ପାଟଣା,୧୦ା୫(ସ୍ବ.ପ୍ର.): କେନ୍ଦୁଝର ଜିଲା ପାଟଣା ରେଞ୍ଜକୁ ସୋମବାର ବିଳମ୍ବିତ ରାତିରେ ଘଟଗାଁ ରେଞ୍ଜରୁ ଗୋଠଛଡା ଦନ୍ତା ହାତୀ ପ୍ରବେଶ କରି ଉତ୍ପାତ ଆରମ୍ଭ କରିବା ସହ ୪ଜଣଙ୍କ ଘର ଭାଙ୍ଗିଦେଇଥିବା ବେଳେ ମଙ୍ଗଳବାର ପୁଣି ୮ଜଣଙ୍କ ଘର ଭାଙ୍ଗିଦେଇଛି। ହାତୀଟି ଜନବସତି ମୁଁହା ହୋଇ ଗାଁ ଦାଣ୍ଡରେ ଚାଲି ଗୋଟେ ପରେ ଗୋଟେ ଘର ଭାଙ୍ଗୁ ଥିବାରୁ ଆତଙ୍କିତ ଅବସ୍ଥାରେ ଅଛନ୍ତି ଲୋକେ। ମଙ୍ଗଳବାର ରାତିରେ ଦନ୍ତା ପାଟଣା ବିଟ ମାଧପୁର ଗ୍ରାମର ବିଧବା ମହିଳା ସୁଆଗ ନାଏକଙ୍କ ଆଜବେଷ୍ଟସ୍, ଦାଶରଥି ମୁଣ୍ଡାଙ୍କ ଖପର ଘର ଭାଙ୍ଗିବା ପରେ ଉଦୟପୁର ବିଟ୍ ସିଲିପଦା ଗାଁର ଗୁଣନିଧି ମହାନ୍ତ, ମାଳତୀ ମହାନ୍ତ, ବେଗେନା ଗ୍ରାମର ଆର୍ତ୍ତତ୍ରାଣ ସେଠୀ, ବଲାଣି ପଶିର ଦମୟନ୍ତୀ ମହାନ୍ତ ଓ ଖୁଣ୍ଟାପଡ଼ା ଗହ୍ମା ମୁଣ୍ଡାଙ୍କ ଘର ଭାଙ୍ଗି ଦେଇଛି। ଏହାପରେ ମଙ୍ଗଳବାର ରାତିରେ ଦନ୍ତା ବୈତରଣୀ ଓ ଦେଓ ନଦୀ ପାର ହୋଇ ମୟୂରଭଞ୍ଜ ଜିଲା କରଞ୍ଜିଆ ରେଞ୍ଜକୁ ପଶିଥିବା ସାହାରପଡ଼ା ବନପାଳ ଭୂପତି ସେଠୀ କହିଛନ୍ତି। କ୍ଷତିଗ୍ରସ୍ତ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ପ୍ରଭାବିତଙ୍କ ସହ ସ୍ଥାନୀୟ ଲୋକେ ଦାବି କରିଛନ୍ତି।
