ସୁନାବେଡା,୧୪ା୨(ସ୍ବ. ପ୍ର.) ହାଲ୍ ସୁନାବେଡା ଟାଉନଶିପର ୪ ବର୍ଷ ବୟସର ରୁଦ୍ରାଂଶ କୁମାର ସାମଲ ଏକାଦଶ ଅଖିଳ ଭାରତ ଓପନ କରାଟେ ଚାମ୍ପିୟନଶିପ-୨୦୨୧ ପ୍ରତିଯୋଗିତାରେ ୨ଟି ରୌପ୍ୟ ପଦକ ଜିତିଛନ୍ତି। ଏହି କୃତିତ୍ୱ ହାସଲ କରିବାରେ ଓଡ଼ିଶାରେ ସେ ହେଉଛନ୍ତି ସର୍ବ କନିଷ୍ଠ କରାଟେକା। ଏହି ସର୍ବଭାରତୀୟ ପ୍ରତିଯୋଗିତା ଉତ୍କଳ କରାଟେ ସ୍କୁଲ ଭୁବନେଶ୍ୱରଠାରେ ଗତ ଡିସେମ୍ବର ୨୬ ରୁ ୨୮ ପର୍ଯ୍ୟନ୍ତ ତିନିଦିନ ଧରି ହୋଇଥିଲା। ଏବେ ଏହାର ଫଳାଫଳରୁ ରୁଦ୍ରାଂଶଙ୍କୁ ୨ଟି ରୌପ୍ୟ ପଦକ ମିଳିଥିବା ଜଣାପଡିଛି। ମାଆ ରାଣୀ ଇତିଶ୍ରୀ ମହାପାତ୍ର ଏବଂ ବାପା ରାଜେନ୍ଦ୍ର କେଶରୀ ସାମଲଙ୍କ ପୁଅ ରୁଦ୍ରାଂଶ ୬ ବର୍ଷ ବୟସର କ୍ୟାଟେଗୋରି କୁମୁଟେ(ଫାଇଟ)ରେ ଗୋଟିଏ ରୌପ୍ୟ ପଦକ ପାଇଥିବା ବେଳେ ଆଉ ଗୋଟିଏ ରୌପ୍ୟ ପଦକ କାଟାରେ ପାଇଛନ୍ତି। ବର୍ତ୍ତମାନ ରୁଦ୍ରାଂଶ ହାଲ୍ ଭିଏସ୍ ବିଦ୍ୟାଳୟରେ ଏଲ୍କେଜିରେ ଅଧ୍ୟୟନ କରୁଛନ୍ତି। ୨ ବର୍ଷ ବୟସରୁ ସେ ଉତ୍କଳ କରାଟେ ସ୍କୁଲ ସେମିଳିଗୁଡ଼ାରେ କରାଟେ ଅଭ୍ୟାସ କରୁଛନ୍ତି।
