ଭୁବନେଶ୍ୱର,୧୧।୨: ପରମ ପ୍ରେମମୟ ଶ୍ରୀ ଶ୍ରୀ ଠାକୁର ଅନୁକୂଳଚନ୍ଦ୍ରଙ୍କ ୧୩୬ତମ ଜନ୍ମ ମହୋତ୍ସବ ଏବଂ ସ୍ଥାନୀୟ ସତ୍ସଙ୍ଗ ବିହାର ୨୯ତମ ଶ୍ରୀବିଗ୍ରହ ପ୍ରତିଷ୍ଠା ଦିବସ ଉତ୍ସବ ରବିବାର ମଞ୍ଚେଶ୍ୱରସ୍ଥିତ ରେଳବାଇ ଖେଳ ପଡ଼ିଆରେ ମହାସମାରୋହରେ ପାଳିତ ହୋଇଯାଇଛି।
ସତ୍ସଙ୍ଗର ଶ୍ରୀ ଶ୍ରୀ ଆଚାର୍ଯ୍ୟଦେବଙ୍କ ସଦୟ ଉପସ୍ଥିତିରେ ଆୟୋଜିତ ଏହି ଭବ୍ୟ ଉତ୍ସବରେ ଭୁବନେଶ୍ୱର ସମେତ ରାଜ୍ୟର ବିଭିନ୍ନ ଅଞ୍ଚଳରୁ ଶ୍ରଦ୍ଧାଳୁ ଯୋଗ ଦେଇଥିଲେ। ଏହି ଅବସରରେ ଆଶୀର୍ବଚନ ପ୍ରଦାନ କରି ଶ୍ରୀ ଶ୍ରୀ ଆଚାର୍ଯ୍ୟଦେବ କହିଥିଲେ, ଠାକୁରଙ୍କୁ ନେଇ ଆନନ୍ଦଲାଭ କରିବା ପ୍ରତି ଉତ୍ସବର ଲକ୍ଷ୍ୟ। ଏହି ଆନନ୍ଦରେ ସାମିଲ ହେବାକୁ ମୁଁ ଏଠାକୁ ଆସିଛି। ଉତ୍ସବ ପ୍ରାତଃକାଳରୁ ଆରମ୍ଭ ହୋଇ ଉଷାବିନତି, ସଦ୍ଗ୍ରନ୍ଥ ପାଠ, ଭକ୍ତି ସଙ୍ଗୀତ ପରିବେଷଣ ହୋଇଥିଲା।
ସକାଳ ୯ଟାରୁ ଉତ୍ସବର ବିଭିନ୍ନ ମଞ୍ଚରେ କାର୍ଯ୍ୟକ୍ରମମାନ ଅନୁଷ୍ଠିତ ହୋଇଥିଲା। ମାତୃମଞ୍ଚରେ ମା’ଓ ଭଉଣୀମାନେ ଭକ୍ତି ସଙ୍ଗୀତ, ନୃତ୍ୟ ପରିବେଷଣ ସହ ସଦାଲୋଚନା ଓ ସାଂସ୍କୃତିକ କାର୍ଯ୍ୟକ୍ରମ କରିଥିଲେ। ପୂର୍ବାହ୍ନ ୧୧ଟାରେ ଉତ୍ସବର ସ୍ମରଣିକା ‘ତର୍ପଣ’କୁ ଅତିଥିମାନଙ୍କ ଦ୍ୱାରା ଉନ୍ମୋଚନ କରାଯାଇଥିଲା।
ସତ୍ସଙ୍ଗର ଶ୍ରୀ ଶ୍ରୀ ଆଚର୍ଯ୍ୟଦେବ ଉତ୍ସବସ୍ଥଳରେ ପହଞ୍ଚିବା ପରେ ଉପସ୍ଥିତ ଶିଷ୍ୟ, ଅନୁରାଗୀ ତାଙ୍କୁ ଦର୍ଶନ ପ୍ରଣାମ କରିଥିଲେ। ରାଜ୍ୟପାଳ ରଘୁବର ଦାସ ଉତ୍ସବରେ ଯୋଗଦେଇ ଶ୍ରୀ ଶ୍ରୀ ଆଚାର୍ଯ୍ୟଦେବଙ୍କୁ ଦର୍ଶନ କରିଥିଲେ। ଏଥିସହ ବିଭିନ୍ନ ରାଜନୈତିକ ବ୍ୟକ୍ତିତ୍ୱ, ସାହିତି୍ୟକ, କ୍ରୀଡ଼ାବିତ, ବରିଷ୍ଠ ପ୍ରଶାସନିକ ଅଧିକାରୀ ଉତ୍ସବରେ ଯୋଗ ଦେଇଥିଲେ। ଶ୍ରୀ ଶ୍ରୀ ଆଚାର୍ଯ୍ୟଦେବଙ୍କ ଉପସ୍ଥିତିରେ ଶିବାନନ୍ଦ ପ୍ରସାଦ, ଡା. ବିନାୟକ ମହାପାତ୍ର ଆଲୋଚନା କରିଥିବା ବେଳେ ଚକ୍ରଧାରୀ ନାୟକ, ପଣ୍ଡିତ ବଳରାମ ଦାସ, ସିଦ୍ଧାର୍ଥ ଧଳ, ଅମିତାଭ ସାମନ୍ତରାୟ ପ୍ରମୁଖ ଭଜନ ଓ କୀର୍ତ୍ତନ ପରିବେଷଣ କରିଥିଲେ। ଅପରାହ୍ନ ୩ଟାରେ ଦେଓଘରରୁ ଆଗତ ହ୍ବାଇଟ ବ୍ୟାଣ୍ଡ ପ୍ରଥମ ଥର ପାଇଁ ଭୁବନେଶ୍ବରରେ ସ୍ପିରିଚୁଆଲ ଅର୍କେଷ୍ଟ୍ରା ପରିବେଷଣ କରିଥିଲେ। ସନ୍ଧ୍ୟାରେ ବିନତି ପ୍ରାର୍ଥନା ପରେ ଶାଶ୍ୱତ ଯୋଗୀ ଓ ତାଙ୍କ ସାଥୀ ଓଡ଼ିଶୀ ନୃତ୍ୟ ସହ ଅନ୍ୟ ପ୍ରାନ୍ତୀୟ ନୃତ୍ୟ ପରିବେଷଣ କରିଥିଲେ।
ଦିବସବ୍ୟାପୀ ଦୀକ୍ଷାପତ୍ର କାର୍ଯ୍ୟ ଚାଲିଥିଲା। ସତ୍ସଙ୍ଗ ମେଡିକାଲ ଆସୋସିଏଶନ ପକ୍ଷରୁ ମଲି୍ଟସ୍ପେଶାଲିଟି ହେଲ୍ଥ କ୍ୟାମ୍ପ କରାଯାଇଥିଲା। ଏଥିରେ ସହସ୍ରାଧିକ ବ୍ୟକ୍ତିଙ୍କ ମାଗଣା ରୋଗ ପରୀକ୍ଷା କରାଯିବା ସହ ଔଷଧ ବଣ୍ଟନ କରାଯାଇଥିଲା। ସତ୍ସଙ୍ଗୀ ସାମ୍ବାଦିକ ସାମ୍ମୁଖ୍ୟ ପକ୍ଷରୁ ସମସ୍ତଙ୍କୁ ଚା’ ବିସ୍କୁଟ ବିତରଣ କରାଯାଇଥିଲା। ଦିବସ ଏବଂ ରାତିରେ ଆୟୋଜିତ ଭଣ୍ଡାରାରେ ୩୦ ହଜାରରୁ ଊର୍ଦ୍ଧ୍ୱ ଶ୍ରଦ୍ଧାଳୁ ଏବଂ ଅନୁରାଗୀ ଯୋଗଦେଇ ପ୍ରସାଦ ସେବନ କରିଥିଲେ।
