ମୁମ୍ବାଇ,୨୨।୫: ସ୍ଥାନୀୟ ଓ୍ବାଙ୍ଖଡେ ଷ୍ଟାଡିୟମରେ ଗୁରୁବାର ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍) ୨୦୨୨ ସିଜନର ଶେଷ ଲିଗ୍ ତଥା ୭୦ତମ ମ୍ୟାଚରେ ସନ୍ରାଇଜର୍ସ ହାଇଦ୍ରାବାଦ ଅଧିନାୟକ ଭୁବନେଶ୍ୱର କୁମାର ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ। ନିର୍ଦ୍ଧାରିତ ୨୦ ଓଭରରେ ୮ ଉଇକେଟ ହରାଇ ୧୫୭ ରନ୍ କରିଛି ହାଇଦ୍ରାବାଦ। ଫଳରେ ପଞ୍ଚାବ କିଙ୍ଗ୍ସ ଆଗରେ ୧୫୮ ରନ୍ର ବିଜୟ ଟାର୍ଗେଟ୍ ରଖିଛି ହାଇଦ୍ରାବାଦ।
ହାଇଦ୍ରାବାଦ ଆରମ୍ଭରୁ ପ୍ରିୟମ୍ ଗର୍ଗ(୪)ଙ୍କ ଉଇକେଟ ହରାଇଥିଲା। ହେଲେ ଅଭିଶେଷ ଶର୍ମା ଏବଂ ରାହୁଲ ତ୍ରିପାଠୀ କିଛି ସମୟ ଧର୍ଯ୍ୟର ସହ ଖେଳି ଦଳକୁ ଆଗକୁ ନେବାକୁ ଚେଷ୍ଟା କରିଥିଲେ। ଦୁହେଁ ଦ୍ୱିତୀୟ ଉଇକେଟ ପାଇ ୬୧ ରନ୍ ଯୋଡିଥିଲେ। ହେଲେ ରାହୁଲ ୨୦ ରନ୍(୧ ଚଉକା ଏବଂ ୧ ଛକା) କରିଥିବା ବେଳେ ଅଭିଶେଷ ୪୩ରନ୍(୫ ଚଉକା ଏବଂ ୨ ଛକା) କରି ଆଉଟ୍ ହୋଇଯାଇଥିଲେ। ସେହିପରି ଆଡେନ୍ ମାର୍କ୍ରମା ୨୧ ରନ୍(୨ ଚଉକା) କରି ଆଉଟ ହେବା ପରେ ଦଳ ସଙ୍କଟରେ ପଡିଯାଇଥିଲା। ଏଭଳି ସ୍ଥତିରେ ୱାଶିଂଟନ ସୁନ୍ଦର ଏବଂ ରୋମାରିଓ ଶେଫାର୍ଡ ଦଳକୁ ସମ୍ଭାଲି ଥିଲେ। ୱାଶିଂଟନ ସୁନ୍ଦର ୨୫ ରନ୍ (୩ ଚଉକା ଏବଂ ୧ ଛକା) କରିଥିବା ବେଳେ ରୋମାରିଓ ଶେଫାର୍ଡ ୨୬ ରନ୍ (୨ ଚଉକା ଏବଂ ୨ ଛକା) କରି ଅପରାଜିତ ରହିଥିଲେ। ଫଳରେ ଦଳ ୧୫୭ ରନ୍ କରିବାରେ ସଫଳ ହୋଇଥିଲା।
