ଭୁବନେଶ୍ୱର,୨୦।୮: ରାଜ୍ୟରେ ସମ୍ପ୍ରତି କରାଯାଇଥିବା ପଶୁ, ପକ୍ଷୀ ଏବଂ ବନ୍ୟପ୍ରାଣୀ ଗଣନାରୁ ମହାନଦୀରେ ୧୪ଟି ଘଡିଆଳ କୁମ୍ଭୀର ରହିଥିବା ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶରାମ ସିଂ ଖୁଣ୍ଟିଆ କହିଛନ୍ତି । ବିଧାନସଭାରେ ଆଜି ଏ ସମ୍ପର୍କିତ ଏକ ପ୍ରଶ୍ନର ଉତ୍ତରରେ ମନ୍ତ୍ରୀ ଖୁଣ୍ଟିଆ କହିଛନ୍ତି, ଭିତରକନିକାରେ ୧ ହଜାର ୮୫୦ଟି ବଉଳା କୁମ୍ଭୀର, ସାତକୋଶିଆରେ ୯୭, ଶିମିଳିପାଳରେ ୭୬ ଏବଂ ଘୋଡାହାଡ ଡ୍ୟାମ୍ରେ ୮୪ଟି ଗୋମୁହାଁ କୁମ୍ଭୀର ଅଛନ୍ତି।
ଏହି ଗଣନା ଅନୁଯାୟୀ, ସମଗ୍ର ରାଜ୍ୟରେ ୨ ହଜାର ୯୮ଟି ହାତୀ ଏବଂ ୨୭ଟି ବାଘ ଅଛନ୍ତି । ପକ୍ଷୀଗଣନା ତଥ୍ୟ ଆଧାରରେ, ମନ୍ତ୍ରୀ ଖୁଣ୍ଟିଆ କହିଛନ୍ତି, ଚିଲିକା ହ୍ରଦରେ ୧୦୮ ପ୍ରଜାତିର ୧୦ ଲକ୍ଷ ୯୯ ହଜାର, ଭିତରକନିକାରେ ୧୨୧ ପ୍ରଜାତିର ୧ ଲକ୍ଷ ୫୧ ହଜାର ଏବଂ ହୀରାକୁଦରେ ୧୪୩ ପ୍ରଜାତିର ୩ ଲକ୍ଷ ୪୨ ହଜାର ବିଦେଶାଗତ ପକ୍ଷୀ ଅଛନ୍ତି । ଚିଲିକା ସହ ରାଜ୍ୟର ସାମୁଦ୍ରିକ ଅଂଚଳରେ ୭୪୨ଟି ଡଲ୍ଫିନ୍ ଥିବା ସେ କହିଛନ୍ତି ।
ସେହିଭଳି ଗହୀରମଥାରେ ଥିବା ଅଲିଭ୍ ରିଡ୍ଲେ କଇଁଛଙ୍କ ସଂଖ୍ୟା ୩ ଲକ୍ଷରୁ ଅଧିକ ହେବ ବୋଲି ସେ କହିଛନ୍ତି । ତେବେ ଋଷିକୂଲ୍ୟା ମୁହାଣରେ ଅଲିଭ୍ ରିଡ୍ଲେ କଇଁଛ ଗଣଅଣ୍ଡାଦାନ ପ୍ରକ୍ରିୟା ଏପର୍ଯ୍ୟନ୍ତ ହୋଇନାହିଁ ବୋଲି ସେ ସ୍ପଷ୍ଟ କରିଛନ୍ତି ।
