ବାରଙ୍ଗ,୮।୨(ଡି.ଏନ୍.ଏ.): ପ୍ରାଣୀ ଉଦ୍ୟାନ ନନ୍ଦନକାନନରେ ରବିବାର ମିଜୋରାମର ଆଇଜଲ ଚିଡିଆଖାନାରୁ ୫ ପ୍ରଜାତିର ୧୮ ନୂଆ ପଶୁପକ୍ଷୀ ପହଞ୍ଚତ୍ଛନ୍ତି। କରୋନା କଟକଣା ଯୋଗୁ ଜୀବଜନ୍ତୁ ଆଣିବା ପ୍ରକିୟା ବନ୍ଦ ଥିବାବେଳେ ଚଳିତବର୍ଷର ଏହା ପ୍ରଥମ ଅଦଳବଦଳ ପ୍ରକିୟାର ଶୁଭାରମ୍ଭ ହୋଇଛି। ଏହି ନୂଆ ଅତିଥିମାନଙ୍କ ମଧ୍ୟରେ ରହିଛନ୍ତି ହିମାଳୟ କଳା ଭାଲୁ ୨, ବଳିଆ କୁକୁର ୨, ଆସାମିଜ୍ ମାଙ୍କଡ଼ ୨, ଷ୍ଟମ୍ପଟେଲ ମାଙ୍କଡ଼ ୬, ଏସୀୟ ବାଦାମୀ କଇଁଛ ୬। ଆସିଥିବା ସମସ୍ତ ଜୀବଜନ୍ତୁ ସୁସ୍ଥ ଥିବାବେଳେ ସେମାନଙ୍କର ସ୍ବାସ୍ଥ୍ୟ ପରୀକ୍ଷା ପାଇଁ ଡାକ୍ତରମାନଙ୍କ ନଜରବନ୍ଦୀରେ ସମସ୍ତଙ୍କୁ ରଖାଯାଇଛି। ତେବେ ଗତ ୨୮ତାରିଖରେ ଏହି ନୂଆ ଅତିଥିଙ୍କୁ ଆଣିବାକୁ ଏସିଏଫ ବନମାଳି ସାହୁଙ୍କ ନେତୃତ୍ୱରେ ୬ଜଣିଆ ଦଳ ୨ଟି ଗାଡିନେଇ ଆଇଜଲ ଅଭିମୁଖେ ଯାତ୍ରା ଆରମ୍ଭ କରିଥିଲେ। ତେବେ ଆସିଥିବା ନୂଆ ଅତିଥିମାନଙ୍କ ମଧ୍ୟରେ ଷ୍ଟମ୍ପଟେଲ ମାଙ୍କଡ଼ ଓ ଏସୀୟ ବାଦାମୀ କଇଁଛ ନନ୍ଦନକାନନ ପାଇଁ ନୂଆ ପ୍ରଜାତିର ହୋଇଥିବାବେଳେ ବଳିଆ କୁକୁର, ଆସାମିଜ ମାଙ୍କଡ଼ ଓ ହିମାଳୟ କଳାଭାଲୁ ପୂର୍ବରୁ ଥିଲେ। ଏହି ୧୮ଟି ଜୀବଜନ୍ତୁଙ୍କ ବଦଳରେ ନନ୍ଦନକାନନକୁ ଦେବାକୁ ପଡିଛି ୪ଟି ମୟୂର ଓ ଗୋଲଡେନ୍ ଫିଜାଣ୍ଟ ୪, ସିଲଭର ଫିଜାଣ୍ଟ ୪କୁ ମିଶାଇ ୧୨ଟି ପକ୍ଷୀ। ଆଇଜଲକୁ ଦେବାକୁ ପଡୁଥିବା ୧୨ଟି ପକ୍ଷୀକୁ ଏଠାରୁ ଯାଇଥିବା ଟିମ୍ ସାଙ୍ଗରେ ନେଇଯାଇଥିଲେ। ଏମାନେ ଆସିବା ପରେ ସେମାନଙ୍କ ସ୍ବାସ୍ଥ୍ୟାବସ୍ଥା ଅନୁଧ୍ୟାନ ପାଇଁ ଏନକ୍ଲୋଜୋରରେ ଛଡ଼ାଯାଇ ଡାକ୍ତରମାନଙ୍କ ନଜରବନ୍ଦୀରେ ରଖାଯାଇଥିବାରୁ ଏବେ ପର୍ଯ୍ୟଟକମାନେ ଏମାନଙ୍କୁ ଦେଖିବାରୁ ବଞ୍ଚତ୍ତ ହେବେ। ଷ୍ଟମ୍ପଟେଲ ମାଙ୍କଡ଼ ୬ଟିକୁ ଡାକ୍ତରଖାନା ପାଖ କ୍ୱାରାଣ୍ଟାଇନରେ ରଖାଯାଇଛି। ସେହିଭଳି ଭାବେ ୧୫ନଂ ଏନକ୍ଲୋଜରର ବ୍ୟାକକ୍ରଲରେ ରହିଲେ ୨ ହିମାଳୟ କଳା ଭାଲୁ, ୨୦ନଂ ଏନକ୍ଲୋଜରର ବ୍ୟାକକ୍ରଲ ଓ ଫିଡିଂଚାମ୍ବରରେ ୨ ବଳିଆ କୁକୁର, ୨ଆସାମିଜ ମାଙ୍କଡ ମାଙ୍କଡ ଏନକ୍ଲୋଜରରେ ରହିଲେ। ସରୀସୃପ ଉଦ୍ୟାନରେ ରହିଲେ ୬ ଏସୀୟ ବାଦାମୀ କଇଁଛ। ନନ୍ଦନକାନନକୁ ଆସିଥିବା ନୂଆ ପଶୁପକ୍ଷୀମାନେ ସୁସ୍ଥ ଥିବାବେଳେ ଆଗାମୀ ଦିନରେ ପର୍ଯ୍ୟଟକଙ୍କ ପାଇଁ ଆକର୍ଷଣର କେନ୍ଦ୍ରବିନ୍ଦୁ ସାଜିବେ ବୋଲି ନନ୍ଦନକାନନ ସହକାରୀ ନିର୍ଦ୍ଦେଶକ ଅମୂଲ୍ୟ କୁମାର ପରିଡ଼ା କହିଛନ୍ତି।
