କଟକ ଅଫିସ,୧୦ା୯: ବୟସ ୨୩ ମାସ। ଏହି କୋମଳ ବୟସରେ ସେ ରଚିଛନ୍ତି ଏକ ଇତିହାସ। ଏହି ଶିଶୁଜଣଙ୍କ ହେଲେ ଭୁବନେଶ୍ୱର ବ୍ରହ୍ମେଶ୍ୱର ପାଟଣାର ପ୍ରସନ୍ନଜିତ ମହାନ୍ତି ଓ ଶୁଭଶ୍ରୀ ବିଶ୍ୱାଳଙ୍କ ଝିଅ ଜାନଭି ମହାନ୍ତି ଓରଫ ଦୀୟା ା ଓଡ଼ିଶାର ସର୍ବକନିଷ୍ଠ ପ୍ରାର୍ଥୀ ଭାବେ ଦୀୟା ଇଣ୍ଡିଆ ବୁକ୍ ଅଫ ରେକର୍ଡରେ ସ୍ଥାନ ପାଇଛନ୍ତିି। ବିଚକ୍ଷଣ ବୁଦ୍ଧି ଓ କମ୍ ବୟସରେ ଶିକ୍ଷାଗ୍ରହଣରେ ପାରଦର୍ଶିତା ଯୋଗୁ ତାଙ୍କୁ ସମ୍ମାନିତ କରାଯାଇଛି…
ଦୀୟାଙ୍କୁ ଯେତେବେଳେ ୯ମାସ ହୋଇଥିଲା ସେ ପରିବାର ସହ ମଇଶୂର ଯାଇଥିଲେ। ସେଠାରେ ଜଣେ ପର୍ଯ୍ୟଟକ ତାଙ୍କୁ ‘ହ୍ବାଟ ଇଜ ଇଓର ନେମ୍’ ପଚାରିଥିଲେ। କମ୍ ବୟସର ହୋଇସୁଦ୍ଧା ଦୀୟା ନିଜ ସମ୍ପୂର୍ଣ୍ଣ ନାମକୁ ପ୍ରାଞ୍ଜଳ ଭାବେ ଇଂଲିଶରେ କହିଥିଲେ। ଏହି ଘଟଣା ପରଠାରୁ ହିଁ ତାଙ୍କ ପରିବାର ଦୀୟାଙ୍କ ପ୍ରତି ଅଧିକ ଉତ୍କଣ୍ଠା ଦେଖାଇଥିଲେ।
ପଶୁପକ୍ଷୀଙ୍କ ନାମ, ଫଳର ନାମ, ରଙ୍ଗର ନାମ ଇଂଲିଶରେ କହିପାରିବା ସହିତ ଏକାଧିକ ଇଂଲିଶ ଓ ହିନ୍ଦୀ ରାଇମ୍ ଭଲଭାବେ ଉପସ୍ଥାପନ କରିପାରନ୍ତି ଦୀୟା। ଏହାଛଡ଼ା ଇଂଲିଶ ଶବ୍ଦ ବ୍ୟବହାର କରି ହଠାତ୍ ଗୋଟିଏ ବସ୍ତୁକୁ ଚିହ୍ନିବାକୁ କହିଲେ ସେ ଏହାକୁ ଚିହ୍ନାଇ ପାରନ୍ତି। ଉପରୋକ୍ତ ପର୍ଯ୍ୟାୟକୁ ଆଧାରକରି ଦୀୟାଙ୍କୁ ଇଣ୍ଡିଆ ବୁକ୍ ଅଫ ରେକର୍ଡରେ ସ୍ଥାନ ମିଳିଛି। ତାଙ୍କ ପ୍ରତିଭା ସମ୍ପର୍କରେ ପରିବାର ଲୋକ ଜାଣି ପ୍ରଥମ ପର୍ଯ୍ୟାୟରେ ଗତ ମାର୍ଚ୍ଚରେ ଅନ୍ଲାଇନ ଜରିଆରେ ଇଣ୍ଡିଆ ବୁକ୍ ରେକର୍ଡ କମିଟିକୁ କିଛି ଭିଡ଼ିଓ ପଠାଇଥିଲେ। ୨୦୧୮ ଏପ୍ରିଲ ୧୦ରେ ଜନ୍ମିତ ଦୀୟାକୁ ଆବେଦନ ତାରିଖ ସୁଧା ୨୩ ମାସ ହୋଇଥିଲା। ପରେ ଜୁଲାଇ ପହିଲାରେ ପୁନର୍ବାର ଆଉ କିଛି ଭିଡିଓ କମିଟିକୁ ପଠାଯାଇଥିଲା ବୋଲି ଶୁଭଶ୍ରୀ କହିଛନ୍ତି। ଏହି ଭିଡିଓକୁ କମିଟି ଯାଞ୍ଚ ପ୍ରକ୍ରିୟାରେ ସାମିଲ କରିଥିଲା। ପରବର୍ତ୍ତୀ ସମୟରେ କମିଟି ପକ୍ଷରୁ ଗୋଟିଏ ଟିମ୍ ଘରକୁ ଆସି ଦୀୟାଙ୍କୁ ଭେଟିଥିଲା। କମିଟିର ଜୁରୀମାନଙ୍କ ରିପୋର୍ଟ ଯାଞ୍ଚ ପରେ ଜୁଲାଇ ୨୩ରେ ଦୀୟାଙ୍କୁ ଇଣ୍ଡିଆ ବୁକ୍ ରେକର୍ଡରେ ସ୍ଥାନ ମିଳିଥିଲା। ଦିଲ୍ଲୀରେ ଏକ ସମ୍ବର୍ଦ୍ଧନା କାର୍ଯ୍ୟକ୍ରମରେ ଏହି ସମ୍ମାନ ଦିଆଯିବାକୁ ସ୍ଥିର କରାଯାଇଥିଲା। ହେଲେ କରୋନା କଟକଣା ଯୋଗୁ ସମ୍ମାନସୂଚକ ମାନପତ୍ର, ମେଡ଼ାଲ କୋରିଅର ଜରିଆରେ ପଠାଯାଇଛି। ଏହା କିଛିଦିନ ତଳେ ପହଞ୍ଚିଛି ବୋଲି ପରିବାର ପକ୍ଷରୁ କୁହାଯାଇଛି।
ଏ ସମ୍ପର୍କରେ ଶୁଭଶ୍ରୀ କହିଛନ୍ତି, ଦୀୟା ଖୁବ୍ଶୀଘ୍ର ସମସ୍ତ ପାଠକୁ ଗ୍ରହଣ କରିପାରନ୍ତି। ଏପରି କି ହିନ୍ଦୀ, ଓଡ଼ିଆ ଗୀତ ମଧ୍ୟ ସେ ଗାଇପାରନ୍ତିି। ୟୁ-ଟ୍ୟୁବ୍ରେ ଗୀତ ଖୋଜିବାକୁ କହିଲେ ସେ ସହଜରେ ଖୋଜି ଦେଖାଇପାରନ୍ତିି। ଏସିଆ ବୁକ୍ ଅଫ ରେକର୍ଡକୁ ମଧ୍ୟ ଦୀୟାଙ୍କ ଭିଡ଼ିଓ ପଠାଯାଇଛି। ଖୁବ୍ଶୀଘ୍ର ଏହାର ଫଳାଫଳ ଜଣାପଡିବ। ଗିନିଜ ବୁକ୍ ଅଫ ରେକର୍ଡରେ ସେ ସ୍ଥାନ ପାଇବେ ବୋଲି ଆଶା ରହିଥିବା ପରିବାର ଲୋକେ କହିଛନ୍ତି।
