ବ୍ରହ୍ମପୁର,୧୭ା୨(ଅଶୋକ କୁମାର ସାହୁ): ପ୍ରତ୍ୟେକ ବର୍ଷ ଗଞ୍ଜାମ ଜିଲାର ଋଷିକୁଲ୍ୟା ମୁହାଣ ସମୁଦ୍ର ବେଳାଭୂମିକୁ ବିରଳ ଅଲିଭ୍ରିଡ୍ଲେ କଇଁଛ ଗଣଅଣ୍ଡାଦାନ କରିବାକୁ ଆସନ୍ତି। ଡିସେମ୍ବରରୁ ଆରମ୍ଭ ହେଉଥିବା ସେମାନଙ୍କ ପ୍ରଜନନ ଋତୁ ଜାନୁଆରୀ ମାସରେ ସରିବା ପରେ ସେମାନେ ଉତ୍ତାପ ପାଇଁ ସମୁଦ୍ର ବେଳାଭୂମିଠାରୁ ୧ କି.ମି. ଭିତରେ ଭାସମାନ ଅବସ୍ଥାରେ ଥିଲେ। ତେବେ ଫେବୃଆରୀ ଦ୍ୱିତୀୟ ସପ୍ତାହ ପରେ ଶନିବାର ବିଳମ୍ବିତ ରାତିରୁ ପ୍ରଥମ କରି ଅଲିଭ୍ରିଡ୍ଲେ କଇଁଛ ଗଞ୍ଜାମ ବ୍ଲକର ଗୋଖରକୁଦାଠାରୁ ବଟେଶ୍ୱର ପ୍ରାୟ ୪ କି.ମି. ଡାଇନାମିକ ବିଚ୍ରେ ଗଣଅଣ୍ଡାଦାନ କରିଛନ୍ତି। ପ୍ରାୟ ୧୧ ହଜାର କଇଁଛ ଅଣ୍ଡା ଦେଇଥିବା ବନ ବିଭାଗ ପକ୍ଷରୁ କୁହାଯାଇଛି। ପୁରୁଣାବନ୍ଧରୁ ଅଳେଶ୍ୱର ୬ କି.ମି. ଓ ଗୋଖରକୁଦାଠାରୁ ଅଗସ୍ତି ନୂଆଗାଁ ପ୍ରାୟ ୪ କି.ମି. ବେଳାଭୂମିରେ କଇଁଛମାନେ ଅଣ୍ଡା ଦେଉଥିବା ଜାଣି ବନ ବିଭାଗ ଓ ବିଭିନ୍ନ ସଙ୍ଗଠନ ପକ୍ଷରୁ ବେଳାଭୂମି ସଫେଇ କରାଯାଇଥିଲା। କଇଁଛଙ୍କ ସୁରକ୍ଷା ପାଇଁ ତାରବାଡ଼ ମଧ୍ୟ ଲଗାଯାଇଥିଲା। ୨୦୨୨ରେ ୫ ଲକ୍ଷ ୫୦ ହଜାର କଇଁଛ ଅଣ୍ଡା ଦେଇଥିବାବେଳେ ୨୦୨୩ରେ ୬ ଲକ୍ଷ ୩୭ ହଜାର ଓ ୨୦୨୪ରେ ଜଳବାୟୁ ପରିବର୍ତ୍ତନ ଯୋଗୁ ମାତ୍ର ୩ ହଜାର କଇଁଛ ଅଣ୍ଡାଦାନ କରିଥିବା ଋଷିକୁଲ୍ୟା କଇଁଛ ସୁରକ୍ଷା ସମିତି ସମ୍ପାଦକ ରବୀନ୍ଦ୍ର ନାଥ ସାହୁ କହିଛନ୍ତି।
ପ୍ରାୟ ୨୦ ହଜାର ଅଲିଭ୍ରିଡ୍ଲେ କଇଁଛ ରବିବାର ସନ୍ଧ୍ୟାରେ ବେଳାଭୂମିରେ ଅଣ୍ଡା ଦେବାକୁ ବିଚରଣ କରୁଥିବା ସାହୁ କହିଛନ୍ତି। ବନ ବିଭାଗ ପକ୍ଷରୁ ପ୍ରତି ୧୦୦ ମିଟରକୁ ଗୋଟିଏ ସେଗ୍ମେଣ୍ଟ କରାଯାଇଛି। ପ୍ରତି ସେଗ୍ମେଣ୍ଟ୍ରେ ଜଣେ ବନ ବିଭାଗ କର୍ମଚାରୀ ଓ ଜଣେ ସ୍ବେଚ୍ଛାସେବୀ କଇଁଛ ଗଣତି ପ୍ରକ୍ରିୟାରେ ନିୟୋଜିତ ହୋଇଛନ୍ତି। କଇଁଛମାନେ ଗାତ ଖୋଳି ସେହି ଗାତରେ ଅଣ୍ଡା ଦେଇଥାନ୍ତି। ପ୍ରତି କଇଁଛ ୧୦୦ରୁ ୧୬୦ ଅଣ୍ଡା ଦେବା ପରେ ସେହି ଗାତକୁ ବାଲିରେ ପୋତି ସମୁଦ୍ରକୁ ଫେରିଯାଆନ୍ତି। ସେମାନଙ୍କ ଅଣ୍ଡାରୁ ଛୁଆ ଫୁଟିବାକୁ ପ୍ରାୟ ୫୦ ଦିନ ସମୟ ଲାଗୁଥିବାରୁ ବନ ବିଭାଗ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଛୁଆ ଫୁଟିବା ପରେ ସେମାନେ ଧୀରେ ଧୀରେ ସମୁଦ୍ରକୁ ଫେରନ୍ତି। ଏହା ପ୍ରକୃତିର ନିୟମ ବୋଲି ସ୍ଥାନୀୟ ଲୋକେ କହନ୍ତି।
ଅଲିଭ୍ରିଡ୍ଲେ କଇଁଛଙ୍କ ଅଣ୍ଡାଦାନ ସମୟରେ ସେହି ଅଞ୍ଚଳରେ ମତ୍ସ୍ୟଜୀବୀମାନଙ୍କୁ ସମୁଦ୍ରକୁ ଯିବାକୁ ବାରଣ କରାଯାଇଛି। ଆସନ୍ତା ୨୩ ତାରିଖ ପର୍ଯ୍ୟନ୍ତ କଇଁଛମାନେ ଅଣ୍ଡା ଦେବାକୁ ଆସିବେ ବୋଲି ଜଣାପଡିଛି। ଅନ୍ୟପକ୍ଷରେ ବେଳାଭୂମି ସ୍ବଚ୍ଛ ନ ଥିଲେ କଇଁଛମାନେ ଅଣ୍ଡା ଦେବାକୁ ଆସନ୍ତି ନାହିଁ। ଅଣ୍ଡା ଫୁଟିବା ପରେ ଯେଉଁ ଖୋଳପା ରହେ, ତାହା ମାଟିରେ ମିଶିବା ପାଇଁ ଦୀର୍ଘ ବର୍ଷ ଲାଗି ଯାଉଥିବାରୁ ପ୍ରତିବର୍ଷ ବେଳାଭୂମି ସଫେଇ ଉପରେ ବନ ବିଭାଗ ଗୁରୁତ୍ୱ ଦେଉଛି ବୋଲି ବ୍ରହ୍ମପୁର ବନଖଣ୍ଡର ଖଲ୍ଲିକୋଟ ରେଞ୍ଜର ଏସିଏଫ୍ ଦିବ୍ୟ ଶଙ୍କର ବେହେରା କହିଛନ୍ତି। ଅଲିଭ୍ରିଡ୍ଲେ କଇଁଛ ଓ ଅଣ୍ଡାର ସୁରକ୍ଷା ପାଇଁ ସମସ୍ତେ ସଜାଗ ରହିଛୁ ବୋଲି ସେ ପ୍ରକାଶ କରିଛନ୍ତି।
