ରାଜନଗର, ୩ା୨( ଡି.ଏନ.ଏ.):ଅଗ୍ନିକୁ ସାକ୍ଷୀ ରଖି ସାରା ଜୀବନ ସ୍ବାମୀଙ୍କ ସହ ଜୀବନ କାଟିବା ପାଇଁ ପ୍ରତିଜ୍ଞା କରିଥିବା ସ୍ତ୍ରୀ ସ୍ବାମୀଙ୍କ ମୃତ୍ୟୁ ପରେ ନିଜ ଗର୍ଭରୁ ଜନ୍ମ ଦେଇଥିବା ୪ ପିଲାଙ୍କୁ ପର କରି ଘର ଛାଡି ଚାଲି ଯାଇଛନ୍ତି। କେନ୍ଦ୍ରାପଡ଼ା ଜିଲା ପ୍ରଶାସନ ଏହି ୪ ପିଲାଙ୍କୁ ସାବାଳକ ହେବାଯାଏ ଦାୟିତ୍ୱ ନେବାକୁ ଅଞ୍ଚଳବାସୀ ଦାବି କରିଛନ୍ତି।
ରାଜନଗର ଥାନା ଅନ୍ତର୍ଗତ ଚାରିପୋଖରିଆ ଗଁାର ଅମର ବାରିକ ପରିବାର ପ୍ରତିପୋଷଣ ପାଇଁ ସୁଦୂର ହାଇଦ୍ରାବାଦରେ ଦାଦନ ଖଟନ୍ତି। ହାଇଦ୍ରାବାଦରେ ଦାଦନ ଖଟିବା ଭିତରେ ଭଲ ପାଇ ସେ ଅଞ୍ଚଳର ଜଣେ ଯୁବତୀଙ୍କୁ ବିବାହ କରିଥିଲେ। ଯୁବତୀଙ୍କୁ ଗଁାକୁ ଆଣି ବିବାହ କରିବା ପରେ ପୁଣି ଯାଇ ହାଇଦ୍ରାବାଦରେ ଦାଦନ ଖଟିଥିଲେ। ଦେଢ ବର୍ଷ ତଳେ ହାଇଦ୍ରାବାଦରେ ଅମରଙ୍କୁ ହତ୍ୟା କରାଗଲା। ଅମରଙ୍କ ମୃତ୍ୟୁ ପରେ ତାଙ୍କ ସ୍ତ୍ରୀ ସତ୍ୟଭାମା ଓ ୪ ସନ୍ତାନ ଲକ୍ଷ୍ମୀପ୍ରିୟା (୯), ଦେବୀକା (୭), ଆରତି (୬), ରୁଦ୍ରମୋହନ (୩) ଗଁାକୁ ଆସି ରହିଥିଲେ। ୫ ମାସ ତଳୁ ସତ୍ୟଭାମା ୪ ପିଲାଙ୍କୁ ଛାଡି କେଉଁଆଡେ ପଳାଇଛନ୍ତି। ସେବେଠୁଁ ତାଙ୍କ ଖୋଜ ଖବର ନାହିଁ। ସେ ପିଲାଙ୍କୁ ଛାଡି ତାଙ୍କ ନିଜ ଗଁା ହାଇଦ୍ରାବାଦକୁ ଚାଲି ଯାଇଥିବା କୁହାଯାଉଛି। ଜନ୍ମକଲା ମା’ ୪ ପିଲାଙ୍କୁ ପର କରି କେଉଁଆଡେ ଚାଲିଯିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ମା’ ୪ ସନ୍ତାନଙ୍କୁ ଛାଡ଼ି ଚାଲିଯିବା ପରେ ଏତେବଡ ଦୁନିଆରେ ଶିଶୁମାନେ ଆଶା ଓ ଆଶଙ୍କା ଭିତରେ ଦିନ କାଟୁଛନ୍ତି। ପୁଅ ସ୍ବର୍ଗରେ, ପାଖରେ ଥିବା ବୋହୂ ଚାତୁଣୀନାତିଙ୍କୁ ଛାଡି ତା’ବାଟରେ। ଜେଜେବାପା ବ୍ରହ୍ମାନନ୍ଦ ବାରିକ (୬୪) ଓ ଜେଜେମା’ ମୁକ୍ତାମଣି ବାରିକଙ୍କ କାନ୍ଧରେ ୪ ଶିଶୁଙ୍କ ବୋଝ। ଅଭାବ ଅନଟନ ଭିତରେ ବୃଦ୍ଧାବୃଦ୍ଧ ୪ ନାତୁଣୀନାତିଙ୍କୁ କିପରି ଭରଣପୋଷଣ କରିବେ, ଏ ନେଇ ଦୁଃଖରେ ମ୍ରିୟମାଣ ହୋଇପଡିଛନ୍ତି। ବ୍ରହ୍ମାନନ୍ଦଙ୍କର ଘରଡିହ କି ଜମିବାଡ଼ି କିଛି ନ ଥିବା ବେଳେ ସରକାରୀ ଜାଗାରେ ଚାଳଘର କରି ରହିଛନ୍ତି। ବ୍ରହ୍ମାନନ୍ଦଙ୍କୁ ଭତ୍ତା ମିଳୁ ନ ଥିବା ବେଳେ ଆଜି ଯାଏ ଆବାସ ଗୃହଟିଏ ମିଳିନାହିଁ। ତାଙ୍କର ୩ ପୁଅଙ୍କ ମଧ୍ୟରୁ ଜଣେ ପୁଅ ଅବିବାହିତ ଥିବା ବେଳେ ଆଉ ଜଣେ ପୁଅ ଦିବ୍ୟାଙ୍ଗ, ବଡପୁଅ ଅମର ଆରପାରିରେ। ବୁଢ଼ା ବୟସରେ ବ୍ରହ୍ମାନନ୍ଦ ମୂଲ ଲାଗି ଯାହା ଆଣୁଛନ୍ତି, ନିଜେ ଖାଇବା ସହ ଏହି ୪ ପିଲାଙ୍କ ପେଟରେ ଦାନା ଦେଉଛନ୍ତି। ୪ ପିଲାଙ୍କ ମା’ଙ୍କ ନଁାରେ ରାଶନ କାର୍ଡ ଥିଲେ ମଧ୍ୟ ରିଟେଲର ୭ ମାସ ଧରି ୪ ଶିଶୁଙ୍କୁ ଯୋଗାଣ ସାମଗ୍ରୀ ଦେଇନି। ଗତ ୩ ମାସ ହେଲା ମାସକୁ ୧୦ କେଜି ଚାଉଳ ଦେଉଛି। ଲକ୍ଷ୍ମୀପ୍ରିୟା ଗଁା ସ୍କୁଲରେ ୪ର୍ଥ ଶ୍ରେଣୀରେ ପଢନ୍ତି। ସେ ନିଜେ ପାଠ ପଢିବା ବଦଳରେ ଅନ୍ୟ ଛୋଟ ଛୋଟ ଭଉଣୀଭାଇଙ୍କୁ ପଢାଉଛନ୍ତି। ନିଜେ ଖାଇବା ପୂର୍ବରୁ ୩ ଭଉଣୀଭାଇଙ୍କ ଖାଇବା କଥା ବୁଝିବା ସହ ଗାଧୋଇ ଦେଉଛନ୍ତି। ଏଥିସହ ବେସରକାରୀ ସ୍ତରରେ ସହୟତା ଯୋଗାଇ ଦେବାକୁ ଜେଜେ ବ୍ରହ୍ମାନନ୍ଦ ନିବେଦନ କରିଛନ୍ତି।
