ଓଏଚ୍‌ଆର୍‌ସିରେ ୨ ଜନସ୍ବାର୍ଥ ମାମଲା
7:23 amJune 1, 2023June 1, 2023 / 08

କଟକ ଅଫିସ,୧।୬: କଟକ ସହରରେ ଚାଲିଥିବା ବକ୍ସଡ୍ରେନ୍‌ ନିର୍ମାଣ ଓ ତାଳଦଣ୍ଡା କେନାଲର ଉନ୍ନତୀକରଣରେ ବେପରୁଆ କାର୍ଯ୍ୟ ଯୋଗୁ ଅକାଳରେ ଦୁଇଟି ଜୀବନ ଚାଲିଗଲା। ଆଉ ଜଣେ ଗୁରୁତର ଅବସ୍ଥାରେ ଚିକିତ୍ସାଧୀନ ଅଛନ୍ତି। ଦୁଇ ଦିନରେ ଦୁଇଟି ସ୍ଥାନରେ ଏଭଳି ଦୁର୍ଘଟଣା ଘଟିଥିବାବେଳେ ସୁରକ୍ଷା ବ୍ୟବସ୍ଥାକୁ ନେଇ ଆଇନଜୀବୀ ଶିବଶଙ୍କର ମହାନ୍ତି ପ୍ରଶ୍ନ ଉଠାଇଛନ୍ତି। ଏନେଇ ସେ ଓଡ଼ିଶା ମାନବାଧିକାର ଆୟୋଗ(ଓଏଚ୍‌ଆର୍‌ସି)ଙ୍କ ନିକଟରେ ଏକସଙ୍ଗେ ୨ଟି ଜନସ୍ବାର୍ଥ ମାମଲା ବୁଧବାର ଦାୟର କରିଛନ୍ତି। ମୃତାହତଙ୍କୁ ମୋଟ ୩୫ ଲକ୍ଷ ଟଙ୍କା କ୍ଷତିପୂରଣ ପ୍ରଦାନ ଦାବି ସହ ସୁରକ୍ଷା ବ୍ୟବସ୍ଥା ବାବଦରେ ଜିଲାପାଳଙ୍କୁ ରିପୋର୍ଟ ତଲବ ପାଇଁ ନିର୍ଦ୍ଦେଶ ଦେବାକୁ ସେ ଆବେଦନପତ୍ରରେ ଦର୍ଶାଇଛନ୍ତି।
ମାମଲାର ବିବରଣୀରୁ ପ୍ରକାଶ, ଜଳସମ୍ପଦ ବିଭାଗ ପକ୍ଷରୁ ତାଳଦଣ୍ଡା କେନାଲ ସୌନ୍ଦର୍ଯ୍ୟକରଣ କରାଯାଉଛି। ମାତ୍ର ନିର୍ମାଣସ୍ଥଳୀରେ କୌଣସି ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇନାହିଁ। ଏପରି କି ସଚେତନତା ଫଳକ ଲଗାଯାଇନାହିଁ। ଠିକା ସଂସ୍ଥା ମନ ଇଚ୍ଛା କାର୍ଯ୍ୟ ଜାରି ରଖିଛି। ଫଳରେ ସୋମବାର ମାତୃଭବନ ନିକଟରେ ଏକ କାର କେନାଲକୁ ଖସିପଡ଼ିଥିଲା। ଏଥିରେ ବ୍ୟବସାୟୀ ଜ୍ଞାନରଞ୍ଜନ ଜେନାଙ୍କ ମୃତ୍ୟ ଘଟିଥିବାବେଳେ ସ୍ତ୍ରୀ ଅଞ୍ଜନା ଗୁରୁତର ହୋଇ ଚିକିତ୍ସାଧୀନ ରହିଛନ୍ତି। ମୃତ ଜ୍ଞାନରଞ୍ଜନଙ୍କ ପରିବାରକୁ ୧୦ ଲକ୍ଷ ଓ ଚିକିତ୍ସାଧୀନ ଥିବା ଅଞ୍ଜନାଙ୍କୁ ୫ ଲକ୍ଷ ଟଙ୍କା କ୍ଷତିପୂରଣ ଦେବାକୁ ସେ ଦାବି କରିଛନ୍ତି।
ସେହିପରି କଟକ ଗମାଣ୍ଡିଆ ଅଞ୍ଚଳରେ ବକ୍ସଡ୍ରେନ୍‌ କାର୍ଯ୍ୟ ଜାରି ରହିଛି। ରାଉସାପାଟଣା ଅଞ୍ଚଳରୁ ଯୁକ୍ତଦୁଇ ଛାତ୍ରୀ ଏନ୍‌. ମୋହିନି ଦାସ(୧୭) ମଙ୍ଗଳବାର କେନାଲ ପାର ହେଉଥିବାବେଳେ ଲୁହା ପାଇପ ମଧ୍ୟରେ ପ୍ରାୟ ୧ଘଣ୍ଟା ଧରି ଚାପି ହୋଇ ରହିଥିଲେ। ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରାଯାଇ ଡାକ୍ତରଖାନା ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ମୋହିନିଙ୍କ ପରିବାରକୁ ୨୦ ଲକ୍ଷ ଟଙ୍କା କ୍ଷତିପୂରଣ ଦେବାକୁ ସେ ଆବେଦନପତ୍ରରେ ଦର୍ଶାଇଛନ୍ତି। ଉଭୟ ସ୍ଥାନରେ ଠିକାସଂସ୍ଥାର ବେପରୁଆ କାର୍ଯ୍ୟ ଯୋଗୁ ଅଘଟଣ ଘଟିଥିବାବେଳେ ନିର୍ମାଣସ୍ଥଳୀରେ ସୁରକ୍ଷା ବ୍ୟବସ୍ଥା ପ୍ରସଙ୍ଗରେ ଜାଇକାର ମୁଖ୍ୟ ଯନ୍ତ୍ରୀ, ସିଏମ୍‌ସି କମିଶନର ଏବଂ ତାଳଦଣ୍ଡା କେନାଲ ଘଟଣାରେ ଜଳସମ୍ପଦ ବିଭାଗ, ପୂର୍ତ୍ତବିଭାଗ ଓ ପୋଲିସକୁ ପକ୍ଷଭୂକ୍ତ କରି କାରଣ ଦର୍ଶାଇବା ନିମନ୍ତେ ଆବେଦନକାରୀଙ୍କ ପକ୍ଷରୁ ଦାବି କରାଯାଇଛି।