ଢେଙ୍କାନାଳ ଅଫିସ, ୧୮।୮: ଢେଙ୍କାନାଳରେ କାୟା ବିସ୍ତାର କଲାଣି ଧଳା ଜହର ଚେର। ଶନିବାର ସ୍ଥାନୀୟ ବାଜିଚୌକଠାରୁ ଅବକାରୀ ବିଭାଗ ଏବଂ ଟାଉନ ଥାନା ପୋଲିସ ଚଢ଼ାଉ କରି ୨୨ ଗ୍ରାମ୍ ବ୍ରାଉନ୍ସୁଗାର ସହ ୧୪୮୦ ଟଙ୍କା ଜବତ କରିଛି। ଏଥିରେ ସମ୍ପୃକ୍ତି ଅଭିଯୋଗରେ ଜୟଗୋପାଳ ସାହିର ରାହୁଲ କୁମାର ରାଉତ ଏବଂ ରାମେଶ୍ୱରପୁର ଅଞ୍ଚଳର ଗଣେଶ୍ୱର ଖୁଣ୍ଟିଆ ଗିରଫ ହୋଇଛନ୍ତି। ଜବତ ବ୍ରାଉନ୍ସୁଗାରର ଆନୁମାନିକ ମୂଲ୍ୟ ୨ଲକ୍ଷ ୨୦ ହଜାର ଟଙ୍କା ହେବ। ସହରରୁ ପ୍ରଥମ ଥର ଏହି ନିଶାଦ୍ରବ୍ୟ ଜବତ କରାଯାଇଥିବା ବିଭାଗ ପକ୍ଷରୁ କୁହାଯାଇଛି।
ଦୀର୍ଘଦିନ ହେବ ରାମେଶ୍ୱରପୁର ଓଭରବ୍ରିଜ୍ ତଳେ ବ୍ରାଉନ୍ସୁଗାର କାରବାର ଚାଲିଥିଲା। ଶନିବାର ଗୋଇନ୍ଦା ସୂଚନା ମିଳିବା ପରେ କଟକସ୍ଥିତ ଅବକାରୀ ବିଭାଗ ଫ୍ଲାଇଂ ସ୍କ୍ବାଡ୍ ଇନ୍ସପେକ୍ଟର ପ୍ରମୋଦ କୁମାର ପଣ୍ଡା, ଏସ୍ଆଇ କାଳିନ୍ଦୀ ଚରଣ ବେହେରା, ଜିଲା ଅବକାରୀ ଇନ୍ସପେକ୍ଟର ରାଜଶେଖର ସ୍ବାଇଁ, ଟାଉନ ଥାନାଧିକାରୀ ଅଭିନବ ଡାଳୁଆ ପ୍ରମୁଖ ସଦଳବଳ ଚଢ଼ାଉ କରିଥିଲେ। ରାହୁଲଙ୍କଠାରୁ ୧୨ ଗ୍ରାମ୍ ଏବଂ ଗଣେଶ୍ୱରଙ୍କଠାରୁ ୧୦ ଗ୍ରାମ୍ ବ୍ରାଉନ୍ସୁଗାର ଜବତ କରାଯାଇଥିଲା। ଏ ନେଇ ଅବକାରୀ ବିଭାଗ ପକ୍ଷରୁ ପିଆର ନଂ. ୧୦୯/୧୯ ଏବଂ ୨୩/୧୯ରେ ପୃଥକ୍ ମାମଲା ରୁଜୁ କରାଯାଇଛି।
