ଇସଲାମାବାଦ,୧୨।୨ : ଦୀର୍ଘ ଦିନ ଧରି ପାକିସ୍ତାନ ରାଜନୈତିକ ଏବଂ ଅର୍ଥନୈତିକ ସଙ୍କଟର ସମ୍ମୁଖୀନ ହୋଇଆସୁଛି। ସାଧାରଣ ନିର୍ବାଚନ ପରେ ଏହା ଅନ୍ତତଃପକ୍ଷେ ରାଜନୈତିକ ସଙ୍କଟରୁ ମୁକ୍ତ ହେବ ବୋଲି ବିଶ୍ୱାସ କରାଯାଉଥିଲା। କିନ୍ତୁ, ନିର୍ବାଚନ ଫଳାଫଳ ଆସିବା ପରେ ଏହି ସଙ୍କଟ ସମାପ୍ତ ହେବା ପରିବର୍ତ୍ତେ ଘନେଇବାରେ ଲାଗିଛି। ଏଠାରେ ରାଜନୈିକ ପରିସ୍ଥିତି ଏପରି ହୋଇଛି ଯେ ତିନି ନେତା ପ୍ରଧାନମନ୍ତ୍ରୀ ହେବାକୁ କିମ୍ବା ନିର୍ବାଚନରେ ଜିତିବାକୁ ଦାବି କରିଛନ୍ତି। ଯେତେବେଳେ କି, ନିର୍ବାଚନ ଫଳାଫଳରେ କେହି ସ୍ପଷ୍ଟ ସଂଖ୍ୟାଗରିଷ୍ଠତା ହାସଲ କରିପାରି ନାହାନ୍ତି।
ଫଳାଫଳ ଆସିବା ପୂର୍ବରୁ ମଧ୍ୟ ତିନିଥର ପ୍ରଧାନମନ୍ତ୍ରୀ ଥିବା ନୱାଜ ସରିଫ ତାଙ୍କ ଦଳ ପାକିସ୍ତାନ ମୁସଲିମ ଲିଗ-ନୱାଜ (ପିଏମଏଲ-ଏନ)ର ବିଜୟ ଦାବି କରିଥିଲେ। ତବେ ଫଳାଫଳ ତାଙ୍କ ସପକ୍ଷରେ ନାହିଁ ଏବଂ ସେ ଏକ ମିଳିତ ମଞ୍ଚ ଗଠନ କରି ସରକାର ଗଠନ କରିବାକୁ ଚେଷ୍ଟା କରୁଛନ୍ତି।
ନୱାଜ ସରିଫଙ୍କ ବ୍ୟତୀତ ପାକିସ୍ତାନ ତେହେରିକ-ଇ-ଇନସାଫ (ପିଟିଆଇ)ର ନେତା ତଥା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ ମଧ୍ୟ ବିଜୟ ନେଇ କହିଛନ୍ତି। ଜେଲରେ ଥିବା ଇମ୍ରାନ ଏକ ଭିଡିଓ ମାଧ୍ୟମରେ ବିଜୟ ଦାବି କରିଥିଲେ। ତାଙ୍କ ଦ୍ୱାରା ସମର୍ଥିତ ପ୍ରାର୍ଥୀଙ୍କୁ ସେମାନଙ୍କ ବିଜୟ ପାଇଁ ଅଭିନନ୍ଦନ ଜଣାଇ ସେ କହିଛନ୍ତି ଭୋଟ ଦେଇ ଲୋକମାନେ ସେମାନଙ୍କର ସ୍ବାଧୀନତାର ମୂଳଦୁଆ ପକାଇଛନ୍ତି।
ପାକିସ୍ତାନ ପିପୁଲ୍ସ ପାର୍ଟି (ପିପିପି) ମୁଖ୍ୟ ବିଲାୱାଲ ଭୁଟ୍ଟୋ ଜାରଦାରୀ ପ୍ରଧାନମନ୍ତ୍ରୀ ହେବାର କୌଣସି ସ୍ଥିତିରେ ନାହାନ୍ତି। କିନ୍ତୁ ର୍ନିବାଚନ ଫଳାଫଳ ଏଭଳି ପରିସ୍ଥିତି ସୃଷ୍ଟି କରିଛି। ବାସ୍ତବରେ କେହି ସଂଖ୍ୟାଗରିଷ୍ଠତା ପାଇ ନାହାନ୍ତି, ତେଣୁ ନୱାଜ ସରିଫ ଏବଂ ବିଲାୱାଲ ଭୁଟ୍ଟୋଙ୍କ ଦଳ ମଧ୍ୟରେ ଏକ ମେଣ୍ଟ ହୋଇପାରେ ବୋଲି ଏକ ସମ୍ଭାବନା ରହିଛି। ଖବର ଅନୁଯାୟୀ, ବିଲାୱାଲ ଭୁଟ୍ଟୋ ଏକ ମେଣ୍ଟ ଗଠନ କରିପାରନ୍ତି କିନ୍ତୁ ଏଥିପାଇଁ ସେ ପ୍ରଧାନମନ୍ତ୍ରୀ ପଦ ମଧ୍ୟ ମାଗିପାରିବେ। କୁହାଯାଉଛି ପିପିପି ପ୍ରଧାନମନ୍ତ୍ରୀ ପଦ ସହିତ ନୱାଜ ସରିଫଙ୍କ ଠାରୁ ଗୁରୁତ୍ୱପୂର୍ଣ୍ଣ ମନ୍ତ୍ରଣାଳୟ ମଧ୍ୟ ଦାବି କରିଛି।
