ନୂଆଦିଲ୍ଲୀ,୧୩।୮(ପି.ଟି.): ଆସନ୍ତାବର୍ଷ ଭାରତରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ ପାଇଁ ବିକଳ୍ପ ଆୟୋଜକ ସ୍ଥିର କରିବା ନେଇ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ନିଷ୍ପତ୍ତି ଗ୍ରହଣ କରିବାକୁ ଯାଉଛି। ଯଦି ଭାରତ କୋଭିଡ୍-୧୯ ମହାମାରୀ କାରଣରୁ ଏହି ମେଗା ଇଭେଣ୍ଟ ଆୟୋଜନ କରିବାରେ ବିଫଳ ହୁଏ ତେବେ ଶ୍ରୀଲଙ୍କା ଓ ୟୁନାଇଟେଡ ଆରବ ଏମିରେଟ୍ସ (ୟୁଏଇ) ବ୍ୟାକ୍ ଅପ୍ ଭେନ୍ୟୁ ବା ବିକଳ୍ପ ଆୟୋଜକ ହେବେ ବୋଲି ଏକ ରିପୋର୍ଟରୁ ଜଣାଯାଇଛି। ଏହି ବିଶ୍ୱକପ୍ ଆୟୋଜନ ହେବାକୁ ଆହୁରି ଗୋଟିଏ ବର୍ଷ ବାକି ଅଛି। ତେବେ ଚଳିତ ବର୍ଷ ଅଷ୍ଟ୍ରେଲିଆରେ ଖେଳାଯିବାକୁ ଥିବା ଟି୨୦ ବିଶ୍ୱକପ୍କୁ କୋଭିଡ୍-୧୯ ମହାମାରୀ କାରଣରୁ ଘୁଞ୍ଚାଇବାକୁ ଆଇସିସି ନିଷ୍ପତ୍ତି ନେଇଥିଲା।
ନିର୍ଦ୍ଧାରିତି କାର୍ଯ୍ୟସୂଚୀ ଅନୁଯାୟୀ ଭାରତ ଆସନ୍ତାବର୍ଷ ଏହି ମେଗା ଇଭେଣ୍ଟ ଆୟୋଜନ କରିବ ବୋଲି ଆଇସିସି ଘୋଷଣା କରିଥିଲା। ଅନ୍ୟପଟେ ଚଳିତବର୍ଷ ଅଷ୍ଟ୍ରେଲିଆରେ ଆୟୋଜନ ହେବାକୁ ଥିବା ବିଶ୍ୱକପ୍କୁ ୨୦୨୨କୁ ଘୁଞ୍ଚାଇବାକୁ ଆଇସିସି ନିଷ୍ପତ୍ତି ନେଇଥିଲା। ପ୍ରତ୍ୟେକ ବିଶ୍ୱସ୍ତରୀୟ ତଥା ଆଇସିସି ଇଭେଣ୍ଟ ପାଇଁ କେତୋଟି ବ୍ୟାକ୍ ଅପ୍ ଭେନ୍ୟୁ ସ୍ଥିର କରାଯାଇଥାଏ। ତେବେ କୋଭିଡ୍-୧୯ ମହାମାରୀ ପାଇଁ ବର୍ତ୍ତମାନ ଏହି ବ୍ୟାକ୍ ଅପ୍ ଭେନ୍ୟୁଗୁଡିକର ଅତିରିକ୍ତ ମହତ୍ତ୍ୱ ସୃଷ୍ଟି ହୋଇଛି। ଏହି ମହାମାରୀ ଦୃଷ୍ଟିକୋଣରୁ ଦେଖିବାକୁ ଗଲେ ଭାରତ ବିଶ୍ୱର ତୃତୀୟ ସର୍ବାଧିକ ପ୍ରଭାବିତ ଦେଶ ସାବ୍ୟସ୍ତ ହୋଇଛି। ଏଥିପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଆଇପିଏଲ୍କୁ ୟୁଏଇକୁ ସ୍ଥାନାନ୍ତର କରିଛି। ଟୁର୍ନାମେଣ୍ଟ ଆହୁରି ଗୋଟିଏ ବର୍ଷ ବାକି ଥିବାରୁ ଏ ସଂକ୍ରାନ୍ତରେ ବିସିସିଆଇ ତରଫରୁ କୌଣସି ପ୍ରତିକ୍ରିୟା ପ୍ରକାଶ କରାଯାଇନାହିଁ।
