ଦିଗପହଣ୍ଡି,୨୨।୧(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଛଣମେରି ପଞ୍ଚାୟତ ପେଣ୍ଡୁରାଖାଳି ଗ୍ରାମର ସିମାଞ୍ଚଳ ଗୌଡ଼ ଏବଂ ତାଙ୍କ ସ୍ତ୍ରୀ ଗେଲି ଗୌଡ଼ଙ୍କୁ ଗାଁର ଦୁଇଭାଇ ଜୟଗୁରୁ ପାତ୍ର ଏବଂ ପୂର୍ଣ୍ଣଗୁରୁ ପାତ୍ର କାତିରେ ହାଣି ହତ୍ୟା ଉଦ୍ୟମ କରିଥିବା ଅଭିଯୋଗ ହୋଇଛି।ଗୁରୁବାର ସକାଳ ପ୍ରାୟ ସାଢ଼େ ୯ ଟାରେ ଦମ୍ପତ୍ତି ନିଜ ଘର ଛାତ ଉପରେ ଥିବାବେଳେ ଦୁଇ ଭାଇ ସେଠାରେ ପହଞ୍ଚି ଘାତକ ଆକ୍ରମଣ କରିଥିଲେ। ପ୍ରଥମେ ସ୍ବାମୀ ସିମାଞ୍ଚଳଙ୍କୁ ଆକ୍ରମଣ କରିବା ଦେଖି ସ୍ତ୍ରୀ ଗେଲି ତାଙ୍କୁ ଉଦ୍ଧାର କରିବାକୁ ଯିବାବେଳେ ତାଙ୍କ ମୁଣ୍ଡକୁ ମଧ୍ୟ ଜୟଗୁରୁ ଧରିଥିବା କାତିରେ ଚୋଟ ମାରିଥିଲେ। ସାହି ପଡୋଶୀ ଉଭୟଙ୍କୁ ରକ୍ତାକ୍ତ ଅବସ୍ଥାରେ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ଥିବାରୁ ଉଭୟଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ଖବରପାଇ ପାଟପୁର ପୋଲିସ ଟିମ ଗାଁରେ ପହଞ୍ଚି ଅଭିଯୁକ୍ତ ଦୁଇ ଭାଇଙ୍କୁ କାବୁ କରିଥିଲେ। ଉଭୟଙ୍କୁ ଥାନାରେ ଅଟକ ରଖାଯାଇଛି। ସନ୍ଧ୍ୟା ସୁଦ୍ଧା ଥାନାରେ ଏତଲା ହୋଇନଥିବା ଆଇଆଇସି ଦୀପ୍ତି ରଞ୍ଜନ ବେହେରା କହିଛନ୍ତି। ସକାଳେ ପୂର୍ବ ଶତ୍ରୁତାକୁ ନେଇ ସିମାଞ୍ଚଳ ଏବଂ ଜୟଗୁରୁ ଦୁଇ ପରିବାର ଲୋକଙ୍କ ମଧ୍ୟରେ ବଚସା ହୋଇଥିଲା। ସିମାଞ୍ଚଳ ଜୟଗୁରୁଙ୍କ ମା’ଙ୍କୁ ଠେଲି ଦେବାରୁ ତାଙ୍କ ବାମହାତ ଭାଙ୍ଗିଯାଇଛି।ଏଥିରେ ଉତ୍ତେଜିତ ହୋଇ ଦୁଇ ଭାଇ ଦମ୍ପତ୍ତିଙ୍କୁ କାତି ଓ ଠେଙ୍ଗାରେ ଆକ୍ରମଣ କରିଥିବା ନେଇ ପ୍ରାଥମିକ ତଦନ୍ତରୁ ଜଣାପଡ଼ିଥିବା ଆଇଆଇସି କହିଛନ୍ତି।
