ଢେଙ୍କାନାଳ ଅଫିସ, ୧୦।୧: ଆପ୍ ମାଧ୍ୟମରେ ନକଲି କାଗଜପତ୍ର ପ୍ରସ୍ତୁତ କରି ନେଇଗଲେ ୩୦.୦୫ ମେଟ୍ରିକ ଟନ୍ର ମୂଲ୍ୟବାନ ବିଲେଟ୍ ମେଟାଲ। ଏଭଳି ଏକ ଠକେଇ ମାମଲାରେ ଢେଙ୍କାନାଳ ପୋଲିସ ୨ ଜଣଙ୍କୁ ଗିରଫ କରିବା ସହିତ ଟ୍ରକ୍ (ନଂ. ଓଡ଼ି ୦୫ ଜେଡ୍ ୧୦୯୫) ଜବତ କରିଛି। ତଦନ୍ତ ଚାଲିଥିବାରୁ ପୋଲିସ ଅଭିଯୁକ୍ତଙ୍କ ନାମ ସାର୍ବଜନୀନ କରିନାହିଁ। ଯାଜପୁର ଜିଲାର ଇନ୍ଫ୍ରା ଓ ଲଜିଷ୍ଟିକ ସଂସ୍ଥା ପ୍ରୋପ୍ରାଇଟର ଚିନ୍ମୟ ପାଲ ଗତ ୩ ତାରିଖରେ ବାଲିମୀ ଥାନାରେ କରିଥିବା ଅଭିଯୋଗ ଅନୁଯାୟୀ, କେତେଜଣ ଅଭିଯୁକ୍ତ ଜାଲ ସିମ୍କାର୍ଡ ଏବଂ ଆପ୍ ବ୍ୟବହାର କରି ନକଲି କାଗଜପତ୍ର ପ୍ରସ୍ତୁତ କରିଥିଲେ। ରୁଙ୍ଗ୍ଟା କମ୍ପାନୀରେ ଏହି କାଗଜପତ୍ର ଦେଖାଇବା ସହିତ ଟ୍ରକ ନମ୍ବର ଜାଲ୍ କରି ୩୦.୦୫ ମେଟ୍ରିକ ଟନ୍ ବିଲେଟ୍ ମେଟାଲ ସୁନ୍ଦରଗଡ଼ ଜିଲା ବଣାଇକୁ ନେଇଯାଇଥିଲେ, ଯାହାର ମୂଲ୍ୟ ୧୪.୩୨ ଲକ୍ଷ ଟଙ୍କା ହେବ। ଏହି ଘଟଣାରେ ପୋଲିସ ତଦନ୍ତ କରି କଟକ ଜିଲା ନିଆଳି ଏବଂ ଓ ଦକ୍ଷିଣମୂଷା ଅଞ୍ଚଳର ୨ ଜଣଙ୍କୁ ଗିରଫ କରିଛି। ସେହିପରି ରାସୋଳ ଥାନା ଅଞ୍ଚଳରେ ଟ୍ରକ୍ରେ ଜାଲ୍ ନମ୍ବର ବ୍ୟବହାର କରି ୨୧ ମେଟ୍ରିକ୍ ଟନ କୋଇଲା ଚୋରାଚାଲାଣ ଅଭିଯୋଗରେ ଜଣେ ଅଭିଯୁକ୍ତଙ୍କୁ ଗିରଫ କରିଛି। କେତେଜଣ ଅଭିଯୁକ୍ତ ବିଭିନ୍ନ ଆପ୍, ସିମ୍କାର୍ଡ ମାଧ୍ୟମରେ ତଥ୍ୟ ସଂଗ୍ରହ କରି ପରିବହନରେ ଏଭଳି ଠକେଇ କରୁଛନ୍ତି। ଏଥିପ୍ରତି ସତର୍କ ରହିବାକୁ ପରିବହନ ସଂସ୍ଥା, ଟ୍ରକ୍ ମାଲିକ ଏବଂ କର୍ମଚାରୀଙ୍କୁ ପୋଲିସ ସଚେତନ କରାଇଛି।
