କଣାସ,୨୯୨(ବିଭୂତି ଭୂଷଣ ତ୍ରିପାଠୀ) ଶିଶୁ ଓ ମା’ଙ୍କ ସୁରକ୍ଷା ନିମନ୍ତେ ଗାଁ ଗାଁରେ ଅଙ୍ଗନୱାଡି କେନ୍ଦ୍ର ଖୋଲାଯାଇଥିଲେ ମଧ୍ୟ କଣାସ ବ୍ଲକରେ କେନ୍ଦ୍ରଗୁଡ଼ିକ ନାହିଁ ନାହିଁରେ ପରିଚାଳିତ ହେଉଛି। ବ୍ଲକରେ ୨୮୫ଟି ଅଙ୍ଗନୱାଡି କେନ୍ଦ୍ର ରହିଛି। ସେଥି ମଧ୍ୟରୁ ୧୬୭ଟି କେନ୍ଦ୍ରର ନିଜସ୍ବ ଗୃହ ଥିବାବେଳେ ୧୧୮ଟି କେନ୍ଦ୍ରର ନିଜସ୍ବ ଗୃହ ନାହିଁ। ଗୃହ ନ ଥିବା କେନ୍ଦ୍ରଗୁଡ଼ିକ ଅଙ୍ଗନୱାଡି କର୍ମୀଙ୍କ ନଜ ଘରେ ପରିଚାଳିତ ହେଉଛି। ଫଳରେ ଅଙ୍ଗନୱାଡି କର୍ମୀ କୋମଳମତି ଶିଶୁଙ୍କୁ ଘର ଭିତରେ ବସାଇ ନିଜ ନିଜ ଘର କାମରେ ବ୍ୟସ୍ତ ରହୁଥିବା ଦେଖିବାକୁ ମିଳୁଛି। କେବଳ ଏତିକି ନୁହେଁ, ୨୬୮ଟି କେନ୍ଦ୍ରରେ ଅଙ୍ଗନୱାଡି କର୍ମୀ ଥିବାବେଳେ ୧୭ କେନ୍ଦ୍ରର ବିନା କର୍ମୀରେ ପରିଚାଳିତ ହେଉଛି। ୨୮୨ କେନ୍ଦ୍ରରେ ସହାୟିକା ଥିବାବେଳେ ୩ କେନ୍ଦ୍ରରେ ସହାୟିକା ପଦବୀ ଖାଲି ପଡ଼ିଛି। କେନ୍ଦ୍ରଗୁଡ଼ିକୁ ସୁପରଭିଜନ କରିବାକୁ ୧୨ଜଣ ସୁପଭାଇଜର ରହିବାର ବ୍ୟବସ୍ଥା ଥିଲେ ମଧ୍ୟ ୮ଜଣ ସୁପରଭାଇଜରରେ କାର୍ଯ୍ୟ ଚାଲିଛି। ସୁପରଭାଇଜରମାନେ ନିୟମିତ କେନ୍ଦ୍ର ତଦାରଖ କରିବାକୁ ଆସୁ ନ ଥିବା ଅଭିଯୋଗ ରହିଛି। ପିଲା ଓ ମା’ମାନଙ୍କ ସୁଷମ ଖାଦ୍ୟ ନିମନ୍ତେ ପ୍ରତି ମାସରେ ଛତୁଆ ଦିଆଯାଉଥିଲା। ଏବେ ଜାନୁଆରୀ ଓ ଫେବୃଆରୀ ୨ ମାସ ହେଲା କୌଣସି କେନ୍ଦ୍ରକୁ ଛତୁଆ ଦିଆଯାଉନାହିଁ। ଏ ସମ୍ପର୍କରେ ସିଡିପିଓ ସ୍ମିତା ମହାନ୍ତିଙ୍କୁ ପଚାରିବାରେ, ୨ମାସ ହେଲା ଗହମ ମିଳୁ ନ ଥିବାରୁ ଛତୁଆ ଦିଆଯାଉନାହିଁ। ଅପରପକ୍ଷେ ଏହି କେନ୍ଦ୍ରଗୁଡ଼ିକୁ ସୁଷମ ଖାଦ୍ୟ ଯୋଗାଣ ନିମନ୍ତେ ବ୍ଲକରେ ୩ଟି ସ୍ବୟଂ ସହାୟିକା ଗୋଷ୍ଠୀଙ୍କୁ ନିଯୁକ୍ତି କରାଯାଇଥିଲା। କିନ୍ତୁ ୨ଟି ସ୍ବୟଂ ସହାୟିକା ଗୋଷ୍ଠୀକୁ କୌଣସି କାରଣରୁ କଟାଯାଇଥିବାରୁ ଗୋଟିଏ ସ୍ବୟଂ ସହାୟିକା ଗୋଷ୍ଠୀ କଣାସ ବ୍ଲକର ସବୁ କେନ୍ଦ୍ରକୁ ଯୋଗାଇବାରେ ବ୍ୟତିକ୍ରମ ଘଟୁଛି। ବର୍ତ୍ତମାନ ବଜାରରେ ଅଣ୍ଡା ଦର ଗୋଟା ପିଛା ୮ଟଙ୍କା ହୋଇଥିବାବେଳେ ସରକାର ସେ ବାବଦକୁ ୫ଟା ୫୦ପଇସା ଦେଉଛନ୍ତି। ଫଳରେ ସମସ୍ତ ଶିଶୁ ଅଣ୍ଡା ପାଇବା ସମ୍ଭବ ହୋଇପାରୁନାହିଁ। ଅଙ୍ଗନୱାଡି କର୍ମୀଙ୍କ ସହିତ ଅଭିଭାବକଙ୍କ କଳିତକରାଳ ହେଉଥିବା ଦେଖାଯାଉଛି।
