ନୂଆଦିଲ୍ଲୀ,୨୯।୯: ଦୀର୍ଘ ୨୧ ବର୍ଷ ପରେ ଜଣେ ବଳାତ୍କାର ଅଭିଯୁକ୍ତଙ୍କୁ ଦୋଷମୁକ୍ତ କରିଛନ୍ତି ମାନ୍ୟବର ସୁପ୍ରିମ କୋର୍ଟ। ଜଣେ ମହିଳାଙ୍କ ଦ୍ୱାରା ବଳାତ୍କାର ଅଭିଯୋଗ ଉପରେ ସୁପ୍ରିମକୋର୍ଟ କହିଛନ୍ତି ଯେ, ଏହା ବଳାତ୍କାର ନୁହେଁ ବରଂ ଉଭୟ ପରସ୍ପରକୁ ଗଭୀର ଭାବେ ପ୍ରେମ କରୁଥିଲେ। କୋର୍ଟ ଜାଣିବାକୁ ପାଇଥିଲେ ଯେ ୨୧ ବର୍ଷ ପୂର୍ବେ ଝିଅଟି ଯୁବକଙ୍କ ଉପରେ ବଳାତ୍କାର ଅଭିଯୋଗ ଏଥିପାଇଁ ଆଣିଥିଲେ କାରଣ ଉଭୟ ଭିନ୍ନ ଜାତିର ହୋଇଥିବାରୁ ସେମାନେ ବିବାହ କରିପାରି ନ ଥାନ୍ତେ। ୧୯୯୯ରେ ଝାଡଖଣ୍ଡର ଜଣେ ବ୍ୟକ୍ତିଙ୍କ ନାଁରେ ବଳାତ୍କାର ଏବଂ ବେଆଇନ ପ୍ରସବ ଅଭିଯୋଗ ହୋଇଥିଲା। କେବଳ ଏତିକି ନୁହେଁ, ପୀଡିତାଙ୍କ ଅଭିଯୋଗ ଉପରେ ସେ ଏକ ଟ୍ରାଏଲ କୋର୍ଟ ଦ୍ୱାରା ଦୋଷୀ ସାବ୍ୟସ୍ତ ହୋଇଥିଲେ ଏବଂ କୋର୍ଟ ୭ ବର୍ଷ ଜେଲ ଦଣ୍ଡାଦେଶ ଶୁଣାଇଥିଲେ। ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଥିବା ଏବଂ ଏହାର ଚିଠି ଦେଖାଇବା ସତ୍ତ୍ୱେ ଝାଡଖଣ୍ଡ ହାଇକୋର୍ଟ ମଧ୍ୟ ଟ୍ରାଏଲ କୋର୍ଟ ଦେଇଥିବା ଦଣ୍ଡକୁ ସମର୍ଥନ କରିଥିଲେ।
ସୋମବାର ଜଷ୍ଟିସ ଆରଏଫ ନରିମନଙ୍କ ନେତୃତ୍ୱରେ ଏକ ବେଞ୍ଚ ଏହା ଦୁର୍ଭାଗ୍ୟଜନକ ବୋଲି କହିଛି। ଝାଡଖଣ୍ଡ ହାଇକୋର୍ଟ ପ୍ରେମ ଚିଠି ଏବଂ ଫଟୋଗ୍ରାଫ ସହିତ ରେକର୍ଡର ପ୍ରମାଣ ଆକଳନ କରିବାରେ ବିଫଳ ହୋଇଛନ୍ତି। ବିବାହ ପ୍ରତିଶୃତି ଏବଂ ଭୟ ଯୋଗୁ ଯୋଗୁ ସେ ଯୌନ ସମ୍ପର୍କ ରଖିଥିବା ଦର୍ଶାଇ ସୁପ୍ରିମକୋର୍ଟ ପୀଡିତାଙ୍କ ସାକ୍ଷ୍ୟକୁ ପ୍ରତ୍ୟାଖ୍ୟାନ କରିଥିଲେ। ଜଷ୍ଟିସ ନବୀନ ସିହ୍ନା ଏହି ରାୟ ପ୍ରଦାନ କରିବାବେଳେ କହିଛନ୍ତି ଯେ, ନିଷ୍ପତ୍ତି ନେବାରେ ଆମର କୌଣସି ଦ୍ୱିଧା ନାହିଁ ଯେ କେବଳ ଯୁବତୀଙ୍କ ସମ୍ମତି ନୁହେଁ ବରଂ ସେ ଯାହା ବାଛିଥିଲେ ତାହା ମଧ୍ୟ ସେ ଜାଣିଛନ୍ତି। ଯୁବକଙ୍କୁ ବହୁତ ଭଲ ପାଉଥିବାରୁ ସେ ଏହା କରିଥିଲେ। ସ୍ବେଚ୍ଛାକୃତ ଭାବରେ ଶରୀରକୁ ତାଙ୍କୁ ଦେଇଥିଲେ ଯାହାକୁ ସେ ବହୁତ ଭଲ ପାଉଥିଲେ।
