ଅମରପାଲି,୨୭ା୯(ଡି.ଏନ.ଏ): ଉଭୟ ରାଜ୍ୟ ଓ କେନ୍ଦ୍ର ସରକାର ଚାଷୀଙ୍କୁ ସହାୟତା ପାଇଁ କରିଥିବା କାଳିଆ ଯୋଜନା ଓ ପ୍ରଧାନମନ୍ତ୍ରୀ କିଷାନ ଯୋଜନା ଏବେ ବାଟବଣା ହୋଇପଡିଛି। ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକରେ ଅନେକ ଯୋଗ୍ୟ ହିତାଧିକାରୀ ଉକ୍ତ ଯୋଜନାରୁ ବାଦ୍ ପଡିଛନ୍ତି। ଆଉ କେତେକ ପୂର୍ବରୁ ସହାୟତା ପାଇଥିଲେ ମଧ୍ୟ ଏବେ ଆଉ ପାଉ ନାହାନ୍ତି। ସରକାରଙ୍କ ନିୟମ ଅନୁଯାୟୀ ପ୍ରତ୍ୟେକ ଚାଷୀ ଯେଉଁମାନଙ୍କର ୫ ଏକରରୁ କମ୍ ଜମିଥିବ, ପରିବାରର କୌଣସି ସଦସ୍ୟ ଚାକିରି କରୁ ନ ଥିବେ ଏବଂ ତାଙ୍କର ରାଶନ କାର୍ଡଥିବ ଉକ୍ତ ପରିବାରର କେବଳ ଜଣେ ବ୍ୟକ୍ତିଙ୍କୁ କାଳିଆ ଓ ପିଏମ କିଷାନ ଯୋଜନା ପାଇଁ ଯୋଗ୍ୟ କରାଯାଇଛି। ଏହିକ୍ରମରେ ବ୍ଲକରେ ଥିବା ୧୫ଟି ପଞ୍ଚାୟତର ସର୍ବମୋଟ ୨୩ ହଜାର ୫ଶହ ୨୯ ଜଣ ହିତାଧିକାରୀ କାଳିଆ ଓ ପିଏମ କିସାନ ସହାୟତା ପାଇବାକୁ ଯୋଗ୍ୟ ହୋଇଥିବା ବିଭାଗ ଆକଳନ କରିଛି। ମାତ୍ର ଏବେ ସେମାନଙ୍କ ମଧ୍ୟରୁ ମାତ୍ର ୮ହଜାର ୨ଶହ୩୬ଜଣ ହିତାଧିକାରୀଙ୍କୁ ଏହି ଯୋଜନାରୁ ଟଙ୍କା ପ୍ରଦାନ କରାଯାଇଛି। ବ୍ଲକରେ ଆହୁରି ୧୫ହଜାର ୨୯୩ ଚାଷୀ ଉକ୍ତ ଯୋଜନାର ସହାୟତା ଟଙ୍କା ପାଇବା ପଇଁ ଯୋଗ୍ୟ ହୋଇଥିଲେ ମଧ୍ୟ ତାଙ୍କୁ ସହାୟତା ମିଳିପାରୁ ନାହିଁ।
ମିଳିଥିବା ସୁଚନା ଅନୁସାରେ ବ୍ଲକର ବାଗବର ପଞ୍ଚାୟତରେ ୨୨୮୪ ଚାଷୀ ସହାୟତା ରାଶି ପାଇବାକୁ ଯୋଗ୍ୟ ହୋଇଥିଲେ ମଧ୍ୟ ମାତ୍ର ୮୨୧ଜଣ ସହାୟତା ପାଇଛନ୍ତି। ବହଳପଦର ପଞ୍ଚାୟତର ୧୪୭୮ଚାଷୀଙ୍କ ମଧ୍ୟରୁ ୫୨୦, ଲୁତୁରପଙ୍କ ପଞ୍ଚାୟତର ୭୪୭ଜଣଙ୍କ ମଧ୍ୟରୁ ମାତ୍ର ୧୩୧, ଦୁର୍ଜନତୈଲା ପଞ୍ଚାୟତର ୯୭୦ରୁ ୪୭୪, ହିଲୁଙ୍ଗ ପଞ୍ଚାୟତର ୨୬୦୭ ଚାଷୀଙ୍କ ମଧ୍ୟରୁ ୫୭୫, ଚମ୍ପାମାଳ ପଞ୍ଚାୟତର ୨୭୫ ହିତାଧିକାରୀ କାଳିଆ ଓ ପିଏମ କିଶାନ ଟଙ୍କା ପାଇଛନ୍ତି। ସେହିପରି ଜଟେସିଙ୍ଘା ପଞ୍ଚାୟତର ୧୯୩୩ଜଣଙ୍କ ମଧ୍ୟରୁ ୧୧୭୫ଜଣ, କମିରାରେ ୧୫୪୪ଜଣଙ୍କ ମଧ୍ୟରୁ ୪୬୮, ସଂଗ୍ରାମପୁରରେ ୪୭୧ ହିତାଧିକାରୀଙ୍କ ମଧ୍ୟରୁ ମାତ୍ର ୨୮ଜଣ ଉକ୍ତ ଯୋଜନାରୁ ଟଙ୍କା ପାଇଛନ୍ତି। ସେହିପରି କେନଝିରିଆପାଲି ପଞ୍ଚାୟତର ୧୭୧୭ ଜଣଙ୍କ ମଧ୍ୟରୁ ୮୩୩, ଖଣ୍ଡହତା ପଞ୍ଚାୟତର ୨୫୦୭ଜଣଙ୍କ ମଧ୍ୟରୁ ୮୬୨, ସୁବଳୟା ପଞ୍ଚାୟତର ୧୪୮୭ଜଣଙ୍କ ମଧ୍ୟରୁ ମାତ୍ର ୯୯, ପିତାମହୁଲ ପଞ୍ଚାୟତର ୧୨୫୬ଜଣଙ୍କ ମଧ୍ୟରୁ ୩ଶହ, ମୁର୍ଷୁଣ୍ଢି ପଞ୍ଚାୟତର ୨୩୫୪ଜଣଙ୍କ ମଧ୍ୟରୁ ୯୩୫ ଏବଂ ଉଫୁଲା ପଞ୍ଚାୟତର ୨୧୭୪ ହିତାଧିକାରୀଙ୍କ ମଧ୍ୟରୁ ୭୨୨ଜଣଙ୍କୁ କାଳିଆ ଓ ପିଏମ କିଶାନ ଟଙ୍କା ମିଳିଛି। ଫଳରେ ଉକ୍ତ ଯୋଜନାରୁ ସହାୟତା ରାଶି ପାଇବାକୁ ଯୋଗ୍ୟ ହୋଇମଧ୍ୟ ଅନେକ ବାଦ୍ ପଡିବା ଉକ୍ତ ଯୋଜନାର ବିଫଳତାକୁ ସୂଚାଉଛି। ପ୍ରତି ପରିବାରରୁ ଜଣେ ଲେଖାଏ ଉକ୍ତ ଯୋଜନାରୁ ସହାୟତା ପାଇବାକୁ ଥିଲେ ମଧ୍ୟ ଅନେକ ସ୍ଥାନରେ ଗୋଟିଏ ପରିବାରରୁ ଏକାଧିକ ବ୍ୟକ୍ତି ସହାୟତ ଟଙ୍କା ପାଉଥିବା ଦେଖିବାକୁ ମିଳୁଛି। ତ୍ରୁଟିପୂର୍ଣ୍ଣ ଚୟନ ସାଙ୍ଗକୁ କେତେକ ଅଜ୍ଞ ଚାଷୀ ଏନେଇ ଠିକ୍ରେ ସୂଚନା ନ ପାଇ ଆବଶ୍ୟକ ପ୍ରମାଣପତ୍ର ନ ଦେଉ ଥିବାରୁ ବାଦ୍ ପଡୁଛନ୍ତି। ଏନେଇ ବୀରମହାରାଜପୁର ବ୍ଲକ କୃଷି ଅଧିକାରୀ(ବିଏଓ) ମକରଧ୍ବଜ ପଟେଲଙ୍କୁ ପଚାରିବାରୁ ଯେଉଁମାନେ ଯୋଗ୍ୟ ସେମାନେ ଆସନ୍ତା ୧୬ତାରିଖ ମଧ୍ୟରେ ଆବେଦନ କଲେ ସହାୟତା ଟଙ୍କା ପାଇବେ ବୋଲି କହିଛନ୍ତି।
