚାଷୀଙ୍କୁ ୨୩୨.୬୫ କୋଟି ଟଙ୍କା କୃଷିଋଣ ଦେଇଛି। ସରକାରୀ ଲକ୍ଷ୍ୟ ଧାର୍ଯ୍ୟଠାରୁ ୧୨.୬୫ କୋଟି ଅଧିକ ହୋଇଛି। ରବି ଫସଲ ଋଣ ଲଗାଣ ଗତ ଅକ୍ଟୋବର ୧ରୁ ଆରମ୍ଭ ହୋଇ ମାର୍ଚ୍ଚ ୩୧ରେ ସରିଛି।
ସୂଚନାଯୋଗ୍ୟ, ଦୁଇ ଜିଲାର ୧୭ ଶାଖା ବ୍ୟାଙ୍କ ଅଧୀନ ୨୫୭ କୃଷି ସମବାୟ ସମିତି ଓ ଲ୍ୟାମ୍ପସ ଜରିଆରେ ଚାଷୀଙ୍କୁ କୃଷିଋଣ ଲଗାଣ ହୋଇଛି।
ଗଞ୍ଜାମ ଜିଲାର ଦିଗପହଣ୍ଡି, ଚିକିଟି, ପାତ୍ରପୁର, ରଙ୍ଗେଇଲୁଣ୍ଡା, ବିଜିପୁର, କୁକୁଡ଼ାଖଣ୍ଡି,ସମରଝୋଳ, ହିଞ୍ଜିଳିକାଟୁ, ପୁରୁଷୋତ୍ତମପୁର, ଛତ୍ରପୁର, ରମ୍ଭା, ଖଲ୍ଲିକୋଟ ଓ ବେଗୁନିଆପଡ଼ା ଏହି ୧୩ ଶାଖା ବ୍ୟାଙ୍କ ଅଧୀନ ୨୦୭ ସମବାୟ ସୋସାଇଟି ଦ୍ୱାରା ୫୨,୬୭୦ ଚାଷୀଙ୍କୁ ୧୯୬ କୋଟି ୩୩ ଲକ୍ଷ ୮୭ ହଜାର ଟଙ୍କା କୃଷି ଋଣ ଦିଆଯାଇଛି। ତନ୍ମଧ୍ୟରୁ ୫୮ କୋଟି ୯୦ ଲକ୍ଷ ୧୫ ହଜାର ଟଙ୍କାର ସାର ଓ କୃଷି ସରଞ୍ଜାମ ଦିଆଯାଇଥିତ୍ବା କୁହାଯାଇଛି। ଗଞ୍ଜାମର ଉପରୋକ୍ତ ୧୩ ଶାଖା ମଧ୍ୟରେ ରବି ଋଣ ୧୯୦ କୋଟି ଲଗାଣ ଲାଗି ସରକାର ଟାର୍ଗେଟ ଦେଇଥିବା ବେଳେ ବ୍ୟାଙ୍କ ପକ୍ଷରୁ ଅଧିକ ୬ କୋଟି ୩୩ ଲକ୍ଷ ୮୭ ହଜାର ଟଙ୍କା ଦିଆଯାଇଛି।
ସେହିପରି ଗଜପତି ଜିଲାର ପାରଳାଖେମୁଣ୍ଡି, କାଶୀନଗର, ଆର.ଉଦୟଗିରି ଓ ଗାରାବନ୍ଧ ଏହି ୪ ଶାଖା ବ୍ୟାଙ୍କ ଅଧୀନ ୫୦ ସୋସାଇଟି ଓ ଲ୍ୟାମ୍ପସ ଜରିଆରେ ୩୦ କୋଟି ଟଙ୍କା ରବି ଫସଲ ନିମନ୍ତେ କୃଷି ଋଣ ଲଗାଣ ପାଇଁ ସରକାର ଟାର୍ଗେଟ ଦେଇଥିଲେ। ତେବେ ବ୍ୟାଙ୍କ ପକ୍ଷରୁ ୭୯୯୨ ପଞ୍ଜୀକୃତ ଚାଷୀଙ୍କୁ ୩୬.୩୧ କୋଟିରୁ ଅଧିକ ଟଙ୍କା କୃଷି ଋଣ ଦିଆଯାଇଛି। ୪ ମାସ ତଳେ ବ୍ୟାଙ୍କର ନୂଆ ପରିଚାଳନା ବୋର୍ଡ ଗଠନ ହୋଇଛି। ବ୍ୟାଙ୍କିଙ୍ଗ ସେବା ଓ ଋଣ କର୍ମଶାଳାକୁ ଉଭୟ ଜିଲାରେ ବ୍ୟାପକ କରାଯାଇଛି। ମିଶନ ଶକ୍ତିର ମହିଳାଙ୍କ ନିମନ୍ତେ ବ୍ୟାଙ୍କ ସ୍ବତନ୍ତ୍ର ବ୍ୟବସ୍ଥା କରି ଏସଏଚଜିଙ୍କୁ ଉତ୍ସାହିତ କରୁଛି। ସ୍ବର୍ଗତ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ଦ୍ୱାରା ଉଦ୍ଘାଟିତ ସମବାୟ ମହିଳା ବ୍ୟାଙ୍କ ବ୍ରହ୍ମପୁରସ୍ଥ ମୁଖ୍ୟାଳୟ ପରିସରରେ ଅଛି।
