ଅମରପାଲି, ୨୪ା୨(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ଅଞ୍ଚଳରେ କିଡ୍ନୀ ଆକ୍ରାନ୍ତଙ୍କ ସଂଖ୍ୟା ବଢିବାରେ ଲାଗିଛି। ଗତ ଦୁଇଦିନ ମଧ୍ୟରେ ୨ କିଡନୀ ଆକ୍ରାନ୍ତଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି। ଗତ ୨୦ ତାରିଖ ବ୍ଲକ ଅନ୍ତର୍ଗତ ବହଳପଦର ପଞ୍ଚାୟତ ଗୁଦୁଗୁଦା ଗ୍ରାମର ପ୍ରହଲ୍ଲାଦ ପଧାନ(୭୩)ଙ୍କ କିଡ଼ନୀ ରୋଗରେ ମୃତ୍ୟୁ ଘଟିଥିବା ବେଳେ ୨୧ତାରିଖରେ ବୀରମହାରାଜପୁର ଉପଖଣ୍ଡ ସୂଚନା କେନ୍ଦ୍ର ଓ ପାଠାଗାରରେ କାର୍ଯ୍ୟରତ ଚତୁର୍ଥ ଶ୍ରେଣୀ କର୍ମଚାରୀ ସାମନ୍ତ କୁମ୍ଭାର(୫୮)ଙ୍କ ଏଡି ରୋଗରେ ମୃତ୍ୟୁ ଘଟିଛି। ଉଭୟେ ଦୀର୍ଘଦିନ ହେଲା କିଡ଼ନୀ ରୋଗରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିଲେ।
ବହଳପଦର ପଞ୍ଚାୟତ ଗୁଦୁଗୁଦା ଗ୍ରାମର ପ୍ରହଲ୍ଲାଦ ପ୍ରଧାନ ୨୦୧୬ରୁ କିଡ଼ନୀ ଆକ୍ରାନ୍ତ ହୋଇଥିଲେ। ତାଙ୍କୁ ଜର ହେବାରୁ ପ୍ରଥମେ ବୀରମହାରାଜପୁର ଚିକିତ୍ସାଳୟରେ ଚିକିତ୍ସା ହୋଇଥିଲେ। ମାତ୍ରେ ନ କମିବାରୁ ସେ ସୋନପୁର ଓ ପରେ ସମ୍ବଲପୁର ଡାକ୍ତରଖାନା ଯାଇ ଚିକିତ୍ସା ହୋଇଥିଲେ। ସମ୍ବଲପୁରରେ ପରୀକ୍ଷା ପରେ ତାଙ୍କୁ କିଡ଼ନୀ ରୋଗ ହୋଇଥିବା ଜଣାପଡିଥିଲା। ପରେ ସେ ବୁର୍ଲା ବଡ଼ ଡାକ୍ତରଖାନା ଯାଇ ଚିକିତ୍ସିତ ହୋଇଥିଲେ। ସେଠାରେ ରୋଗ ଭଲ ନ ହେବାରୁ ସେ କଟକ ବଡ଼ ମେଡ଼ିକାଲ ଓ ଭୁବନେଶ୍ବରର ଘରୋଇ ଚିକିତ୍ସାଳୟରେ ଚିକିତ୍ସିତ ହୋଇଥିଲେ। ସ୍ତ୍ରୀଙ୍କର ୨ବର୍ଷ ପୂର୍ବରୁ ମୃତ୍ୟୁ ଘଟିଥିଲା। ବଡଝିଅର ବିବାହ ହୋଇସାରିଛି। ପ୍ରହଲ୍ଲାଦଙ୍କ ମୃତ୍ୟୁ ପରେ ଏବେ ସାନଝିଅ ପ୍ରତିମାରାଣୀ ଏକୁଟିଆ ହୋଇଯାଇଛନ୍ତି। ସେହିପରି ବୀରମହାରାଜପୁର ଉପଖଣ୍ଡ ସୂଚନା କେନ୍ଦ୍ର ଓ ପାଠାଗାରର ଚତୁର୍ଥ ଶ୍ରେଣୀ କର୍ମଚାରୀ ସାମନ୍ତ କୁମ୍ଭାର ମଧ୍ୟ ଦୁଇବର୍ଷ ହେଲା କିଡ଼ନୀ ରୋଗର ଆକ୍ରାନ୍ତ ହୋଇଥିଲେ। ସେ ମଧ୍ୟ ଧାରକରଜ କରି ଚିକିତ୍ସିତ ହେଉଥିଲେ। ସାମନ୍ତଙ୍କ ଘର ବଲାଙ୍ଗୀର ଜିଲା ଗଏଁତଲା ଗ୍ରାମରେ।
ସେହିପରି ଫେବୃଆରୀ ପ୍ରଥମ ସପ୍ତାହରେ ଦାଦରପାଲି ଗ୍ରାମର ପୁରନ୍ଦର ଭେସେରା(୪୫)ଙ୍କ କିଡ଼ନୀ ରୋଗର ମୃତ୍ୟୁ ଘଟିଥିବା ଅଭିଯୋଗ ହୋଇଥିଲା। ସେ କୁଲିମଜୁରି କରି ପରିବାର ଚଳାଉଥିଲେ। ତାଙ୍କ ମୃତ୍ୟୁ ପରେ ପୁରନ୍ଦରଙ୍କ ପରିବାର ଲୋକ ଏବେ ଅସହାୟ ହୋଇ ପଡିଛନ୍ତି। କିଡ଼ନୀ ରୋଗୀଙ୍କ ମୃତ୍ୟୁ ପରେ ସ୍ବାସ୍ଥ୍ୟ ବିଭାଗ ତରଫରୁ କେତେକଙ୍କ ଘରକୁ ଯାଇ କେବଳ ପଚରାଉଚରା କରି କାମ ସାରି ଦେଉଛନ୍ତି। ମାତ୍ର ସମ୍ପୃକ୍ତ ପରିବାରକୁ କୌଣସି ଆର୍ଥିକ ସହାୟତା ପ୍ରଦାନ କରାଯାଉନାହିଁ। ଏପରିକି ଏହି ଅଞ୍ଚଳରୁ ଏତେ ସଂଖ୍ୟକ କିଡ଼ନୀ ରୋଗୀଙ୍କ ମୃତ୍ୟୁ ଘଟୁଥିଲେ ମଧ୍ୟ ପ୍ରତିକାର ପାଇଁ ଆଖିଦୃଶିଆ କୌଣସି ପଦକ୍ଷେପ ନିଆଯାଉନାହିଁ। ଏବେ ମଧ୍ୟ ବୀରମହାରାଜପୁର ଅଞ୍ଚଳରେ ଶତାଧିକ କିଡ଼ନୀ ରୋଗୀ ଥିଲେ ମଧ୍ୟ ଚିକିତ୍ସା ପାଇଁ କୌଣସି ବ୍ୟବସ୍ଥା ମିଳିପାରୁନାହିଁ। ଏହି ଅଞ୍ଚଳର ଗୁରୁତର କିଡନୀ ରୋଗୀମାନେ ଡାଏଲିସିସ ପାଇଁ ବୌଦ୍ଧ, ସମ୍ବଲପୁର, ବୁର୍ଲା, ସୋନପୁର ମେଡ଼ିକାଲ ଉପରେ ନିର୍ଭର କରୁଛନ୍ତି। ଏ ନେଇ ବୀରମହାରାଜପୁର ଉପଖଣ୍ଡ ଚିକିତ୍ସାଳୟ ଅଧ୍ୟକ୍ଷ ସୁବାଷ ପଣ୍ଡାଙ୍କୁ ତାଙ୍କ ମୋବାଇଲ ନଂ.୮୦୯୩୬୬୭୮୪୪ରେ ଯୋଗାଯୋଗ କରାଯାଇଥିଲା। ହେଲେ ସେ କଲ୍ ରିସିଭ ନ କରିବାରୁ ପ୍ରତିକ୍ରିୟା ମିଳି ପାରିନାହିଁ।
Dharitri – Odisha’s No.1 Odia Daily
