ନୂଆଦିଲ୍ଲୀ,୨୮।୮: କରୋନା ପ୍ରଭାବ ଭାରତୀୟ ବଜାର ଉପରେ ଜାରି ରହିଛି। ଆଇଟି ଶିଳ୍ପରେ ବିଭିନ୍ନ ସମୟରେ ଛଟେଇ ନେଇ ଖବର ଆସିଥାଏ। ହେଲେ କରୋନା ଯୋଗୁ ଦେଶର ଆଇଟି ଶିଳ୍ପରେ ପ୍ରାୟ ୨ ଲକ୍ଷ ଲୋକ ନିଯୁକ୍ତି ହରାଇବେ ବୋଲି ଏକ ରିପୋର୍ଟ ସାମ୍ନାକୁ ଆସିଛି। କୋଭିଡ-୧୯ ଯୋଗୁ ଉଭୟ ଆଇଟି ଏବଂ ଆଇଟି ଭିତ୍ତିକ ସେବା କ୍ଷେତ୍ର ଗଭୀର ଭାବେ କ୍ଷତିଗ୍ରସ୍ତ ହୋଇଥିବା ଜଣାପଡିଛି। ଆଇଟି ଏବଂ ଆଇଟିଇଏସ୍ ଭଳି କ୍ଷେତ୍ରଗୁଡିକରେ ନିଯୁକ୍ତି ଉପରେ ଏଭଳି ପ୍ରଭାବ ପଡିବ ବୋଲି ଶିଳ୍ପ ପକ୍ଷରୁ କୁହାଯାଇଛି। ଶିଳ୍ପର ମୋଟ କର୍ମଚାରୀଙ୍କ ମଧ୍ୟରୁ ପ୍ରାୟ ୫% କର୍ମଚାରୀ ଏହା ଦ୍ୱାରା ପ୍ରଭାବିତ ହେବ ବୋଲି କୁହାଯାଉଛି। ସୂଚନା ଯୋଗ୍ୟ ଦେଶର ଆଇଟି ଏବଂ ବିପିଏମ୍ ସେକ୍ଟରରେ ପ୍ରାୟ ୪୪ ଲକ୍ଷ ଲୋକ ନିଯୁକ୍ତି ପାଇଛନ୍ତି। ପ୍ରତ୍ୟକ୍ଷ ଏବଂ ପରୋକ୍ଷ ଭାବେ ଏଭଳି ନିଯୁକ୍ତି ଲୋକମାନେ ପାଇଛନ୍ତି। ଏହା ମଧ୍ୟରୁ ପରଫରମାନ୍ସ ଭିତ୍ତିରେ ୨ରୁ ୩% ଲୋକଙ୍କର ଚାକିରି ପ୍ରଭାବିତ ହୋଇଥାଏ। ହେଲେ ଚଳିତ ବର୍ଷ କରୋନା ଯୋଗୁ ସ୍ଥିତି ଭିନ୍ନ ରହିଛି। ଫଳରେ ପ୍ରାୟ ୫% କର୍ମଚାରୀ ଏହା ଦ୍ୱାରା ପ୍ରଭାବିତ ହେବେ ବୋଲି ରିପୋର୍ଟରେ କୁହାଯାଇଛି।
