ନୂଆଦିଲ୍ଲୀ, ୭।୯ : ଇଣ୍ଡିଆ ଏୟାରଲାଇନ୍ସର ବୋଇଙ୍ଗ ୭୩୭ ବିମାନକୁ ୧୯୮୧ରେ ଅପହରଣ କରିଥିବା ଆତଙ୍କବାଦୀଙ୍କ ପାକିସ୍ତାନୀ ଲିଙ୍କ୍ର ପର୍ଦ୍ଦାଫାଶ୍ ହୋଇଛି। ଏହି ଆତଙ୍କବାଦୀ ଜଣଙ୍କ ସୋସିଆଲ ମିଡିଆରେ ନିଜର ଏକ ଫଟୋ ପୋଷ୍ଟ କରି ପାକିସ୍ତାନରେ ରହିଥିବାର ପ୍ରମାଣ ଦେଇଛନ୍ତି। ଆତଙ୍କବାଦୀ ଗଜିନ୍ଦର ସିଂ ହେଉଛନ୍ତି ଦଲ ଖାଲସା ନାମକ ଏକ ମୌଳବାଦୀ ସଂଗଠନର ସହ-ପ୍ରତିଷ୍ଠାତା।
ଗଣମାଧ୍ୟମ ରିପୋର୍ଟ ଅନୁଯାୟୀ, ଗଜିନ୍ଦର ସିଂ ସୋମବାର ତାଙ୍କର ଫେସବୁକ ପ୍ରୋଫାଇଲରେ ନିଜର ଏକ ଫଟୋ ପୋଷ୍ଟ କରିଛନ୍ତି। ଯେଉଁଥିରେ ସେ ପାକିସ୍ତାନର ପଞ୍ଜାବ ପ୍ରଦେଶର ହାସନ ଅବଦାଲରେ ଥିବା ଗୁରୁଦ୍ୱାର ପାନିଆ ସାହେବ ବାହାରେ ଠିଆ ହୋଇଥିବାର ନଜର ଆସିଛନ୍ତି। ଜାନୁଆରୀ ୨୦୦୨ରେ ଭାରତ ଗଜିନ୍ଦର ସିଂଙ୍କ ମୋଷ୍ଟ ଓ୍ବାଣ୍ଟେଡ ଆତଙ୍କବାଦୀ ତାଲିକାରେ ରଖିଥିଲା। ଭାରତ ତାଙ୍କୁ ପାକିସ୍ତାନରୁ ପ୍ରତ୍ୟର୍ପଣ କରିବାକୁ ଲଗାତାର ଚେଷ୍ଟା କରୁଛି।
୧୯୮୧ ସେପ୍ଟେମ୍ବର ୨୯ରେ, ଗଜିନ୍ଦର ସିଂଙ୍କ ସମେତ ପାଞ୍ଚ ଜଣ ଖାଲସା ଆତଙ୍କବାଦୀ ଦିଲ୍ଲୀର ପାଲମ ବିମାନ ବନ୍ଦରରୁ ଅମୃତସରର ରାଜା ସାନସି ବିମାନବନ୍ଦରକୁ ଉଡାଣ କରୁଥିବା ଇଣ୍ଡିଆନ ଏୟାରଲାଇନ୍ସର ବୋଇଙ୍ଗ ୭୩୭ ବିମାନକୁ ଅପହରଣ କରି ନେଇଥିଲେ। ପାକିସ୍ତାନର ଲାହୋରକୁ ନିଆଯାଇଥିବା ବିମାନରେ ୧୧୧ ଯାତ୍ରୀ ଏବଂ ୬ ଜଣ କ୍ରୁ ସଦସ୍ୟ ଥିଲେ। ଗଜିନ୍ଦର ସିଂ ତାଙ୍କ ଦାବି ପାକିସ୍ତାନର ତତ୍କାଳୀନ ରାଷ୍ଟ୍ରଦୂତ ନଟୱର ସିଂଙ୍କ ଆଗରେ ରଖିଥିଲେ। ଯେଉଁଥିରେ ପୃଥକ ଶିଖ ହୋମଲାଣ୍ଡ, ଜର୍ନେଲ ସିଂ ଭିନ୍ଦରନୱାଲେ ଏବଂ ଅନ୍ୟ ଖାଲିସ୍ତାନ ଆନ୍ଦୋଳନର ସମର୍ଥକଙ୍କୁ ମୁକ୍ତ କରିବା ଏବଂ ୫୦ ଲକ୍ଷ ଡଲାର ଦାବି କରାଯାଇଥିଲା।
ବିମାନକୁ ଅପହରଣ କରିଥିବା ଉଗ୍ରବାଦୀଙ୍କର ପାକିସ୍ତାନରେ ବିଚାର କରାଯାଇଥିଲା ଏବଂ ଅପହରଣକାରୀଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରାଯାଇଥିଲା। ୧୪ବର୍ଷ କାରାଦଣ୍ଡ ଭୋଗିବା ପରେ ଅକ୍ଟୋବର ୧୯୯୪ ରେ ଗଜିନ୍ଦର ସିଂଙ୍କୁ ମୁକ୍ତ କରାଯାଇଥିଲା। ଭାରତ ସରକାର ତାଙ୍କୁ ପାକିସ୍ତାନରୁ ପ୍ରତ୍ୟର୍ପଣ କରିବାକୁ ଦାବି କରିଥିଲେ। ପରେ ୨୦୦୨ ରେ, ଗଜିନ୍ଦର ସିଂଙ୍କ ନାମ ଭାରତର ୨୦ ଜଣ ମୋଷ୍ଟ ଓ୍ବାଣ୍ଟେଡ ଆତଙ୍କବାଦୀଙ୍କ ତାଲିକାରେ ଅନ୍ତର୍ଭୁକ୍ତ ହୋଇଥିଲା।
