କାଳିଆପାଣି,୩୧ା୧୦(ଡି.ଏନ.ଏ.): କାଳିଆପାଣି ଖଣି ଅଞ୍ଚଳରେ ଟ୍ରାଫିକ ସମସ୍ୟା ବିପର୍ଯ୍ୟସ୍ତ ହୋଇପଡ଼ିଛି। ଟ୍ରକଗୁଡ଼ିକ ବେଆଇନ ଧାଡ଼ି ଲଗାଇବା ଯୋଗୁ ଏକ ଆମ୍ବୁଲାନ୍ସ ରବିବାର ସକାଳ ୮ରୁ ପୂର୍ବାହ୍ନ ୧୦ଟା ଯାଏ ଫସି ରହିଥିଲା। କାଳିଆପାଣି ଥାନା ପୋଲିସକୁ ଟ୍ରାଫିକ ଜାମ୍ ହଟାଇବା ପାଇଁ ୨ ଘଣ୍ଟା ଲାଗିଥିଲା। ଫଳରେ ଜଣେ ଗର୍ଭବତୀ ଯନ୍ତ୍ରଣାରେ ଛଟପଟ ହୋଇଥିଲେ। ଖଣି ଅଞ୍ଚଳକୁ କ୍ରୋମାଇଟ୍ ଲୋଡିଂ ପାଇଁ ଆସୁଥିବା ଟ୍ରକ୍ଗୁଡ଼ିକ ଫାଷ୍ଟ କମ୍ ଫାଷ୍ଟ ଲୋଡିଂ ନିୟମରେ ରାସ୍ତାକଡରେ ଧାଡ଼ି କରି ଠିଆ ହୋଇ ନିଜ ସିରିୟଲ ନମ୍ବର ପାଇବାକୁ ଅପେକ୍ଷା କରି ରହୁଛନ୍ତି। ସେହିପରି ସମାନ ଦିଗକୁ ମୁହଁ କରି ଅପରପାର୍ଶ୍ୱ ରାସ୍ତାରେ ମଧ୍ୟ ଟ୍ରକଗୁଡ଼ିକ ୫୦ ମିଟର ଯାଏ ଠିଆ ହୋଇ ନମ୍ବର ପାଇବାକୁ ଜଗି ରହୁଛନ୍ତି। ଏଭଳି ବେଆଇନ କାର୍ଯ୍ୟ ହେଉଥିଲେ ମଧ୍ୟ ପୋଲିସ ନୀରବଦ୍ରଷ୍ଟା ସାଜୁଛି। ଏଥିପାଇଁ ପୋଲିସ ଲାଭବାନ ହେଉଥିବାବେଳେ ସାଧାରଣ ଲୋକ ରାସ୍ତାମଝିରେ ଫସି ରହି ଦହଗଞ୍ଜ ହେଉଛନ୍ତି।
ପୋଲିସ ଉପସ୍ଥିତିରେ କମ୍ପାନୀ ସିକ୍ୟୁରିଟି ଗାର୍ଡ ଟ୍ରକଗୁଡ଼ିକୁ ସିରିୟଲ ନମ୍ବର ଦେଇଥାନ୍ତି। ଏହି ସମୟରେ ଟ୍ରକଗୁଡ଼ିକ ଧସେଇ ପଶି ଆସିଥାନ୍ତି। ଏଥିଯୋଗୁ ଟମକା -ମଙ୍ଗଳପୁର ରାସ୍ତାର କମର୍ଦ୍ଦାଠାରୁ କଲରଙ୍ଗୀ ଛକ ପର୍ଯ୍ୟନ୍ତ ନାହିଁ ନ ଥିବା ଜାମ୍ ଦେଖିବାକୁ ମିଳୁଛି। ଶନିବାର ସରୁଆବିଲ ଖଣିରୁ କ୍ରୋମାଇଟ ଲୋଡିଂ କରିବାକୁ ଠିଆ ହୋଇଥିବା ଟ୍ରକଗୁଡିକ ଜାମ କରିବାରୁ ସ୍ଥାନୀୟ ମହିଳାମାନେ ଠେଙ୍ଗା ଧରି ଟ୍ରକଗୁଡ଼ିକୁ ଗୋଡ଼ାଇଥିଲେ। ହେଲେ ରବିବାର ସ୍ଥିତି ଅତ୍ୟନ୍ତ ଚିନ୍ତାଜନକ ଥିଲା। ଫେକର ବେଦାନ୍ତ ଖଣିରୁ କ୍ରୋମାଇଟ ଲୋଡିଂ କରିବାକୁ ଆସି ଠିଆ ହୋଇଥିବା ଟ୍ରକଗୁଡ଼ିକ ମଝିରେ ଅନ୍ୟ ଟ୍ରକଗୁଡ଼ିକୁ ଭର୍ତ୍ତି କରାଯାଉଥିଲା। ଏହାଦ୍ବାରା ଅନ୍ୟ ଦିଗରୁ ଆସୁଥିବା ଗାଡ଼ିଗୁଡ଼ିକ ଫସି ରହିଥିଲା। ସେଥିମଧ୍ୟରେ କାଳିଆପାଣି ଅଞ୍ଚଳରୁ ଜଣେ ଗର୍ଭବତୀଙ୍କୁ ସୁକିନ୍ଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଉଥିବା ଆମ୍ବୁଲାନ୍ସ ଅଟକି ଯାଇଥିଲା। ପ୍ରତିଦିନ ଏଭଳି ସ୍ଥିତି ଉପୁଜୁଥିଲେ ମଧ୍ୟ ପୋଲିସ କୌଣସି କାର୍ଯ୍ୟାନୁଷ୍ଠାନ ନେଉ ନାହିଁ। ଏସ୍ପି, ଜିଲାପାଳ ତୁରନ୍ତ ଏହାର ସ୍ଥାୟୀ ସମାଧାନ ନ କଲେ ବଡ଼ଧରଣର ଆନ୍ଦୋଳନ ହେବ ବୋଲି ସ୍ଥାନୀୟ ଲୋକମାନେ ଚେତାବନୀ ଦେଇଛନ୍ତି।
