ବଅଁରପାଳ, ୬।୯ (ଡି.ଏନ୍.ଏ) – ନାଲ୍କୋ ପ୍ରସିଦ୍ଧ ଗଣପର୍ବ ଦେବଶିଳ୍ପୀ ବିଶ୍ୱକର୍ମାଙ୍କ ପୂଜା ଆସନ୍ତା ୧୭ ତାରିଖ ଠାରୁ ଅନୁଷ୍ଠିତ ହେବ। ଏହି ପୂଜା ପାଇଁ ସମଗ୍ର ନାଲକୋ ନଗର ଏବେ ଠାରୁ ଚଳଚଞ୍ଚଳ ହୋଇପଡ଼ିଛି। ଚଳିତ ବର୍ଷ ୨୩ଟି ମଣ୍ଡପରେ ବିଶ୍ୱନିର୍ମାତା ପୂଜା ପାଇବେ। ପୂଜା ପାଇଁ ସମସ୍ତ ପୂଜା କମିଟି ପକ୍ଷରୁ ପ୍ରସ୍ତୁତି କାର୍ଯ୍ୟ ଆରମ୍ଭ ହୋଇଛି। ବ୍ୟଙ୍ଗ କାରିଗରଙ୍କ ଦ୍ୱାରା ମୂର୍ତ୍ତି, ସାଜସଜ୍ଜା ଓ ତୋରଣ ନିର୍ମାଣ ସହ ବିଭିନ୍ନ ପୂଜା କମିଟି ପକ୍ଷରୁ ବାଉଁଶ ତୋରଣ ପ୍ରସ୍ତୁତି କାମ ମଧ୍ୟ ଆରମ୍ଭ ହେଲାଣି।
ପ୍ରତିଯୋଗିତାମୂଳକ ଭାବେ ବିଭିନ୍ନ ପୂଜା ମଣ୍ଡପ ପକ୍ଷରୁ ସାଜସଜ୍ଜା ହୋଇଥାଏ। ପୂଜା ଆସିଲେ ସମଗ୍ର ନାଲକୋ ନଗରୀ ଝଲସି ଉଠିଥାଏ। ଆକର୍ଷଣୀୟ ତୋରଣ ସାଙ୍ଗକୁ ସୁସଜ୍ଜିତ ପୂଜା ମଣ୍ଡପ ଓ ରଙ୍ଗୀନ ଆଲୋକମାଳାରେ ସମଗ୍ର ଅଞ୍ଚଳ ଝଲମଲ ହୋଇପଡ଼ିଥାଏ। ପୂଜା ଅଞ୍ଚଳରେ ମୀନା ବଜାର, ଦୋଳି, ପଲ୍ଲିଶ୍ରୀମେଳା, ଗୁପ୍ଚୁପ, ଦହିବରା ସାଙ୍ଗକୁ ବିଭିନ୍ନ ପ୍ରକାର ଦୋକାନ ବଜାର ପଡ଼ିଥାଏ। ୭ ଦିନ ଧରି ଏହି ପୂଜା ଅନୁଷ୍ଠିତ ହୋଇଥାଏ। ପ୍ରତି ସନ୍ଧ୍ୟାରେ ଲୋକାରଣ୍ୟ ହୋଇପଡ଼ିଥାଏ ନାଲକୋ ନଗର। ନାଲକୋ ପ୍ରଶାସନ ପକ୍ଷରୁ ପୂଜାକୁ ଶାନ୍ତିଶୃଙ୍ଖଳାରେ ପାଳନ କରିବା ପାଇଁ ସମସ୍ତ ପ୍ରକାରର ବ୍ୟବସ୍ଥା କରାଯାଉଛି। ସେହିପରି ଟ୍ରାଫିକ ଶାନ୍ତିଶୃଙ୍ଖଳା ପାଇଁ ପୋଲିସ ପକ୍ଷରୁ ଚଳିତବର୍ଷ ମଧ୍ୟ କଡ଼ା ସୁରକ୍ଷା ବ୍ୟବସ୍ଥା କରାଯିବ ବୋଲି ଜଣାଯାଇଛି। ଆସନ୍ତା ୨୩ ତାରିଖରେ ପ୍ରଭୁ ବିଶ୍ୱକର୍ମାଙ୍କର ଭସାଣି ଉତ୍ସବ ଅନୁଷ୍ଠିତ ହେବ। ଏଥିପାଇଁ ସମସ୍ତ ପ୍ରକାରର ବ୍ୟବସ୍ଥା କରାଯାଇଛି।
