ଶେରଗଡ,୨ା୩(ଡି.ଏନ୍.ଏ.)- ଗଞ୍ଜାମ ଜିଲା ଶେରଗଡ ବ୍ଲକ ନରେନ୍ଦ୍ରପୁର ଗ୍ରାମର ଦିବ୍ୟାଙ୍ଗ ଯୁବକ ଗଦାଧର ସାହୁ (୨୬)। ଦିବ୍ୟାଙ୍ଗ ହୋଇ ମଧ୍ୟ ସେ ଚଳିତ ବର୍ଷ ଗଞ୍ଜାମ ଜିଲାସ୍ତରୀୟ ସୁନ୍ଦର ସ୍ବାସ୍ଥ୍ୟ ପ୍ରତିଯୋଗିତା (ଦିବ୍ୟାଙ୍ଗ)ରେ ଭାଗନେଇ ପୁରସ୍କୃତ ହୋଇଛନ୍ତି। ଗତ ୧୪ ତାରିଖରେ ବିଜୁ ପଟ୍ଟନାୟକ ସାଂସ୍କୃତିକ ମଣ୍ଡପରେ ଏହି ପ୍ରତିଯୋଗିତା ଅନୁଷ୍ଠିତ ହୋଇଥିଲା। ସେଠାରେ ସଫଳ କ୍ରୀଡାବିତ୍ ତଥା ଭାରୋତ୍ତୋଳକ କେ. ରବି କୁମାରଙ୍କ ଠାରୁ ଗଦାଧର ପୁରସ୍କାର ଗ୍ରହଣ କରିଥିଲେ। ଦୁଇଗୋଡ ନ ଥିଲେ ମଧ୍ୟ ଦୃଢ ଇଚ୍ଛାଶକ୍ତି ତାଙ୍କୁ ସଫଳତା ଆଣି ଦେଇଛି। ସରକାରୀ ସହାୟତା ଓ ପ୍ରୋତ୍ସାହନ ମିଳିଲେ ସେ ଜାତୀୟସ୍ତରରେ ଖେଳିବାକୁ ଆଶା ରଖିଥିବା କହିଛନ୍ତି।
ପ୍ରକାଶ ଯେ, ଗଦାଧର ଗ୍ରାମ ବିଦ୍ୟାଳୟରୁ ସପ୍ତମ ପାସ୍ ପରେ ସୁରଟରେ ରହୁଥିବା ଭାଇଙ୍କ ପାଖକୁ ବୁଲିବାକୁ ଯାଇଥିଲେ। ସେଠାରୁ ଫେରିବାବେଳେ ଟ୍ରେନ୍ରୁ ଖସିପଡି ତାଙ୍କର ୨ ଗୋଡ କଟିଯାଇଥିଲା। ଗୁରୁତର ଅବସ୍ଥାରେ ସୁରଟ ରେଲବାଇ ପୋଲିସ ତାଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରିଥିଲେ। ଗଦାଧର ଗୋଡ ଦୁଇଟି ହରାଇଥିଲେ ମଧ୍ୟ ଜୀବନ ବଞ୍ଚତ୍ ଯାଇଥିଲା। ପରିବାର ଲୋକେ ତାଙ୍କୁ ବ୍ରହ୍ମପୁର ବଡମେଡିକେଲକୁ ଆଣି ଚିକିତ୍ସା କରିଥିଲେ। ପରେ ସେ ପିତ୍ତଳ ହାଇସ୍କୁଲରୁ ମାଟ୍ରିକ୍ ପାସ୍ ଓ ହିଞ୍ଜିଳି ମହାବିଦ୍ୟାଳୟରୁ ଯୁକ୍ତ ୩ ମଧ୍ୟ ପାସ୍ କରିଥିଲେ। ଗୋଡ ଦୁଇଟି ହରାଇଥିଲେ ମଧ୍ୟ ସେ ସର୍ବଦା ଶାରୀରିକ ବ୍ୟାୟାମ ଜାରି ରଖିଥିଲେ। ଏହାପରେ ତାଙ୍କ ବାପା, ମା’ଙ୍କ ମୃତ୍ୟୁ ଘଟିଥିଲା। ଭାଇମାନଙ୍କ ପ୍ରଚେଷ୍ଟାରେ ୨୦୧୫ରେ ନିଜକୁ ପ୍ରସ୍ତୁତ କରିବାକୁ ଲାଗିଲେ ଏବଂ ୨୦୧୬ରେ ଏକ ପ୍ରତିଯୋଗିତାରେ ଭାଗ ନେଇ ଦିବ୍ୟାଙ୍ଗ ବିଭାଗରେ ମିଷ୍ଟର ଓଡିଶା ଟାଇଟଲ ହାତେଇଥିଲେ। ଆର୍ଥିକ ଅନଟନ ଯୋଗୁ ପିତ୍ତଳ ଛକରେ ଭାଇଙ୍କ ଫାଷ୍ଟଫୁଡ୍ ଦୋକାନରେ କାମ କରିବାକୁ ଲାଗିଲେ। ସେଠାରେ ଦିନେ ହିଞ୍ଜିଳିକାଟୁ ସ୍ଥିତ ଏକ ଜିମ୍ର ମାଲିକ ଦିଲୀପ କୁମାର ମିଶ୍ରଙ୍କ ସହ ତାଙ୍କର ଦେଖା ହୋଇଥିଲା। ସେ ତାଙ୍କୁ ଜିମ୍କୁ ଆସିବାକୁ କହିଥିଲେ। ସେବେଠାରୁ ପ୍ରତିଦିନ ସକାଳେ ଗଦାଧର ଜିମ୍କୁ ଯାଇ ଅଭ୍ୟାସ କରନ୍ତି। ସାକ୍ଷାତବେଳେ ଗଦାଧର କହିଥିଲେ ମୋର ଜାତୀୟସ୍ତରରେ ଖେଳିବାକୁ ଇଚ୍ଛା ଅଛି। ମାତ୍ର ଅର୍ଥ ବାଧକ ସାଜିଛି। ଯଦି ସରକାରୀ ସହାୟତା ମିଳିପାରନ୍ତା ତେବେ ମୋର ସ୍ବପ୍ନ ସାକାର ହୋଇପାରନ୍ତା। ସରକାରଙ୍କ ତରଫରୁ ଗଦାଧରଙ୍କୁ କେବଳ ଭିନ୍ନକ୍ଷମ ଭତ୍ତା ଓ ମାସକୁ ୫ କେଜି ଚାଉଳ ମିଳୁଛି। ସରକାରୀ ସହାୟତା ମିଳିଲେ ସେ ଜାତୀୟସ୍ତରରେ ଖେଳିବାର ସୁଯୋଗ ପାଆନ୍ତେ ବୋଲି କହିଛନ୍ତି ସ୍ଥାନୀୟ ସରପଞ୍ଚ ବିନୋଦ ବେହେରା।
