କଟକ ଅଫିସ,୬।୧୨:ଆକାଶଛୁଅଁା ପିଆଜର ଦର। ଖୁଚୁରା ବଜାରରେ କେଜି ପିଛା ପିଆଜ ୧୪୦ଟଙ୍କାରେ ବିକ୍ରି ହେଉଛି। ଆଉ କିଛିଦିନ ଗଲେ ଏହି ଦର ଦେଢଶହ ଟପିବ ବୋଲି ଆଶା କରାଯାଉଛି। ଅତ୍ୟଧିକ ଦରବୃଦ୍ଧି ଯୋଗୁ ହାଣ୍ଡିଶାଳରୁ ହୋଟେଲ ପର୍ଯ୍ୟନ୍ତ ପିଆଜ ଉଭାନ ହୋଇଯାଇଛି। ବଜାରରେ ବିକ୍ରି ହେଉଥିବା ଫାଷ୍ଟଫୁଡ ଖାଦ୍ୟରେ ବି ପିଆଜର ବ୍ୟବହାର ପୂର୍ବଭଳି ହେଉନାହିଁ। ରାଜ୍ୟର ପ୍ରମୁଖ ପରିବା ହାଟ ଛତ୍ରବଜାରରେ ପିଆଜ ସଙ୍କଟ ଦେଖାଦେଇଛି। ଆମଦାନୀ ପୂର୍ବଭଳି ହେଉନାହିଁ। ମହାରାଷ୍ଟ୍ରର ନାସିକ୍ ଓ ଆନ୍ଧ୍ରପ୍ରଦେଶରୁ ଆସୁଥିବା ପିଆଜ ଏବେ ବନ୍ଦ ହେବାକୁ ବସିଲାଣି। ଏହି ଦୁଇଟି ସ୍ଥାନରେ ପିଆଜ ଉତ୍ପାଦନରେ ପ୍ରଭାବ ପଡ଼ିବା ଯୋଗୁ ଏଭଳି ଅଭାବନୀୟ ପରିସ୍ଥିତି ରାଜ୍ୟରେ ଦେଖାଦେଇଛି। ଏହାଛଡ଼ା ଛତ୍ରବଜାରର ପିଆଜ ଗୋଦାମଗୁଡ଼ିକରେ ମଧ୍ୟ ଅଧିକ ପିଆଜ ମହଜୁଦ ନାହିଁ ବୋଲି ବ୍ୟବସାୟୀମାନେ କହିଛନ୍ତି।
ଜାନୁୟାରୀରେ କମିବ ପିଆଜ ଦର
ଜାନୁୟାରୀ ୧୦ପରେ ପିଆଜ ଦର ହ୍ରାସ ପାଇବ ବୋଲି ଛତ୍ରବଜାରର ବ୍ୟବସାୟୀମାନେ ଦୃଢୋକ୍ତିର ସହ କହିଛନ୍ତି। ଛତ୍ରବଜାରରେ ପିଆଜ କେଜି ୧୨୦ଟଙ୍କା ଓ ଖୁଚୁରା ବ୍ୟବସାୟୀମାନେ ୧୪୦ ଟଙ୍କାରେ ବିକ୍ରି କରୁଛନ୍ତି। ଏବେ ଆମଦାନୀ ହ୍ରାସ ପାଇଥିବାରୁ ପିଆଜ ଦର କ୍ରମଶଃ ବୃଦ୍ଧି ପାଇପାରେ। ହେଲେ ନାସିକ୍ ଓ ଆନ୍ଧ୍ରପ୍ରଦେଶର ବଡ଼ ବ୍ୟବସାୟୀଙ୍କ ସହ କଥାବାର୍ତ୍ତା ଶେଷ ହୋଇଛି। ଅମଳ ହେବାକୁ ଥିବା ନୂଆ ପିଆଜ ଆସିଲେ ବର୍ତ୍ତମାନର ଦରଠାରୁ ଢେର କମ୍ ରହିବ ବୋଲି ଛତ୍ରବଜାରର ଜଣେ ପିଆଜ ଗୋଦାମ ମାଲିକ କହିଛନ୍ତି।
୪ଟନ୍ ମେଣ୍ଟାଉଛି ୧୫୦ଟନ୍ର ଆବଶ୍ୟକତା
ଛତ୍ରବଜାରରେ ଏଭଳି ପରିସ୍ଥିତି ପୂର୍ବରୁ କେବେ ଦେଖିବାକୁ ମିଳିନି ବୋଲି ବ୍ୟବସାୟୀ କହିଛନ୍ତି। ପ୍ରତିଦିନ ଛତ୍ରବଜାରରେ ୧୫୦ଟନ୍ ପିଆଜ ପହଞ୍ଚେ। କଟକ ଜିଲା ସମେତ ଆଖପାଖ ପ୍ରାୟ ୧୦ଟି ଜିଲାର ବ୍ୟବସାୟୀ ଏଠାରୁ ପିଆଜ କିଣନ୍ତି। ଏଣୁ ନିୟମିତ ଆବଶ୍ୟକତା ୧୫୦ଟନ୍ ବୋଲି କୁହାଯାଇପାରିବ। ହେଲେ ଏବେ ଅତିବେଶିରେ ୪ଟନ ପିଆଜ ଛତ୍ରବଜାରକୁ ଆସୁଛି। ୧୫୦ଟନ୍ର ଆବଶ୍ୟକତା ୪ଟନ୍ରେ ପୂରଣ ହେଉଛି ବୋଲି ବ୍ୟବସାୟୀମାନେ କହିଛନ୍ତି।
